Read Falam Chin THUPHUAN 3 Bible Online

THUPHUAN 3 - Falam Chin bible

THUPHUAN 3

¹“Sardis kawhhran ih vancungmi hnenah hiti in ngan aw: “Pathian ih thlarau pasarih le arsi pasarih a neituih thucahmi cu hi bangtuk in a si. Na hnaṭuanmi ka thei; a nungmi kawhhran tiah na hmin a thangzet naón na thi a si.

²Curuangah ṭhangharh awla na neih hrihmi kha a thih ngah hlanah thazaang a thar in la sal aw. Ziangahtile hna na ṭuan ciami hi Pathian hmaiah an famkim hrih lo tiin ka hmu.

³Curuangah an lo zirhmi le na theih ciami pawl kha hngilh hlah aw; a thlun tum awla na sualnak ihsin kir sal aw. Na ṭhangharh lo a si ahcun rukru bangin na hnenah ka ra ding ih ka rat tikcu hman na thei lo ding.

⁴Sikhalsehla Sardis khua ih a ummi lakah mi malte cun nan hnipuan thiangfai zetin nan re a si. Puan rang hrukin keimah thawn nan feh ding, ziangahtile cutiih feh tlak nan si.

⁵Nehtu pawl cu cubangtuk in puan rang an hruk ding ih nunnak cabu sung ihsin an hmin ka phiat lo ding. Ka Pa le a vancungmi pawl hmaiah ‘Ka ta an si,’ tiah langhngan in ka sim ding.

⁶“Theihnak hna nan neih asile Thlarau in kawhhran pawl hnenih a simmi hi ngai uh,” tiah a ti.

⁷“Filadelfia kawhhran ih vancungmi hnenah hiti in ngan aw: “A thianghlimmi le a dikmi-ih thucahmi cu hi bangtuk in a si. Amah cu David tawh a neitu a si ih sangka a onmi cu zohman in an khar thei lo ding; cule a kharmi cu zohman in an ong thei lo ding.

⁸Na hnaṭuanmi ka thei; na thazaang a mal ti khal ka thei. Asinain ka thuzirhmi na thlun ih ka hmaiah rinsan tlak in na um. Na hmaiah sangka ka ong ih zohman in an khar thei lo ding.

⁹Ngaihnik! Judah mi kan si, an ti naón a si taktak lomi thuphanper pawl, Satan minung pawl cu na hnenah ka ratter dingih na hmaiah an kun ding. Ka lo duhdawt hi an zatein an thei ding.

¹⁰Ka thupekmi bangtuk in thinsau in harsatnak na tuar thei ruangah leilungtlun mi hmuahhmuah hniksak dingah a ra thleng dingmi harsatnak sung ihsin ka lo humhim ding.

¹¹Ka ra cing ding. Nehtu na si ruangih na ngah dingmi laksawng cu zohmanih an lo lon theilonak dingah na neih ciami cu kil ṭha aw.

¹²Nehtu cu ka Pathian ih biakinn sungih ṭhuam ah ka tuah ding ih cuih biakinn cu a tlansan nawn lo ding. Ka Pathian ih hmin cu a parah ka ngan ding; Jerusalem khua thar, ka Pathian ih khawpi hmin khal a parah ka ngan ding. Cuih khawpi cu vancung ihsin ka Pathian hnenin a rung ṭum dingmi a si. Cule ka hmin thar khal a parah ka ngan ding.

¹³“Theihnak hna nan neih asile Thlarau in kawhhran pawl hnenih a simmi hi ngai uh,” tiah a ti.

¹⁴“Laodisia kawhhran ih vancungmi hnenah hiti in ngan aw: A hminah Amen a si mi, rinsantlak le theitudik a si ih Pathian ih siammi hmuahhmuah ih hramthawhnak a si mi-ih thucah cu hi bangtuk in a si.

¹⁵Na hnaṭuanmi ka thei. A daih khal na dai lo, a sat khal na sa fawn lo, ti ka thei. Na daih asile dai lawlaw aw, na sat asile sa lawlaw aw, ti ka duh.

¹⁶A daih le dai si lo, a sat le sa si lo; a hlum fangfang na si ruangah ka ka sung ihsin ka lo khak suak ding.

¹⁷Nangmah cun, ‘Ka lian ih mi neinung ka si; zianghman tlaksammi ka nei lo,’ na ti aw. Sikhalsehla mizonzai le zangfakza na si zia na thei aw lo. Na farah, lawngfangkheh in na um ih na mit a caw.

¹⁸Thu ka lo sim duhmi cu, sui ngaingai ka hnen ihsin lei awla cuticun na lian ding. Na thuam awknak ah hnipuan rang lei awla, ningzakza lawngfangkheh ih na um kha hup aw. Na mit hrangah mitna sii khal lei awla cuticun khua na hmu ding.

¹⁹Ka duhdawtmi pawl cu ka kawk ih ka hrem a si. Curuangah taimak suah in um awla na sualnak sir aw.

²⁰Ngaihnik! sangka kiangah ka ding ih ka king. Zokhal ka aw a thei ih sangka i ontu cu a innah ka lut dingih a hnenah rawl ka ei ding; cule anih khal keimah thawn a ei ve ding.

²¹Nehtu ka si zo ih atu-ah ka Pa ih bawi tokham parah ka Pa kiangih ka to vekin nehtu a si mi pawl cu ka bawi tokham parah ka kiangah to theinak thu ka pe ding.

²²“Theihnak hna nan neih asile Thlarau in kawhhran pawl hnenih a simmi hi ngai uh,” tiah a ti.