Read Falam Chin THUPHUAN 8 Bible Online

THUPHUAN 8 - Falam Chin bible

THUPHUAN 8

¹Tuufa in tacik pasarihnak a phoih tikah vancungah nazi hrek sung hrawng thawthaang zianghman um loin a dai ṭhepṭhep.

²Cule Pathian hmaiih a dingtu vancungmi pasarih kha ka hmu ih an hnenah tawtawrawt pasarih an pek.

³A dang vancungmi pakhat, rimhmui urnak kheng a kengtu, a ra ih biakṭheng kiangah a ding. Pathian minung pawl ih thlacamnak thawn pek cih dingah le bawi tokham hmaiih a dingmi sui biakṭheng parih pe dingah cuih vancungmi hnenah cun rimhmui tampi an pek.

⁴Pathian hmaiih a dingtu vancungmi ih kut ihsin rimhmui urnak meikhu cu Pathian minung pawl ih thlacamnak thawn an kai tlaang.

⁵Cule vancungmi in rimhmui urnak kheng cu a lak ih biakṭheng ih meisa vaam thawn a khahter hnuah leilungah a hlon. Cuvete in khua a ri, ṭeek a tla, nimthla a kau ih ling a hnin.

⁶Cule vancungmi pasarih cu an tawtawrawt pasarih tum dingah an tiar aw cia.

⁷Vancungmi pakhatnak in a tawtawrawt cu a tum ih thisen thawn a rawi awmi rial le meisa cu leilung ah ruah bangin a sur ciamco. Leilung ṭhenthum ṭhenkhat a kang ṭheh, thingkung ṭhenthum ṭhenkhat a kang ṭheh ih hrampi hring cu a zatein an kang ṭheh.

⁸Vancungmi pahnihnak in a tawtawrawt a tum ih a alh hluahhlomi meitlang tumpi vek thil pakhat khi tifinriat sungah an vun hlon. Cutikah tifinriat ṭhenthum ṭhenkhat cu thisen ah a cang ṭheh.

⁹Tifinriat sung thilnung ṭhenthum ṭhenkhat an thi ih tangphawlawng ṭhenthum ṭhenkhat an siat ṭheh.

¹⁰Vancungmi pathumnak in a tawtawrawt a tum. Meifar bangin a alh hluahhlomi arsi tumpi pakhat cu van ihsin tiva le cerhti pawl ṭhenthum ṭhenkhat parah a tla.

¹¹Cuih arsi hmin cu, “A Kha,” ti a si. Tidai ṭhenthum ṭhenkhat cu tikha ah a cang ih cutiih a khaat ruangah cuih ti a intu mi tampi an thi.

¹²Cule vancungmi palinak in a tawtawrawt a tum ih ni ṭhenthum ṭhenkhat, thlapi ṭhenthum ṭhenkhat le arsi pawl ṭhenthum ṭhenkhat cu an siat ṭheh. Curuangah an tleunak ṭhenthum ih ṭhenkhat cu a hlo. Sun ṭhenthum ṭhenkhat ah siseh, zan ṭhenthum ṭhenkhat ah siseh, tleunak a um lo.

¹³Cule ka hun zoh ih vansangpi-ah khin mupi pakhat a zam ih, “Ṭihnungza! Ṭihnungza! Vancungmi pathum in an tawtawrawt an tum tikah cun leilung parih a ummi hmuahhmuah hrangah ṭihnungza a va si so!” tiah ring zetin a ti ka thei.