Read Falam Chin THUPHUAN 9 Bible Online

THUPHUAN 9 - Falam Chin bible

THUPHUAN 9

¹Cule vancungmi panganak in a tawtawrawt a tum ih van ihsin leilungah arsi pakhat a tlak ka hmu. Cule cuih arsi cu tawpneilo khurih tawhfung a hnenah an pek.

²Cuih arsi in tawpneilo khur cu a on tikah sosernak somei tumpi ihsin meikhu a suah vekin meikhu a hung suak luailo. Cuih meikhu in ni tleunak le thli lak khal a thimter ṭheh.

³Kharbok tampi cu cuih meikhu lak ihsin leilung parah an rung tla ih varngen meipir neihmi huham vek kha an hnenah pek an si.

⁴Cuih kharbok pawl cu hrampi, thingkung le a dang hramkung khal siseh, siatsuah lo dingin an sim. An siatsuah theimi cu an cal ah Pathian hminsinnak tacik a nei lomi lawng an si.

⁵Hi minung pawl thah theinak thu an nei lo; thla nga sung hrem theinak thu lawng an nei. Mi an hrem tikih a nat zia cu varngen meipir in mi a hen ih a nat bangtuk khi a si.

⁶Cuih thla nga sungah cun minung in thihnak an hawl rero ding naón an tong lo ding; thih an duh ding naón thihnak in a tlansan ding.

⁷Cuih kharbok pawl cu raldo dingih a ralringmi rang bangtuk an si. An lu parah sui lukhuh a bangmi an khum; an hmai cu minung hmai an bang.

⁸An lu-ih sam cu nunau sam bangtuk a si; an ha tla cu kiosa ha bangtuk a si.

⁹An ṭaang cu raldonak ih tuahmi thir ṭaangphaw bangtuk a si mi in an khuh ṭheh ih an thla an khawn thawm cu raldonak hmunih a tlan ciamcomi rangleng tampi awn thawm a bang.

¹⁰Mei an nei ih varngen meipir bangin mi an hen thei; thla nga sung mi an hrem theinak khal cu an mei ih huham neihmi ruangah a si.

¹¹Anmah uktu siangpahrang an nei ih cuih an siangpahrang cu tawpneilo khur uktu vancungmi a si. A hmin cu Hebru ṭong in Abaddon a si; Grik ṭong cun Apollion a si.[2]

¹²Ṭihnungza pakhatnak cu a cem; hi hnuah ṭihnungza pahnih an ra hrih ding.

¹³Cule vancungmi paruknak in a tawtawrawt a tum. Pathian hmaiih a ummi sui biakṭheng ih kil li ihsin aw thawng ka thei.

¹⁴Cuih aw in vancungmi paruknak hnenah, “Eufrates Tivapi kapih ṭemcih in a ummi vancungmi pali cu thlah thlang hai aw,” tiah a ti.

¹⁵Vancungmi pali cu thlah an si ih annih cu hi nazi, hi ni, hi thla le hi kum cekci-ah minung hmuahhmuah ih ṭhenthum ṭhenkhat that ṭhehtu dingih timtuahmi an rak si.

¹⁶Rang ralkap pawl cu an zatein million zahnih an si.[3]

¹⁷Cule hmuhmi ka neihnak ahcun rang le rang totu pawl ka hmu. An raldonak ṭaangphaw cu meiling bangin a sen, safaira timi lungmankhung bangin mepian a si ih kaat bangin a aihre. An rang pawl lu cu kiosa lu bangtuk an si ih an kaa sung ihsin meisa, meikhu le kaat mei-alh bangtuk an suak zukzo.

¹⁸Cuih rang ka sung ihsin a suak zukzo mi minung siatsuahtu phunthum: meisa, meikhu le kaat mei-alh in minung ṭhenthum ṭhenkhat an that ṭheh a si.

¹⁹Rang pawl huham neihnak cu an kaa le an mei ah a si. An mei cu rul vek a si ih lu an nei; cuih an lu cu minung tuahmawhnak ah an hmang.

²⁰Hi minung siatsuahtu phunthum ih an thah ngah lomi minung pawl cun anmah ih tuahcopmi thil kha an tlansan cuang lo. Khawsia an biaknak, sui le ngun le daar le lungto le thing ih tuahmi, a hmu thei lo, a ṭong thei lo, a feh thei lo, an kutih tuahcopmi milem pawl an biaknak an baang cuang lo.

²¹Culawng si loin mi an thahnak, dawi an hmannak, nupa sual an tuahnak le ruk an ruknak pawl cun an sir cuang fawn lo.