Read Falam Chin RUTH 1 Bible Online

RUTH 1 - Falam Chin bible

RUTH 1

¹Thuṭhentu pawl in Israel ram an rak uk laiah an ram sungah paam a rak tlung. Curuangah Judah ram Bethlehem khua ih a ummi mipa pakhat cu Moab ram ih um dingah a nupi le a fapa pahnih thawn an vung feh.

²Cupa ih hmin cu Elimelek a si; a nupi cu Naomi a si ih an fapa pahnih hmin cu Mahlon le Chilion an si. Anmah cu Efrath hrin an si. Moab ramah cun an vung thleng ih an vung um. Moab ram ih an um lai ah,

³Elimelek cu a thi ih Naomi cu a fapa pahnih thawn an hmei.

⁴A fapa pahnih cun Moab fala an ṭhit. Pakhat ih hmin cu Orpah a si ih a dang pakhat ih hmin cu Ruth a si. Cule cutawk ramsungih kum hra tluk an um hnuah,

⁵Mahlon le Chilion an thi lala ih Naomi cu pasal lo le fapa loin amah pakhat lawnglawng a rung taang.

⁶BAWIPA in amah ih minung pawl thluasuahnak a pek ih rawl an paṭhazet a si ti kha Moab ramih a um laiah Naomi in a thei.Curuangah a fapa le ih nupi pawl thawn Moab ram taanta dingah an tim an tuah.

⁷Cule Judah ramih kir dingah cun hmun khatah an pok.

⁸Asinain lamzinah Naomi cun, “Nan inn ah kir uhla nan nu-ih hnen veve ah vung um uh. Keimah le in thihsan zotu pawl parih nan ṭhat bangin BAWIPA cu nan parah ṭha ve hram seh.

⁹Cule pasal nei sal in hnangamte ih nunkhuasak sal thei dingah Pathian in thlawsuah lo pe hram seh,” tiah an hnenah a ti. Curuangah Naomi cun damte in va kir uh, tiah a hnam hai. Asinain a fapa ih nupi pahnih cu napi in an ṭap ih,

¹⁰“In taanta hram hlah aw; na miphun hnenah kan lo thlun ko pei,” tiah an ti.

¹¹Cutikah Naomi in, “Asilo, fanu le uh; nan kir tengteng a ṭul a si. Ziangah so ka hnenih feh cu nan duh? Nan pasal dingah fapa pawl ka nei nawn ding maw si?[1]

¹²Inn ah vung tlung uh; kei pasal nei sal dingah cun ka tar tuk zo. Cun ruahsannak a um lai, tiah ti tahrat in tuih zanah pasal nei in fapa pawl ka neih khalle,

¹³patling an si lai hlan lo nan pasal dingah nan hngak thei ding maw si? Pasal dang neih a lo dawntu ah an cang sawn lo ding maw? Fanu le uh, a cang thei lomi a si ti nan thei ko. BAWIPA in mi vanduai ah i tuah ih nan hrangah hin ka riah a sia ngaingai a si,” tiah a ti.

¹⁴Cule ring zetin an ṭap sal thotho. Cun Orpah in a ni[2] cu damte in tiah a hnamta ih a miphun hnenah a kir. Sikhalsehla Ruth cu kir loin a ni cu a kaih fetfet.

¹⁵Cutikah Naomi in, “Ruth, na pasal unau ih nupi cu a miphun le a khawzing[3] hnenah a kir zo. Nang khal amah thawn inn ah vung tlung aw,” tiah a ti.

¹⁶Asinain Ruth cun, “Nangmah lo taanta ih kir ding cu i fial nawn hlah aw. Na hnenah ka feh ve hram pei. Na fehnak kipah ka feh ve ding; na umnak kipah ka um ve ding. Na miphun cu ka miphun a si ding ih na Pathian cu ka Pathian a si ve ding.

¹⁷Na thihnak ah ka thi ding ih cutawkah phum ka si ve ding. Nang le kei hi thihnak siar lo zianghman in in ṭhen hlah seh. Thu dang ruangah ṭhen dingih ka lung a kim pang a si ahcun BAWIPA ih hremnak ṭihnungza cu ka parah thleng seh,” tiah a ti.

¹⁸Cutiih feh ve a tumtah zia cu Naomi in a hmuh tikah zianghman a ṭong nawn lo.

¹⁹An pahnih in an feh ih Bethlehem khua cu an thleng. An thlen thu an theih tikah khuasungmi pawl cu lungawi in an sa hiamhiam. Cule nunau pawl in, “Naomi kha maw na si?” tiah an sut.

²⁰Cutikah Naomi in, “Naomi,[4] tiah i ko nawn hlah uh. Marah, tiah i ko sawn uh; ziangahtile Ziangkimtithei Pathian in riahsiatpi tlak in i tuah zo a si.

²¹Hitawk ihsin ka rak feh laiah khan neinungzet le famkimzet tein ka rak feh; asinain atu-ah BAWIPA in i hruai kir tikah ka lawngte in ka thleng a si. Hitiin Ziangkimtithei BAWIPA in i hnong ih i tisiat tikah hin ziangah so nannih in, Naomi, tiah in kawh duh rero?” tiah a ti.

²²Cuticun Naomi cu a fapa ih nupi Moab nunau Ruth thawn Moab ram ihsin an ra kir ih barli fang an ah thok pekte-ah Bethlehem khua ah an ra thleng.