Read Falam Chin 1 SAMUEL 1 Bible Online

1 SAMUEL 1 - Falam Chin bible

1 SAMUEL 1

¹Efraim an timi tlangpar ramah Ramah timi khua a um ih cutawk khua ah Efraim miphun sung ihsin Elkanah an timi mipa pakhat a rak um. Amah cu Zuf miphun Tohu ih cithlah a si mi Elihu ih fa Jeroham ih fapa a si.

²Elkanah cu nupi pahnih a nei ih Hannah le Peninnah an si. Peninnah cun fa a nei, asinain Hannah cun fa pakhat hman a nei lo.

³Cule Elkanah cu a khua ihsin Shiloh khua ah kumtinte Ziangkimtithei BAWIPA bia dingah le thawinak pe dingah a feh ṭheu. Shiloh khua ah BAWIPA ih puithiam cu Eli ih fapa pahnih Hofni le Finehas an si.

⁴Cun Elkanah in BAWIPA hnenih thawinak a pek tikah a nupi Peninnah le a faale pawl hnenah an covo ciar a pek hai.

⁵Sikhalsehla a nupi Hannah cu a duhdawtzet ko naón a covo pakhat lawng a pek, ziangahtile BAWIPA in faate a pek lo ruangah a si.

⁶Cutiih fa neilo a si ruangah a huatu Peninnah cun Hannah cu a tisiat ih a ning a zakter ṭheu.

⁷Cuticun kum khat hnu kum khat a si vivo. BAWIPA ih inn ih an feh tikah Peninnah in Hannah cu a riah a siatter ṭheu ih Hannah cu rawl hman ei loin a ṭap ṭheu.

⁸Cutikah a pasal Elkanah cun, “Hannah, ziangah so na ṭah ih rawl tla na ei lo? Ziangah so riahsia ih na um ringring? Na hrangah keimah hi fapa pahra hnakin ka sunglawi sawn lo maw?” a ti.

⁹Voikhat cu Shiloh khua ah rawl an ei ṭheh tikah Hannah cu a tho ih a thinlung a hartuk ruangah BAWIPA ih hnenah ṭap phah in thla a cam. Puithiam hna a ṭuantu Eli cu BAWIPA ih biakinn ih sangka kiangah a tokham parah a to.

¹¹Cutikah Hannah cu thla a cam ih, “Maw BAWIPA, Cungnungbik Pathian, kei na salnu hi i run hmu hram aw. Ka zonzaihnak hi i theihsak in kei hi i ciing hram aw. I hngilh hram hlah aw. Fapate i zaangfah a si ahcun a nunsung hmuahhmuah na hrangah ka lo pe ding ih a sam khal meh a si dah lo ding, tiah ka lo kam a si,” tiah a ti.

¹²Hannah cu BAWIPA hnenah reizet thla a cam ih Hannah ih hmur cu Eli in a zoh ringring.

¹³Daite ih thla a cam hrangah a hmur cu a caang rero naón a aw a suak lo. Cutiih a um cu zu a ri a si tiah Eli in a ruah hrangah,

¹⁴Hannah hnenah, “Zu ri tahratin mualpho in um nawn hlah. Feh awla va fimharh ta aw,” tiah a ti.

¹⁵Cutikah Hannah in, “Asilo, bawipa, zu ka ri lo. Zu hrimhrim ka in lo, sabitti khal ka in lo. Ka thin a hartuk ruangah BAWIPA ih hnenah ka vansannak ka thlet thluh a si.

¹⁶Nunau hlolak a si tiah i ruat hram hlah aw. Ka thin a pit ih ka van a san tuk ruangah hiti ih thla ka cam a si,” tiah a ti.

¹⁷Cutikah Eli in, “Hnangamtein va feh awla Israel ih Pathian in a hnenih na dilmi cu lo pe hram seh,” tiah a ti.

¹⁸Cule Hannah in, “Ka parah zaangfahnak thinlung nei ringring aw,” tiah a ti ih a feh. Cuih hnuah rawl malte a ei ih a riah khal a sia nawn lo.

¹⁹A thaizing ah Elkanah le a innsang pawl cu an tho ih BAWIPA Pathian cu an biak. Cuih hnuah Ramah khua an inn ah an kir. Cule Elkanah le a nupi Hannah cu an pawl-aw ih Hannah ih thlacamnak cu BAWIPA in a theihsak.

²⁰Cutiin Hannah cu fa a vun ih fapa a hring. A fapa cu Samuel tiah hmin a sak, ziangahtile “BAWIPA hnenih ka dilmi a si,” tiah a ti.

²¹Cule Elkanah le a innsang pawl cu kumtinte an pek ṭheumi thawinak le a thukam cia bangtuk in a hleice ih thawinak BAWIPA hnenih pek dingah Shiloh khua ah an feh lala.

²²Asinain Hannah cu a feh lo. A pasal hnenah, “Ka fapa cu hnawi a thlah vete in BAWIPA inn ah ka fehpi pei ih cutawkah a nunsung hmuahhmuah a um ding,” tiah a ti.

²³Cutikah Elkanah in, “A ṭha bik na timi cu tuah awla naute hnawi a thlah hlan cu inn ah um ko aw. Cun BAWIPA in na thukammi cu kimter hram seh,” tiah a ti. Cutiin Hannah cu inn ah a um ih a fapa cu ṭhatein a zoh.

²⁴Hnawi a thlah tikah a nu in Samuel cu Shiloh ah a fehpi ih kum thum a timi cawcang pakhat, sangphut han khat le sabit thawl khat tla an keng. Nauhakte asinain Samuel cu a nu in Shiloh khua BAWIPA ih inn ahcun a fehpi.

²⁵Cawcang cu an that ih Samuel cu Eli hnenah an fehpi.

²⁶Cutikah Hannah in, “Bawipa, i hngilh zo maw si? Hitawk ah dingin BAWIPA hnenah thla a cammi nunau kha keimah ka si.

²⁷BAWIPA hnenah fapa te ka dil ih atu-ah ka dilmi cu i pek zo.

²⁸Curuangah amah cu BAWIPA hnenah ka pek. A nunsung hmuahhmuah amah cu BAWIPA ih ta a si ding,” tiah a ti. Cule BAWIPA cu cutawkah an biak.