Read Falam Chin 1 SAMUEL 12 Bible Online

1 SAMUEL 12 - Falam Chin bible

1 SAMUEL 12

¹Samuel in Israel mi pawl hnenah, “ṭuan dingih in fialmi cu kan ṭuan zo. Nanmah a lo uktu dingah siangpahrang ka ret zo.

²A lo hruaitu dingah nanmah ih ta a si zo. Kei cu ka tar zo ih ka ṭuak khal a par ṭheh zo. Ka fapa pawl khal nan lakah an tel a si. Ka no lai ihsin atu tiang nan hotu ka si ringring.

³Atu-ah nan hmaika ah ka um. Thilsual ka tuah mi pakhatkhat a um asile BAWIPA Pathian le amah ih hrilmi siangpahrang ih hmaiah atu-ah nan lungkim lonak phuang uh. Mi caw ka la dah maw? Mi laak ka ru dah maw? Mi pakhatkhat ka bum in ka neh-nen dah maw? Zo ih hnenin nawhthuh ka la dah maw? A dik loih ka lakmi a um a si ahcun ka lakmi zat in ka sam sal ding,” tiah a ti.

⁴Cutikah Israel mi pawl in, “Zohman in bum lo; in neh-nen lo ih zohnen hmanin zianghman na la dah lo,” tiah an ti.

⁵Cule Samuel in, “Tuihsun ih mawhnak nei loih in hmuhnak ahhin in theihpitu cu BAWIPA Pathian le amah ih hrilmi siangpahrang an si,” tiah a ti. Cutikah annih in, “BAWIPA cu in theihpitu a si,” tiah an ti.

⁶Cule Samuel in, “Moses le Aaron a hriltu le nan pupa pawl Izipt ram ihsin a suaktertu cu BAWIPA a si.

⁷Curuangah nan umnak ciarah ding uhla nanmah le nan pupa pawl run dingah BAWIPA ih mangbangza thil a tuahmi pawl ka lo sim ding ih BAWIPA ih hmaiah nan sualnak ka phuang ding.

⁸Jakob le a sungkhat pawl Izipt ramih an thlen tikah Izipt mi pawl in an hrem ruangah BAWIPA ih hnenah bomnak dil in an au. BAWIPA in an aunak cu a thei ih Moses le Aaron a thlah ih anmah in nan pupa pawl cu Izipt ram ihsin an suahpi ih hi ram ahhin an thlenpi a si.

⁹Asinain BAWIPA an Pathian an hngilh ruangah Pathian in Hazor khua ih ralkap pawl hotu ralbawi Sisera le Filistin mi pawl le Moab siangpahrang pawl kha Israel a doter ih a nehter.

¹⁰Cun BAWIPA hnenah bomnak dil in an au lala ih ‘Maw BAWIPA, na lamzin ihsin kan pial ih Baal khawzing le Astartes khawzingnu pawl kan bia. Kan sual a si. Asinain kan ral pawl ih kutsung ihsin in luatter hram awla nangmah kan lo bia ding,’ an ti.

¹¹Curuangah BAWIPA in Jerub-baal, Barak, Jefthah le Samuel pawl a thlah ih nan ral pawl ih kutsung ihsin an lo run ih hnangam zetin nan um.

¹²Sikhalsehla Ammon siangpahrang Nahash in in do ding ti nan theih vete in BAWIPA cu nan siangpahrang si dingah nan duh nawn lo ih, ‘In uktu dingah siangpahrang in pe aw,’ tiah in dil.

¹³Atu-ah nan hrilmi siangpahrang a um zo. Nan dilmi a si ih BAWIPA in a lo pek a si.

¹⁴Curuangah nanmah le nan siangpahrang in BAWIPA nan Pathian cu nan thlun, a thu khal nan ngai, a thupekmi bangtuk in nan tuah ih amah ṭihzah upatnak in a hna khal nan ṭuan a si ahcun a ṭha ko ding.

¹⁵Asinain BAWIPA thu nan ngai duh loih a thupekmi tla nan el a si ahcun, nan pupa pawl ih an rak tuar bangin, nanmah le nan siangpahrang in nan tuar ding a si.

¹⁶Curuangah nan umnak hmun ciarah ding uhla BAWIPA ih thil makzet a tuah dingmi hi zohhnik uh.

¹⁷Atu hi ṭhal tikcu a si lo maw? Thla ka cam pei ih BAWIPA in khua a ritter ding ih ruah a surter ding. Cumi cu nan hmuh tikah BAWIPA hnenih siangpahrang nan dil ruangah hin Pathian hnenah sualnak tumzet nan tuah a si, ti cu fiangtein nan thei ding a si,” tiah a ti.

¹⁸Cutikah Samuel in thla a cam ih cuih ni rori ah Pathian in khua a ritter ih ruah khal a surter. Cule mi hmuahhmuah in BAWIPA le Samuel cu an ṭihzet ih,

¹⁹Samuel hnenah, “Kan thih lonak dingah zaangfahteón BAWIPA na Pathian hnenah thla in cam sak hram aw. Kan sualnak siar cawk loih tlunah siangpahrang kan dil ruangah hin kan sual bet a si,” tiah an ti.

²⁰Cutikah Samuel in, “Nan thin phang hlah uh. Thil ṭha lo nan tuah zo naón BAWIPA ih hnen ihsin pial nawn hlah uh. Nan thinlung zatein amah ih hna ṭuan sawn uh.

²¹Pathian lem pawl hnenah feh hlah uh. Annih pawl cun an lo bawm loih an lo run thei fawn lo, ziangahtile annih cu a lem an si.

²²Pathian cun a hmin sal in thu a lo kam ih ziangtik hmanah a lo taan lo ding; ziangahtile amah ih minung si dingah a lo tumtah cia zo a si.

²³Kei cu ziangtik hmanah nan hrangih thlacam ka cawl lo ding; ka cawl asile BAWIPA ih hmaiah misual ka si ding. A ṭha mi le a dikmi pawl tuah dingah ka lo zirh sawn ding.

²⁴BAWIPA cu ṭihzah uhla rinsantlak zetin nan thinlung zate thawn amah ih hna ṭuan uh. Nan hrangih thilmak zetzet a tuah mi pawl ziangtik hmanah hngilh hlah uh.

²⁵Sikhalsehla thil ṭha lo nan tuah thotho a si ahcun nan zatein nan siangpahrang thawn siatsuah thluh nan si ding,” tiah a ti.