Read Falam Chin 1 SAMUEL 13 Bible Online

1 SAMUEL 13 - Falam Chin bible

1 SAMUEL 13

¹Saul cu siangpahrang a can tikah kum … sawmthum a ti ih Israel siangpahrang kum … sawmli hnih sung a ṭuan.[2]

²Saul in Israel mi pawl sung ihsin minung thawngthum a hril ih midang pawl cu an inn ah a tlunter. Minung thawnghnih Bethel tlangram ih Mikmash an timi hmunah amah hnenah a ret. Cun a dang thawngkhat cu Benjamin ram Gibeah khua, a fapa Jonathan hnenah a ret.

³Geba khua ah Jonathan in Filistin ralbawipa a that ih cuih thu cu Filistin mi pawl in an thei thluh. Cutikah Saul in Hebru mi pawl raltho dingih ko dingah mi a thlah ih a ramsung hmuahhmuah ah tawtawrawt tum in an feh ciamco.

⁴Filistin ralbawipa Saul in a that ti in le Israel mi cu Filistin mi pawl in an nautat zet a si, tiah Israel mi hmuahhmuah hnenah an sim thluh. Curuangah raltho dingih kawh an si tikah Saul hnen Gilgal khua ah an feh.

⁵Israel mi pawl do dingah Filistin mi pawl cu an pum-aw ciammam ih raldonak rangleng thawng sawmthum, rang ralkap thawngruk le tifinriat kapih vunnel zat ralkap an khawm aw. Beth-aven ihsin nisuahnak lamih a ummi Mikmash ah an feh ih cutawkah an riak.

⁶Israel mi pawl cu nasazet in an do. Filistin mi pawl an cak deuh ruangah Israel mi pawl cu an van a sang ih a hrekkhat cu lungpuk le lungkua ah, a hrekkhat cu lungphen le leilungkua le tikhur sung tla ah an relh.

⁷A hrekkhat cu Jordan tiva an tan ih Gad le Gilead ram tla an thleng. Saul cu Gilgal ah a um ih amah thawn a ummi pawl cu an thinphang in an thir thlohthlo.

⁸Samuel in hngak dingih a tiamta vekin ni sarih sung Saul cun a hngak; asinain Samuel cu Gilgal ah a thleng dah lo. Saul cu a minung pawl in an tlansan rero thlang.

⁹Curuangah an hnenah Saul in, “Mei-ur thawinak le remnak thawinak pawl rak keng hnik uh,” a ti. An rak ken tikah amah in thawinak cu a pek.

¹⁰A pek ṭheh vete in Samuel cu a ra thleng. Samuel a rat vete in Saul cun va hmuak dingah a pok.

¹¹Cule Samuel in, “Ziang so na rak tuah?” tiah a ti. Cutikah Saul in, “Ka ra thleng ding, na ti tikcu ah na thleng lo ih ka milai pawl in in tlansan deuhdeuh ih tlunah Filistin mi pawl Mikmash ah an khawm-aw ciamco fawn.

¹²Cun Filistin mi pawl in Gilgal ah in do ding tin ka zum ih Pathian ih bomnak le ka dil hrih lo ruangah thawinak ka pek lo ahcun a cang thei nawn lo a si, ka ti ih keimah tein thawinak ka rak pek a si,” tiah a ti.

¹³Cutikah Samuel in, “Na tuah mi hi aatthlak a si. BAWIPA na Pathian ih thupekmi na thlun lo a si. Rak thlun cila nangmah le na tesinfa pawl hi Pathian in a kumkhua in Israel a lo ukter ding naón.

¹⁴Sikhalsehla atu cu na uknak hi rei a awh lo ding. Pathian in amah ih duhmi minung a hawl ding ih a minung pawl uktu dingah a tuah ding. Ziangahtile BAWIPA ih thu na ngai lo a si,” tiah a ti.

¹⁵Samuel cu Gilgal ihsin a feh. Midang hmuahhmuah in Saul an thlun ih a ralkap pawl hnenah Saul le mipi cu an feh. Gilgal ihsin Benjamin ramih a ummi Gibeah ah an feh. Saul in a ralkap pawl cu a khawm ih zaruk an kim.

¹⁶Saul le a fapa Jonathan le an ralkap pawl cu Benjamin ramsung Geba khua ah an riak. Filistin pawl cu Mekmash ah an riak.

¹⁷Filistin ralkap pawl cu raldo dingih an feh tikah bur thum in an ṭhen aw. Bur khat cu Shual ram Ofrah khua lamah an feh.

¹⁸Bur hnihnak cu Beth Horon khua lamah an feh ih, bur thumnak cu Zeboiim phairawn ihsin khatlam ral thlaler ramṭhing lamah an feh.

¹⁹A cuihsan laiah Israel ramsungah sodeng pakhat hman an um lo; ziangahtile Filistin mi pawl in nam le fei pawl ser lo dingin Hebru mi pawl cu an kham.

²⁰Curuangah Israel mi pawl cu an tuhmui, an tupheng, an hreitlung le an namtong pawl hriam ko ih ser dingah Filistin mi pawl hnenah an fehpi ṭheu.

²¹Hreitlung le namtong ser man cu ngun tangka tamat a si ih, tuhmui le tupheng ser man cu ngun tangka ngamu a si.

²²Curuangah ral an do awk tikah Israel mi sungah Saul le a fapa Jonathan siar lo, zohman fei le nam kengtu an um lo.

²³Cule Mikmash lamzin kiltu dingah Filistin pawl in ralkap bur khat an thlah.