Read Falam Chin 1 SAMUEL 14 Bible Online

1 SAMUEL 14 - Falam Chin bible

1 SAMUEL 14

¹Nikhat cu Jonathan in a hriamnam kengtu tlangval pa ih hnenah, “Filistin pawl ih riahnak lamah kan va feh hnik pei,” tiah a ti. A cuih thu cu Jonathan in a pa a sim lo.

²Saul cu Gibeah kiangte Migron khua ih tale kung tumpi hnuai ah a riak. A hnenah ralkap zaruk an um.

³Cun puithiam ṭaangthlaih angki a kengtu cu Ahitub ih fapa Ahijah a si; Ahitub cu Ikhabod ih unau a si ih Ikhabod cu Finehas ih fapa a si. Finehas cu Shiloh khua ih BAWIPA ih puithiam Eli ih fapa a si. Cutawkih a ummi ralkap pawl cun Jonathan a feh zo ti kha an thei lo.

⁴Filistin ralkap pawl ih riahnak ah feh dingin Jonathan ih a zawh ding mi tlangkawn ih khatlam veve ah a zumzetmi lungtumpi pahnih an um. Lungto pakhat ih hmin cu Bozez an ti ih a dang pakhat cu Seneh an ti.

⁵Bozez cu lamzin saklam, Mikmash lamah a um ih, Seneh cu lamzin ih thlanglam, Geba lam kapah a um.

⁶Jonathan in tlangval pa ih hnenah, “Pathian awi lo Filistin ralkap pawl ih riahnak ah kan va feh pei. Pathian in in bawm men ding. In bom ngaingai ahcun ziangtlukih mi malte kan si hmanah kan neh thotho hai ding. BAWIPA ih in bomnak cu zohman in an kham thei zik lo,” tiah a ti.

⁷Tlangvalpa cun, “Na tummi cu tuah ko aw; na hnenah ka thinlung zatein ka ṭang a si,” tiah a ti.

⁸Cutikah Jonathan in, “A ṭha! Kan va feh pei ih in rak hmu hai seh.

⁹‘In rak hngak uh, nan hnenah kan ra ding,’ in ti a si ahcun hi tawk ihsin kan hngak ding.

¹⁰‘Kan hnenah hung uh,’ in ti a si ahcun kan hung feh pei; ziangahtile ‘Hung uh,’ in tile cu Pathian bomnak in kan neh ding ti langnak a si,” tiah a ti.

¹¹Cule Filistin mi pawl ih hmuh dingin an lang-awter ih cutikah Filistin mi pawl cun, “Zohhnik uh, an relhnak lungkua sungin Hebru mi a hrekkhat an ra pawt zo khi,” tiah an ti.

¹²Cule Filistin ralkap pawl cun Jonathan le a hriamnam kengtu tlangvalpa cu, “Hinah hung hnik uh. Thu lo sim ding kan nei a si,” tiah an ti. Cutikah Jonathan in a tlangvalpa hnenah, “I thlun zaang aw. Pathian in nehnak in pe zo a si,” tiah a ti.

¹³Jonathan cu bokvak in a hung vak ih tlangvalpa cun a thlun vivo. Jonathan in Filistin pawl cu a nam ih a vuak thlak ih tlangvalpa in a that vivo hai.

¹⁴Hmaisa bikih an thahnak hmun inn hmun tia tlukah Jonathan le a tlangvalpa in Filistin mi pawl kul tluk an that a si.

¹⁵Filistin mi hmuahhmuah in an thin a phang ngaingai ih ralvengtu ralkap le riahnak ih a ummi ralkap pawl tla an khur ṭheh. Leilung tiangin a hnin ih Filistin mi pawl cu ṭih le khur in an buai ciamco.

¹⁶Benjamin ram, Gibeah khua ih Saul ih ralvengtu pawl in Filistin mi suk le so ih an tlan rero kha an hmuh tikah,

¹⁷Saul in, “Ralkap pawl, siar-aw hnik uh; a kim lo nan um maw!” tiah a ti. An siar-awk tikah Jonathan le a hriamnam kengtu tlangvalpa an um lo ti kha an thei.

¹⁸Cutikah Saul in puithiam Ahijah hnenah, “Puithiam ṭaangthlaih angki cu hinah rak keng aw,” tiah a fial. Ziangahtile Israel mi hmai ih puithiam angki kengtu cu amah a si.

¹⁹Puithiam Ahijah hnenih Saul a ṭong rero laiah Filistin ralkap pawl cu an riahnak ahcun an buai sinsin. Curuangah Saul in Ahijah hnenah, “Na aizing cu bangta hrih aw,” tiah a ti.

²⁰Cule Saul le a ralkap pawl cu hmakhatte-ah Filistin mi do dingah an feh. Filistin pawl cu an buaituk thlang ih an minung khal thei-aw nawn loin anmah le anmah an that-aw rero.

²¹Filistin pawl hnenih a rak ṭangtu Hebru mi pawl tla Saul le Jonathan an hmuh tikah an hnenah an let-aw sal.

²²Cun Efraim tlangram ah a tlan ih a relhmi Israel ralkap pawl tla Filistin mi an sung ti an theih tikah Saul le Jonathan hnenah an ṭang sal ih Filistin mi pawl cu an do.

²³A cuih ni ah Israel cu BAWIPA in a runsuak ih Israel mi pawl in Bethaven khua lan tiang an hei dawi a si.

²⁴Saul in, “Ka ral pawl parih phu ka lak hlan lo, tuihsun ah zohman rawl nan ei lo pei. Nan ei asile nan buarsual a si ding,” tiah siatcam in thu a pek. Curuangah cuih ni cu Israel mi pawl an ril a rawng ngaingai ih an ṭaamsawl thluh. Sunvu zianghman an ei lo.

²⁵Tupi sung an thleng ih cutawkah khuaitizu tampi a um.

²⁶Tupi sung cu khuaitizu in a khat naón Saul ih siatcamnak an ṭih ruangah zohman in an ei ngam lo.

²⁷Sikhalsehla Jonathan in a pa ih siatcamnak thupekmi cu a theih lo ruangah a kenmi fung cun khuaithlar cu a dawt ih khuaitizu malte a ei. Cuticun a rilrawn cu a ṭha deuh.

²⁸Cumi a hmuh tikah ralkap pa pakhat in, “Zokhal rawl kan ei lo ruangah tha kan nei nawn lo a si. Na pa in, ‘Tuihsun ih rawl a eitu cu siatserh siseh,’ a ti ruangah kan ei ngam lo a si,” tiah a sim.

²⁹Cutikah Jonathan in, “Kan minung parah ka pa in thil ṭha lo ngaingai a tuah a si. Zohhmen uh, khuaitizu ka ei ruangah ka ṭha deuh ngaingai a si.

³⁰Tuihsun Filistin pawl an neh ih rawl an lon mi hmuahhmuah kha lak tahratin ei hai sehla ziangtlukin an hrangah a ṭhahnem ding. Ziangtluk in so Filistin mi an that tam sinsin ding, ruathnik hmen uh,” tiah a ti.

³¹A cuih ni ah Israel mi pawl in Filistin mi pawl cu Mikmash ihsin Aijalon tiang an nor. Israel mi cu an ril a rawn ruangah an ṭaamsawl thluh.

³²Curuangah ral pawl ih ta an lonmi tuu le caw pawl cu a hmunah an that ih an sa cu a thi thawn an ei ciamco.

³³Cule Saul hnenah, “Na ralkap pawl in a thi thawn sa an ei ciamco ih BAWIPA ih hmaiah an sual a si,” tiah mi in an sim. Cutikah Saul cun, “Kan miphun zuarthlaitu nan si,” tiah a au. Cuih tlun ah, “Lungto tumpi hinah rak hril uh,” a ti.

³⁴“Mi hmuahhmuah hnenah va feh uhla an caw le an tuu pawl hinah rak keng dingin va sim uh. Sa cu a thi thawn an ei lonak dingah le BAWIPA ih hmaiah an sual lonak dingah an ṭilva cu hinah ra that hai sehla ei hai seh,” tiah a ti. Curuangah a cuih zan cu an zatein an caw an rak keng ih cutawkah cun an that.

³⁵Saul in biakṭheng a dawlih BAWIPA hrangih a dawlmi hmaisa bik a si.

³⁶Cule Saul in a ralkap pawl hnenah, “Kan vung feh pei ih zanah Filistin mi pawl kan vung do pei. Zinglam khawvang tiang kan vung siim ding ih kan vung that thluh hai ding,” tiah a ti. “A ṭha bik na timi poh cu tuah ko aw,” tiah an ti. Asinain puithiam in, “Pathian kan ron hmaisa hrih pei,” tiah a ti.

³⁷Curuangah Saul in Pathian hnenah, “Filistin pawl ka do pei maw? Kan do asile kan neh pei maw?” tiah a sut. Asinain cuih ni cu Pathian in a sawn lo.

³⁸Cutikah Saul in Israel hruaitu pawl hnenah, “Ra hnik uh, tuihsun ah ziang mawhnak so nan tuah, hawl hnik uh.

³⁹A nungmi BAWIPA, Israel Runtu ih hmin in ka lo kam a si: ka fapa Jonathan hman a mawh a si ahcun thah a si pei,” tiah a ti. Midang cu zianghman an ṭong lo.

⁴⁰Cule Saul in, “Nan zatein khi lamah va ding uh. Kei le ka fapa Jonathan hinah kan ding pei,” a ti. “Na duh vekin si ko seh,” tiah misenpi in an ti.

⁴¹Cutikah Saul in BAWIPA, Israel ih Pathian hnenah, “BAWIPA, ziangah so tuihsun ah zianghman i sawn lo? BAWIPA, Israel ih Pathian, atu-ah Urim le Thummim [3] in in run let hram aw. Keimah ih mawh, a si lole Jonathan ih mawh a si ahcun Urim in in let aw. Israel misenpi pawl an mawh a si ahcun Thummim in in let aw,” tiah a ti. Urim in a run let ruangah Jonathan le Saul cu mimawh an si ih Israel mi pawl cu mawh lo ah an cang.

⁴²Cutikah Saul in, “Keimah le ka fapa Jonathan ah zoso a mawh?” tiah a sut sal tikah Jonathan parah a tlu.

⁴³Cule Saul in Jonathan cu, “Ziang so na tuah sual?” tiah a sut. Cutikah Jonathan in, “Khuaitizu malte ka ei a si. Thih ding a si ahcun ka thi ko pei cu,” tiah a ti.

⁴⁴Saul in, “Nangmah na thih lo ahcun keimah hi Pathian in i run that seh,” tiah siat a cam.

⁴⁵Sikhalsehla Israel mi pawl in Saul hnenah, “Israel hrangih ral a nehtu Jonathan a thi ding maw? Thi hrimhrim hlah! A lu parih samphang pakhat hman leilung parah a tla lo pei, tiah a nungmi BAWIPA ih hmin in thu kan kam aw. Tuihsun ih a tuahmi cu BAWIPA ih bomnak in a tuahmi a si,” tiah an ti. Cutiin Israel mi pawl in Jonathan cu thi loin an hum suak.

⁴⁶Cuihhnu cun Saul in Filistin mi pawl cu dawi nawn loin a kirsan ih Filistin pawl cu an ramah an tlung.

⁴⁷Saul cu Israel siangpahrang a can hnuah khuazakip ah ral a do. Moab mi pawl, Ammon mi pawl le Edom mi pawl a do ih Filistin mi pawl le Zobah siangpahrang pawl tla a do. Ral a donak tinah nehtu a si ringring.

⁴⁸Ralṭhazet in ral a do ih Amalek pawl khal a neh. Israel mi a siimtu pawl ih kut ihsin a hum ngah hai a si.

⁴⁹Saul ih fapa pawl cu Jonathan, Ishvi le Malkhishua an si. A fanu upa sawn cu Merab a si ih a nauta sawn cu Mikhal a si.

⁵⁰A nupi cu Ahimaaz ih fanu Ahinoam a si. A ralkap uktu bawi cu a paseu Ner ih fapa Abner a si.

⁵¹Saul ih pa Kish le Abner ih pa Ner cu Abiel ih fapa an si.

⁵²Saul in a nunsung hmuahhmuah nasazet in Filistin pawl a do. Micak le mi ralṭha a hmuhmi le a tonmi hmuah in a ralkap ah a lak ṭheu.