Read Falam Chin 1 SAMUEL 15 Bible Online

1 SAMUEL 15 - Falam Chin bible

1 SAMUEL 15

¹Samuel in Saul hnenah, “Pathian minung Israel mi pawl uktu siangpahrang si dingih hriak lo culhtu dingah BAWIPA in i thlah zo. Curuangah BAWIPA ih simmi cu ngai aw.

²Izipt ram ihsin Israel mi pawl an suah laiah, Israel mi a rak dodaltu Amalek mi pawl cu Ziangkimtithei BAWIPA in hrem a tum a si.

³Feh awla Amalek mi pawl cu va do uh. An neihmi hmuahhmuah siatsuah thluh uh. Zianghman zuah hlah uh; mipa, nunau, nauhak le a suak pekte naute tiangin that thluh uh. Caw, tuu, kalauk le laak pawl khal that thluh uh,” tiah a ti.

⁴Curuangah Saul in a ralkap pawl a ko ih Telaim ah an khawm aw. Israel ihsin ralkap thawng zahnih le Judah ihsin ralkap thawnghra an ra.

⁵Cule Saul le a ralkap pawl cu Amalek khawpi lam ahcun an feh ih tiva car sung ihsin ral an bawh.

⁶Saul in Ken mi pawl hnenah, “Izipt ram ihsin Israel mi pawl an suah laiah Israel mi parah nannih cu nan rak ṭha a si. Amalek mi pawl hnenih kan lo thah cih thluh lonak dingah Amalek mi pawl cu tlansan uhla fehsuak uh,” tiah ralrinnak a pek. Curuangah Ken mi pawl cu an suak.

⁷Saul in Amalek mi pawl cu Izipt ram nisuahnak lam Havilah ihsin Shur tiang a neh thluh.

⁸Amalek siangpahrang Agag cu a nung in a kai ih midang pawl cu a that ṭheh.

⁹Saul le a ralkap pawl in Agag ih nunnak cu an zuah ih, a ṭha bikmi tuu le caw, tuu faate le caw faate pawl le a ṭha an timi pohpoh cu an that lo. Ṭhathnemnak nei lomi le man nei lomi hmuahhmuah cu an that thluh.

¹⁰BAWIPA in Samuel hnenah thu a sim sal ih,

¹¹“Saul hi siangpahrang ih ka canter cu ka siir aw ngaingai. A dung i tun ih ka thupek a thlun lo a si,” tiah a ti. Samuel cu a thin a heng ngaingai ih zanvarte BAWIPA hnenah thla a cam.

¹²A thaizing zingpitah Saul tong dingin a feh. Saul cu amah ih hmin hngilh lonak dingah lung a dawlnak Karmel khua ah a feh ih cuih hnuah Gilgal ah a feh a si, ti thu cu Samuel in a thei.

¹³Cun Samuel cu Saul hnenah a va thleng ih Saul cun a rak cibai ih, “BAWIPA in lo thluasuah hram seh, Samuel. BAWIPA ih thupekmi ka thlun ko a si,” tiah a ti.

¹⁴Cutikah Samuel in, “Cuti asile ziangtinso tuu a meekmi le caw a pawmi ka theih rero?” tiah a sut.

¹⁵Saul in, “Amalek mi pawl hnen ihsin ka ralkap pawl ih an lakmi a si. Tuu siseh caw siseh a ṭha bikmi cu BAWIPA na Pathian hrangih thawinak pek dingah an ret ih a dang cu kan that thluh a si,” tiah a ti.

¹⁶Samuel in, “Cawl hrih awla mizan ah BAWIPA ih thu i simmi ka lo sim pei,” tiah a ti. “I sim hnik aw,” tiah Saul in a ti.

¹⁷Cutikah Samuel in, “Nangmah cun zianghman ka si lo tiah na ruat-aw ding naón Israel miphun pawl hotu na si. BAWIPA in Israel siangpahrang ah hriak a lo culh a si.

¹⁸Cun mi siava Amalek mi pawl that thluh dingah BAWIPA in thu a lo pek ih an zate ih na thah thluh hlan lo do dingin feltein a lo tiam a si.

¹⁹Cuti asinain ziangah so a thu na ngai lo? Ziangah so thilri lonmi pawl cuh dingah zamrang sawn in na pan ih BAWIPA ih lungkim lomi cu na tuah?” tiah a ti.

²⁰Saul in, “BAWIPA ih thu ka ngai ko sokhaw! I fial vekin ka feh ih Amalek siangpahrang Agag lawng a nungin ka rak thlenpi. Midang hmuahhmuah cu ka that ṭheh a si.

²¹Asinain ka ralkap pawl cun an kaihmi lakih tuu le caw ṭha bik pawl cu an that lo. Gilgal khua ah BAWIPA na Pathian hnenih thawinak pek dingah an rak keng sawn a si,” tiah a ti.

²²Cutikah Samuel in, “Khuimiso BAWIPA in a duh sawn? Amah ih thu thlun maw, a si lole saserh peknak le thawinak so? Tuu a ṭha bikmi thawn a hnenih raithawi hnakin amah ih thu thlun cu a ṭha sawn a si. Amah dodal cu polsia dawihmang tlukin a ṭha lo a si.

²³Puarthau ih nun cu milem biak tlukin a sual a si. BAWIPA ih thupekmi na duh lo bangtuk in anih khal in siangpahrang ah a lo duh ve lo,” tiah a ti.

²⁴Cutikah Saul in, “Ka sualzet a si. BAWIPA ih thupekmi le nangmah ih thucahmi ka thlun lo. Ka milai pawl ka ṭih deuh ruangah an duhnak bangin ka thlun.

²⁵Sikhalsehla BAWIPA ka biak theinak dingah ka sualnak cu i ngaithiam hram awla ka hnenah Gilgal ah kirsal aw, tiah zaangfah ka lo dil,” a ti.

²⁶Samuel in, “Na hnenah ka kir sal lo ding. BAWIPA ih thupekmi na duh lo ruangah nang khal Israel ih siangpahrang si dingah a lo duh nawn ve lo a si,” a ti.

²⁷Cule Samuel cu tlung dingin a pok. Asinain Saul in a puan in a kai ih a puan cu a tlek.

²⁸Cutikah Samuel in, “BAWIPA in tuihsun ah Israel ram uknak cu na hnen ihsin a lak ih nangmah hnakih a ṭha deuhmi hnenah a pek zo.

²⁹Israel ih sunloihmi Pathian cu thuphan a per lo ih a thin a thleng-aw rero lo. Minung a si lo ruangah a thin a thleng rero lo a si,” tiah a ti.

³⁰Cule Saul in, “Ka sual zo a si. Asinain Israel mi hmuahhmuah le ka minung hruaitu pawl ih hmai talah hin i upatnak cu langter hram awla BAWIPA na Pathian ka biak theinak dingah ka hnenah kir ve hram aw,” tiah a dil ciamco.

³¹Curuangah Samuel cu Saul hnenah a kirsal ih Saul cun BAWIPA cu a biak.

³²Cutikah Samuel in, “Ka hnenah siangpahrang Agag cu rak hruai uh,” tiah thu a pek. Agag cu lungawizet in Samuel ih hmaiah cun a ra ih, “Thih ding ka luat zo a si hi!” tiah amahte a ruat.

³³Cule Samuel in, “Na ralnam in nunau tampi cu faate neilo ih a tuah bangtuk in atu-ah na nu khal faate neilo ah a cang ve ding,” a ti. Cutiin Gilgal ih biakṭheng hmai rori ahcun Agag cu Samuel in a that ih a satcip ṭheh a si.

³⁴Cun Samuel cu Ramah ah a feh ih Saul cu Gibeah ih a inn ah a tlung.

³⁵Samuel cun a nunsung hmuahhmuah ah siangpahrang Saul cu a tong sal nawn lo; asinain a hrangah riahsia in a um ringring. Saul cu Israel siangpahrang ih a rak tuah ruangah BAWIPA Pathian cu a siir-aw ngaingai.