Read Falam Chin 1 SAMUEL 20 Bible Online

1 SAMUEL 20 - Falam Chin bible

1 SAMUEL 20

¹David cu Ramah khua kiang Naioth khua ihsin a tlan ih Jonathan hnenah a thleng sal ih a hnenah, “Thil sual ziangso ka tuah? Ziang mawhnak so ka neih? Na pa ih parah ziangvek thilsia ka tuah ruangah so hiti ih thah i tum?” tiah a ti.

²Cutikah Jonathan in, “Pathian in na thih ding cu lo siang hram hlah seh. Ka pa in a tuahmi hmuahhmuah cu thupi siseh, thute siseh i sim thluh ṭheu. Thah a lo tum sisehla i pheh lo ding. I sim ko ding a si,” tiah a ti.

³Cule David in, “Nangmah in kei hi ziangtluk i duh ti cu na pa in a theih ruangah a tumtahmi cu na thinlung natter ding a phan ruangah lo theihter a tum lo a si. Ka thihnak ah kar khat lawng a sam ti cu BAWIPA ih hmin in ka kam ngam a si,” tiah a ti.

⁴Jonathan in, “Tuahter i duhmi pohpoh ka tuah ding,” tiah a ti.

⁵Cutikah David in, “Thaisun hi Thla Thar Puai a si ih siangpahrang hnenih rawl ei ding ka si. Asinain na lung a kim ve asile hramlakah ka feh pei ih tipsun zanlam tiang ka va thup-aw ding.

⁶Rawl ei tikcu ih ka um lo tikah na pa in i hlam asile Bethlehem an inn ah zamrangin a va tlungta; ziangahtile an sungkhat in kumtin an pek ṭheumi thawinak pek tikcu a si ih keimah i simta a si, tiah run ti aw.

⁷Cutikah na pa in, ‘A ṭha ko,’ a ti ahcun phan ding zianghman a um lo. Asinain a thin a heng a si ahcun i siatsuah tengteng a tum ti na thei ding.

⁸I zaangfah hram awla ka hnenih Pathian hmin sal in thukamnak na tuah mi cu thlun hram aw. Sikhalsehla keimah lehlam ka mawh a si ahcun nangmah sawn in i that aw. Ziangah so na pa ih kut cun ka thih ding?” tiah a ti.

⁹Cutikah Jonathan in, “Cuticun a si lo pei. Ka pa in thah a lo tum ngaingai a si, ti ka theihfiang a si ahcun ziangtinso nangmah sim loin ka um thiam ding?” tiah a ti.

¹⁰Cule David in, “Na pa thinheng zetin a ṭong, ti cu zoso in sim sal ding?” tiah Jonathan cu a sut.

¹¹Jonathan in, “Hramlakah feh uhsi,” tiah a sawm. Curuangah hramlakah an feh.

¹²Cutikah David hnenah Jonathan in, “Israel ih BAWIPA Pathian cu in theihpitu si hram seh. Thaisun le tipsun atu tikcu ah hin ka pa cu thu ka rak sut ding. A thinlung na parih a ṭhat a si ahcun thu ka lo than ding.

¹³Asinain siatsuah a lo tum a si ahcun, ka lo theihter ding ih na rak tlan pei. Ka lo theihter lo ih siatsuahnak na tong a si ahcun Pathian in i that seh. Ka pa hnenih BAWIPA a rak um bangin na hnenah um ve hram seh.

¹⁴Cun ka nun hrih a si ahcun na thukamnak thianghlim cu hmunter awla ka hrangah rintlakmi si hram aw. Asinain ka thih ahcun,

¹⁵a kumkhua in ka innsang pawl hnenah na zaangfahnak run langter hram aw. Cun BAWIPA in na ral hmuahhmuah an ci a hmih thluh tik khalah,

¹⁶kan thukamnak cu ziangtik hmanah cat hlah seh. A cat asile BAWIPA in nangmah a lo mawhthluk ding,” tiah a ti.

¹⁷Jonathan in David cu a duhdawtnak thu a kam sal, ziangahtile amah le amah a duh-awk vek rori in Jonathan in David cu a duhdawt a si.

¹⁸Cule Jonathan in, “Thaisun cu Thla Thar Puai a si ih na tel lo ahcun na tokham a lawng ding ih na um lo a langzet ding.

¹⁹Na tel lo kha tipsun ahcun a lang sinsin ding. Curuangah kan dungih na thuh awknak hmunah khan va feh sal awla cutawkih lungkhon reprep phenah khan va relh aw.

²⁰Hmuibat bangin cutawk cu thal pathum in ka rak sai ding.

²¹Cule thal pawl hawl dingah ka hnen-um pa ka rak thlah ding. A hnenah, ‘Thal pawl cu na umnak ihsin hi lam kap ah an um; rak lak hai aw,’ ka ti a si ahcun na hrangah phan ding zianghman a um lo, na ra suak thei, tinak a si ding. Phan ding a um lo ti cu BAWIPA ih hmin in ka sim a si.

²²Sikhalsehla a hnenah, ‘Thal pawl cu na umnak ihsin khatlam kapah an um a si,’ ka ti ahcun rak tlan aw. BAWIPA in hmun dangih feh dingah a lo duh, tinak a si.

²³Kan karlak ih thukamnak kan tuahmi thu ahcun kumkhua ih ka hmun ternak dingah BAWIPA in a kimter ko ding,” tiah a ti.

²⁴Curuangah David cu hramlak ah a thup aw. Thla Thar Puai rawl ei-nak ah Saul siangpahrang cu a ra lut ih,

²⁵a to ṭheunak phar kiangah a to. A sangtu ah Abner a to ih, Jonathan cu cabuai ih khatlam kap, Saul ih hmaizawn ah a to. David ih tokham cu a lawng.

²⁶Asinain cuih ni ah Saul cun zianghman a sim lo, ziangahtile, “A thianhlim lonak thil pakhatkhat a um a si ding,” tiah a ruat.

²⁷A thaisun, Thla Thar Puai hnu ni khatnak ah, David ih tokham cu a lawng thotho. Curuangah Saul in, “Ziangah so mizan sun siseh, tuihsun siseh rawl einak ih David a suah lo?” tiah Jonathan a sut.

²⁸Cutikah Jonathan in, “Bethlehem ih feh dingah thungai thlak in i dil ih,

²⁹‘Ka sungkhat pawl kan khua ah raithawinak puai an tuah ih ka u pa in tel tengteng dingah i rak cah a si; curuangah ka rual ṭha na si ahcun i thlah hram awla ka sungkhat pawl ka va tong hai ding,’ i ti. Curuangah hi rawl einak ih a tel thiam lonak a si,” tiah a sim.

³⁰Cuih thu cu Saul in a theih tikah a thin a heng tuk ih, “Nang mihlotlau, raltho le rintlaklo nunau ih fapa! Jesse ih fapa David na ṭan a si tihi fiangten ka thei zo. Na nuih thang na siatter ih nangmah ih thang khal na siat-aw a si.

³¹David a nunsung hmuahhmuah cu hi ramih siangpahrang na si dah lo ding, ti na thei lo maw? Atu zamrangin va feh awla David cu hitawk ah va hruai aw - a thih a ṭul a si!” tiah Jonathan cu a kawk ciamco.

³²Cutikah Jonathan in, “Ziangah so a thih ding? Ziang so a sual?” a ti.

³³Cutikah Saul in Jonathan sunthat dingin a feipi a vun lak ih a khawh. Cuih hnu cun a pa in David thah tengteng a tum a si, ti cu Jonathan in feltein a thei.

³⁴Cabuai ihsin Jonathan cu thinheng zetin a tho ih cuih ni Thla Thar Puai a ni hnihnak ni cu zianghman ei loin a um. A pa Saul in David cu mualpho tukih a tuah ruangah Jonathan cun a ninghanpi ngaingai.

³⁵An tiam awk cia bangtuk in a thaizing ah Jonathan cu David tong dingah hramlakah a feh. Jonathan cun tlangval note pakhat a fehpi.

³⁶A cuih tlangval pa ih hnenah, “Ka sai ding mi thal pawl hi va tlan awla va hawl aw,” tiah a ti. Tlangvalpa cu a tlan ih Jonathan in thal cu hlatpi ah a sai.

³⁷Thal a tlaknak zawn a va thlen tikah Jonathan cu na pi in a au ih, “Thal cu hlatpi ah a um a si.

³⁸Khatawkah ding men hlah. Zamrang in feh aw,” tiah a ti. Tlangvalpa cun thal cu a sar ih a bawipa ih hnenah a thlenpi.

³⁹Asinain a tican zianghman a thei lo. Jonathan le David hrangah cun tican a nei thluh.

⁴⁰Cule li le thal pawl cu khawsungih hei fehpi dingah Jonathan in a tlangvalpa cu a pek.

⁴¹Tlangvalpa a feh hnuah a relhnak lungkhon phen ihsin David cu a tho ih leilung dai rori in voithum tiang a lu a kun. David le Jonathan cu an hnam-aw ih an ṭap veve. David ih riahsiatnak cu Jonathan ih riahsiatnak hnakin a zual sawn.

⁴²Cule Jonathan in, “Na hnenah Pathian um hram seh. BAWIPA in kan pahnih karlak le na tesinfa le ka tesinfa karlak ih BAWIPA ih hmin sal in thukamnak kan tuah mi cu kan hngetkhohter ringringnak dingah in bawm hram seh,” tiah David hnenah a ti. Cule David cu a feh ih Jonathan cu khawsungah a kir.