Read Falam Chin 1 SAMUEL 24 Bible Online

1 SAMUEL 24 - Falam Chin bible

1 SAMUEL 24

¹Filistin a donak ihsin Saul a rakir tikah David cu En-gedi kiang ramcaar lakah a relh a si, tiah an rak sim.

²Cutikah Saul in Israel ram ralkap lakih a ṭhabik mi thawngthum thawn David le a milai pawl cu Zaathar Khaam an timi hmun ihsin nisuahnak lamah an va hawl.

³Cutawk lamzin kiangah tuu hruang an um ih a cuih kiangah cun lungpuk pakhat a um. A cuih lungpuk sung deng bikah David le a milai pawl cu an rak thup aw. Saul cu cutawk lungpuk a thlen tikah pawngthawh dingin lungpuk sungah a vung lut.

⁴Cutikah David cu a milai pawl in, “Tikcu remcaangzet na ngah a si. Na ral cu na kut sungah ka lo pe ding, tiah BAWIPA in a lo ti bangtuk in a lo pe ngaingai a si ih a parah na duh vekin na tuah thei,” tiah an ti. Cule David cu a thupte in a vak ih Saul ih theih loin a kor fualpi ih zimte a tansak.

⁵Asinain Saul puanzim cutiih a tansak ruangah David cu a thin a nuam lo zet ih,

⁶a milai pawl hnenah, “Pathian in siangpahrang ih a hrilmi ka bawipa cu ka tuahmawh lonak dingah BAWIPA Pathian in i kil hram seh. Pathian ih hrilmi siangpahrang a si ruangah amah cu ka siatsuah hrimhrim lo ding,” tiah a ti.

⁷Cule David in a milai pawl cu Saul that lo dingin a sim. Saul cu a tho ih lungpuk sung ihsin a suak ih a feh.

⁸Cule David cun a hei thlun ih, “Maw siangpahrang,” tiah a hei ko. Saul cu a dunglet a ra hoi ih cutikah David cu upatnak thawn leilung ah a bok ih,

⁹“Bawipa, David in a lo that tum a si, tiah a lo simtu pawl ih thu cu ziangah so na zum?

¹⁰Tuih sunah lungpuk sungah nangmah cu BAWIPA Pathian in ka kut sungah a lo thlenter ti cu na mit rori in na hmu ko a si. Mi hrekkhat pawl cun nangmah that dingah in forh, asinain ka lo zaangfah ih Pathian ih hrilmi siangpahrang na si ruangah malte hman ka tuahmawh lo ding, tiah ka ti.

¹¹Zohhnik, ka bawipa, na korfual zimte ka kenmi hi! Keimah rori ih ka tanmi a si. Asinain ka lo that lo. Himi na hmuh tikah hin nangmah do dingah le siatsuah dingah tummi ka nei lo, ti hi theifiang ding na si. Nang cun that dingah i hawl rero naón kei cun zianghman ka lo ti dah lo.

¹²Zo sawn kan mawh ti cu BAWIPA Pathian in run rel hram seh. Nangmah cu malte hman ka lo tuahmawh lo ih nang cun i ral ruangah Pathian in lo cawh hram seh.

¹³‘Thil ṭha lo cu mi ṭha lo pawl in an tuah,’ ti ih ṭongṭhimnak cu na thei ko. Sikhalsehla kei cun ka lo tuahmawh hrimhrim lo ding.

¹⁴Cule Israel siangpahrang ih thah a tum rero mi hi zohhnik! A dawi vivo mi hi zohhnik! Uico ruak tluk fang a si. Uihli tluk fang a si.

¹⁵Zo sawn kan mawh ti kha BAWIPA Pathian in in zoh ding ih in relsak ding. Hi thuhla cu BAWIPA in in tawlrel sak seh; i ṭan sehla i run hram seh,” tiah a ti.

¹⁶Cutiih David in thu a sim ṭheh tikah Saul in, “Ka fapa David na si ngaingai maw?” a ti ih a ṭap.

¹⁷Cule Saul in David hnenah, “Nangmah na dik ih keimah ka sual a si. Ka parah na ṭhazet naón kei cu na parah ka sia ngaingai.

¹⁸BAWIPA Pathian in na kut sungah i ret naón i thah lo ruangah ka parah ziangtlukinso miṭha na si ti cu tuihsun ah na langter zo.

¹⁹Zo inso a ral khi a kaih hnuah himte in a thlah sal dah? Ka parih tuihsun ih na tuahmi ruangah hin Pathian in lo thluasuah hram seh.

²⁰Israel siangpahrang na si ding ih Israel ram na uknak cu a cat lo ding, ti cu atu ihsin fiangtein ka thei zo a si.

²¹Sikhalsehla ka hmin le ka innsang hmin cu hlo lo dingah, ‘Na tesinfa pawl cu ka zuah hai ding,’ tiah BAWIPA ih hmin in thu i kam aw,” tiah a ti.

²²A ti bangin David cun thu a kam. Cun Saul cu a inn ah a tlung ih David le a milai pawl cu an relhnak hmunah an kir.