Read Falam Chin 1 SAMUEL 26 Bible Online

1 SAMUEL 26 - Falam Chin bible

1 SAMUEL 26

¹Gibeah khua Saul hnenah Zif khuami hrekkhat an ra ih Judea ramṭhing kiangih tlang pakhat Hakhilah tlang ah David cu a relh a si, tiah an ra sim.

²Hmakhatte-ah Saul cu Israel ralkap lakih a ṭhabik ralkap thawngthum thawn Zif ih ramlak ahcun David hawl dingin an feh.

³Hakhilah tlang kainak lamzin ah Saul cu a riak. Cuih hramlak ahcun David cu a rak um lai ih amah hawl ah Saul a ra ti a theih tikah,

⁴David cun thlingthlatu a thlah ih Saul cu a um ngaingai ti a thei.

⁵Cutikah David cu a feh ih Saul le Saul ralkap pawl uktu Ner ih fapa Abner ih ihnak hmun rori kha feltein a zohhliah. Saul cu an riahnak laifang bikah a it ih a ralkap pawl cu a kimvel ah an riak.

⁶Cule David in, “Keimah thawn Saul riahnak ah zoso a feh ding?” tiah Hit mi Ahimelek le Joab ih unau Zeruiah ih fapa Abishai cu a sut. “Keimah ka feh ding,” tiah Abishai in a ti.

⁷A cuih zanah David le Abishai cu Saul ih riahnak ah an feh ih an riahnak laifangih Saul a ih kha an hmu. A lu kiangah a feipi tla leilung ih a phun-awk kha an hmu. Saul ih kiangkap ahcun Abner le a ralkap pawl tla an it that thluh.

⁸Cutikah Abishai in, “Tuihzan ah Pathian in na ral cu na kut sungah a lo pek. Amah ih feipi lala hin tlang koin ka vun sun pei. Voikhat sun a tawk ko ding, voihnih a ṭul hrimhrim lo ding,” tiah David cu a ti.

⁹Asinain David in, “Tuahmawh hrimhrim hlah aw. BAWIPA ih hriak a culh ciami siangpahrang a tuahmawhtu pohpoh cu hremnak tuar loin an luat lo ding.

¹⁰Amah ih thih caan kimih thi dingin, a si lo talle raldonak ih thi dingin BAWIPA in Saul cu a nunnak a cemter ko ding, ti cu a nungmi BAWIPA ih hmin sal in ka sim ngam a si.

¹¹Pathian in siangpahrang ih a canter mi tuahmawh ding cu BAWIPA Pathian in i siang hram hlah seh. A feipi le a tithawl lak uhsila feh uhsi,” tiah a ti.

¹²Cule David cun Saul lukiang rori ih a ummi feipi le tithawl cu a lak ih Abishai thawn an feh. Zohman in an hmu loih an thei fawn lo. A ṭhanghoi khal an um lo. Ziangahtile BAWIPA in an zatein ihhmuh thawzetin a ihthatter hai a si.

¹³Cun David cu hlat nawn a feh ih khatlam ral tlangpar a thlen tikah,

¹⁴“Maw Abner! I thei thei maw?” tiah Abner le Saul ih ralkap pawl cu a auh ciamco. “Cutiih siangpahrang a auh ciamcotu cu zoso a si?” tiah Abner in a sut.

¹⁵Cutikah David in, “Pacang na si, a si lo maw? Israel mi lakah mi nasa bik na si lo maw? Asinain ziangah so siangpahrang na bawipa cu ṭhatein na kil lo? Na bawipa that dingah tupekte ah nan riahnak sungah mi an lut.

¹⁶Abner, na ṭuanvo na ṭhelh a si! A nungmi BAWIPA ih hmin salin ka lo sim: thitlak na si; nan zatein thih tlak nan si. Ziangahtile BAWIPA Pathian in siangpahrang ih a cantermi nan bawipa cu ṭhatein nan kil lo. Zohhnik! Khuiah so siangpahrang ih feipi a um? A lu kiangih tithawl teh khuiah so a si?” tiah a ti.

¹⁷David ih aw cu Saul cun a theithiam ih, “David ka fapa, nangmah maw na si?” a ti. Cutikah David in, “Maw siangpahrang, keimah sokhaw ka si.

¹⁸Bawipa, ziangah so kei na salpa hi i dawi lai rero? Ziang bangtuk sualnak ka tuah ruangah so hiti ih in hual rero?

¹⁹Maw bawipa, ka thusim mi hi rak ngaihnik aw. Hitiih i ral hi BAWIPA Pathian ih a lo fial ruangah a si ahcun thawinak pe sehla a lung a ṭhum men ding. Asinain minung forhfialnak ruangah a si ahcun BAWIPA ih siatserhnak an parah thleng hram seh. Ziangahtile ramdang khawzing tiang be dingah in dawihlo ih BAWIPA in a miphun hnenih a pekmi ram sungih kei ka covo hmuahhmuah cu ka sung thluh zo a si.

²⁰BAWIPA Pathian a um lonak, miphun dang pawl ih ram sungah ka thisen luangter hram hlah. Uihli tluk fang a si mi kei hi nang Israel siangpahrang in ziangah so thah i tum rero? Hramlak vate an peel bangin ziangah so i peel rero?” tiah a ti.

²¹Cutikah Saul in, “Ka sual zo a si. David ka fapa, rakir sal aw. Tuihsun ih ka nunnak i zuah ruangah nangmah siatsuah ding cu ka tum nawn hrimhrim lo ding. Ka aa tuk lawmmam! Thil ka ti sual zo a si,” tiah David hnenah a ti.

²²Cule David in, “Maw siangpahrang, na feipi cu hinah a um. Na milai pakhatkhat rak thlah awla ra la seh.

²³Midik le rinsan tlak minung cu BAWIPA in an ṭhat man a pek a si. Nangmah cu tuihsun ah BAWIPA in ka kut sungah a lo ret a si. Sikhalsehla BAWIPA ih hriak culhmi na si ruangah zianghman ka lo ti lo.

²⁴Na nunnak ka sunloih ih tuihsun ih ka lo zuah vekin BAWIPA in ka nunnak cu sunloih in i zuah ve hramsehla, zonzaih harsatnak in i luatter hram seh,” tiah a ti.

²⁵Cutikah Saul in, “Pathian in lo thluasuah hram seh, ka fapa. Thil nasa zetzet na tuah pei ih na tuahmi kipah na hlawh a tling ding,” tiah a ti. Cuih hnuah David cu a feh ih Saul cu inn ah a tlung. S