Read Falam Chin 1 SAMUEL 27 Bible Online

1 SAMUEL 27 - Falam Chin bible

1 SAMUEL 27

¹David cu a thinlungte in, “Nikhat khatah Saul in i that leh ko ding. Ka hrangih a ṭha bik cu Filistin ramih tlanhlo a si. Cutiih ka tlanhlo ahcun Israel ram sungah Saul in i hawl nawn lo dingih ka him ding,” tiah a ruat.

²Curuangah David le a ralkap zaruk cu zamrangte in Gath siangpahrang Akhish, Ma-ok ih fapa, hnenah an feh.

³David le a ralkap pawl cu an innsang pawl thawn Gath ram ahcun an um. David cu nupi pahnih a nei: Jezreel khuami Ahinoam le Karmel khuami Nabal ih thihsan mi Abigail an si.

⁴David cu Gath ramah a tlan zo ti Saul in a theih tikah David hawl ding cu a tum nawn lo.

⁵Cun David in Akhish hnenah, “Na rualpi ngaingai ih i ruat a si ahcun ka umnak hrangah khua pakhat i pe ve aw. Siangpahrang nangmah thawn na khawpi sungih umtlang hi a mawi lem lo,” tiah a ti.

⁶Curuangah Akhish in David cu Ziklag an timi khua a pek. A cuihsan thokin Ziklag khua cu Judah siangpahrang ih ta a si ringring.

⁷Filistin ramah David cu kum khat le thlali a um.

⁸David le a milai pawl in a cuih ram sungih kum reipi a rak um zo mi Geshur mi, Girzi mi le Amalek mi pawl cu an do ṭheu. Izipt ram thleng tiangin an siim hai ṭheu ih,

⁹nunau siseh, mipa siseh, an that thluh ṭheu. Cun an tuu, an caw, an laak le an kalauk pawl an lak ih an hnipuan tiangin an long thluh. Cule Akhish hnenih a thlen sal tikah,

¹⁰Akhish cun, “Tuihṭum khui ram so na siim?” tiih a suh tikah David cun, Judah ram thlanglam kapah ka feh, a ti tawk; a si lole Jerahmeel miphun ramah ka feh, a ti tawk; a si lole Ken mi pawl umnak ramah ka feh, a ti tawk a si ṭheu.

¹¹David in nunau siseh, mipa siseh a that thluh ṭheu ih Gath ramah feh tahratin David le a ralkap pawl ih thil tuahmi va simtu dingah milai an um ṭheu lo. Filistin ramih a um sung hmuahhmuah David in cubangtuk in a tuah ṭheu.

¹²Asinain Akhish in, David cu a zumzet ruangah a thinlungte in, “Amah ih milai Israel mi pawl in an huat tuk ruangah a nunsung hmuahhmuah ka hnaṭuan in a um ko ding,” tiah a ruat.