Read Falam Chin 1 SAMUEL 29 Bible Online

1 SAMUEL 29 - Falam Chin bible

1 SAMUEL 29

¹Filistin mi pawl in an ralkap pawl cu Afek ah an khawm ih, Israel mi pawl cu Jezreel Phairawn ih cerhti kiangah an riak.

²Filistin lal panga pawl cu an ralkap zakhat rual le thawngkhat rual pawl thawn hmailam ah an feh zutzo ih David le a ralkap pawl cun dunglam ihsin Akhish thawn an thlun.

³Filistin ralbawi pawl in, “Hi Hebru mi pawl hi hitawk ah ziangso an tuah ve?” tiah an sut. Cutikah Akhish in, “Hi pa hi Israel siangpahrang Saul ih ralbawi David a si. Ka hnenih a umnak a rei nawn thlang. Ka hnenih a rathlen thokin tuihsun tiangah thilsual a tuahmi zianghman ka hmu lo,” tiah a ti.

⁴Sikhalsehla Filistin ralbawi pawl cu an thin a heng ih Akhish hnenah, “Hi pa cu umnak khua na pekmi ah kirter sal aw. Kan hnenah cun fehter hrimhrim hlah. Ziangahtile ral kan do tikah kanmah siatsuahtu kanmah ih ral riangri-ah a cang pang ding. A bawipa thawn an rem-awk salnak dingah cun kan ralkap pawl ih luhlohnak cu amah ih hrangah lamzin ṭha bik a si!

⁵Thungai ti ahcun, nunau pawl ih an laam phah ah: ‘Saul cun a thawng a sawm in a that; David cun a thawng a za in a that,’ ti ih hla an phuahmi kha amah David hi a sisi!” tiah an ti.

⁶Akhish in David cu a ko ih a hnenah, “A nungmi BAWIPA ih hmin salin ka lo sim: ka hrangah rintlak ngaingai na si ih ka hnenah feh tahratin ral do ve cila ka duh zet. Ka hnenih na rathlen thok ihsin na mawhnak ka hmu hrih lo. Asinain Filistin lal dang pawl in an lo duh lo.

⁷Curuangah daitein va kir aw; an thinhengnak ding zianghman tuah hlah aw,” tiah a ti.

⁸Cutikah David in, “Ziang so ka sual? Na hnen ka thlen ih na hna ka ṭuan thok ihsin, bawipa, ka mawhnak zianghman na hmu lo. Ziangah so ka bawipa le ka siangpahrang nangmah thawn ka feh lo ding? Ziangah so na ral pawl do loin ka kir men ding?” tiah a el ciamco.

⁹Akhish in, “David, nang cu Pathian ih vancungmi tlukih a felmi na si ti ka thei ko. Sikhalsehla Filistin ralbawi pawl in ral donak ah kan hnenah feh hlah seh, tiah an lo ti zo.

¹⁰Curuangah Saul siangpahrang taan tahratin ka hnenih a rami hmuahhmuah nan zatein thaizing khua a van vete in nan kir ding,” tiah a ti.

¹¹Curuangah David le a milai pawl cu Filistin ramih kir dingah a thaizing zingpit in an pok. Filistin ralkap pawl cu Jezreel lamah an feh.