Read Falam Chin 1 SAMUEL 30 Bible Online

1 SAMUEL 30 - Falam Chin bible

1 SAMUEL 30

¹Ni thumnak ah David le a ralkap pawl cu Ziklag khua an thleng. Amalek mi pawl in Judah ram thlanglam kap kha an rak ram ih Ziklag khua khal an rak lak ih meisa in an ur thluh.

²Nunau hmuahhmuah an kai ih, zohman an that lonain an zatein an hruai thluh.

³David le a ralkap pawl an va thlen tikah an khua cu a rak kang thluh zo ih an nupi le an fanu le an fapa pawl cu an rak hruaihlo thluh zo.

⁴David le a milai pawl cu ringzet in an ṭap ih an tha cem in an ṭah thei nawn lo tiangin an ṭap.

⁵David ih nupi pahnih Ahinoam le Abigail khal an hruaimi pawl lakah an rak tel ve.

⁶David cu vansanglam in a um. Ziangahtile a milai pawl ih faate pawl cu salih hruai thluh an si ruangah an thin a na ngaingai ih David cu lungto ih den an tum. Asinain a BAWIPA Pathian hnen ihsin thazaang cahnak a ngah.

⁷Cule David in Ahimelek ih fapa puithiam Abiathar hnenah, “Puithiam ṭaangthlaih kor cu i pe aw,” tiah a ti ih, Abiathar cun a pek.

⁸David cun BAWIPA ih hnenah, “In ramtu pawl cu ka dawi pei maw? Ka dawi asile ka kai hai pei maw?” tiah a sut. Cutikah BAWIPA in, “Dawi aw; na kai hai dingih an hruai mi pawl khal na runsuak ding,” tiah a ti.

⁹Curuangah David cu a ralkap zaruk thawn an pok ih Besor Tiva an thleng; cutawkah mi hrekkhat an taangta.

¹⁰A milai sung ihsin zahnih cu an baang tukih tiva an tan thei lo ruangah an taangta. David le a milai zali pawl in an dawi vivo.

¹¹Cule a milai pawl in hramlakah Izipt nauhakpa pakhat an sar ih David hnenah an fehpi. Ti le rawl an pek.

¹²Theirah car malte le an carmi sabit rah bawr hnih tla an pe. A ei hnuah a ṭamsawl cu a ṭha. Nithum sung zianghman in lo le ei loin a rak um a si.

¹³Cule David in, “Na bawipa zoso a si? Khuitawk in so na rat?” tiah a sut. Cutikah anih in, “Izipt mi ka si ih Amalek mi pa pakhat ih sal ka si. Ka nat ruangah hitawk ah hin ka bawipa in i taanta a si. I taannak ni thum a si zo.

¹⁴Kereth ram thlanglam kap hrawng, Judah ram thlanglam kap le Kaleb miphun pawl ih ram tla kan ram ih Ziklag khua tla kan ur thluh,” tiah a sim.

¹⁵David in, “A cuih miramtu pawl hnenah cun i hruai pei maw?” tiah a sut. Nauhak pa in, “Ka lo that hrimhrim lo ding ih na bawipa ih hnen khalah ka lo pek lo ding, tiah Pathian hmin sal in thu i kam a si ahcun ka lo hruai ko ding,” tiah a ti.

¹⁶Curuangah cupa in David cu a hruai. Amalek mi pawl in Filistin ram le Judah ram ihsin ral thilri an lakmi pawl cu a tam ngaingai ruangah, an aih ih zu an in, sa an ei, puai an tuah ih hmun kipah an darh-aw ṭheh.

¹⁷Culai ah David in a nam hai ih zingpit ihsin zanlam khawthim tiang a do. Tlangval zali cu kalauk an to ih an tlanhlo. Cupawl siarlo, pakhat hman luat loin an that ṭheh.

¹⁸Amalek mi pawl ih an kaihmi le an lakmi hmuahhmuah, amah ih nupi pahnih thawn a runsuak ṭheh.

¹⁹Zianghman a hlosuakmi a um lo. An fanu le an fapa pawl siseh, an thilri pawl siseh, David in a lak kirsal thluh a si.

²⁰Tuu le caw pawl khal a rual a rual in a ngah sal thluh. A milai pawl in ṭilva pawl cu hmaiah an khor vivo ih, “David ih ta an si,” tiah an au phah vivo.

²¹Cun David a thlun thei nawn lo ih Besor Tiva ih a taangta mi a milai zahnih hnenah David cu a va thleng sal. A cuih a milai pawl cun David le a ralkap pawl cu an rak hmuak ih David tla in an hnen a thlen tikah lungawi zetin cibai a buk hai a si.

²²Asinain David hnenih a feh vemi halhsik neimi le hawizawng lo mihlotlau hrekkhat pawl in, “Annih cu kan hnenih an feh ve lo ruangah thilri kan lakmi pawl hi kan zem hai lo ding. An nupi le an faale pawl hi la hai sehla feh ko hai seh,” tiah an ti.

²³Asinain David in, “Unaule uh, BAWIPA ih in pekmi thilri parah cutiin nan tuah thei lo ding. Amah in in kilkhawi ih mi ramtu pawl ih parah nehnak in pek.

²⁴Nan simmi cu zohman an lung a kim thei lo ding. Zozo khal bangrep tein co ciar ding a si. Thilri kan taanmi hnenih a rung taang mi khal in raldonak ih a fehmi co zat thotho in a co ve pei,” tiah a ti.

²⁵Cumi cu David in daanah a tuah ih Israel ramsungah atu tiangin an thlun dahta a si.

²⁶David cu Ziklag ih a thlen sal tikah ral hnen ihsin an lakmi thilri pawl hrekkhat cu Judah mi hotu, a rualpi pawl hnenah a kuat ih, “BAWIPA ih ral pawl hnen ihsin kan lakmi thilri malte laksawng ah kan lo ṭhen,” tiah a cah vivo.

²⁷Bethel ih a ummi, Judah ram thlanglam Ramah ih a ummi, Jattir peng khua pawl ih a ummi,

²⁸Aroer khua, Sifmoth khua, Eshtemoa khua,

²⁹Rakal khua, Jerahmeel miphun ih khua pawl, Ken miphun ih khua pawl,

³⁰Hormah peng, Borashan peng le Athak peng le,

³¹Hebron ram sungih a ummi khawsungmi hmuahhmuah hnenah a kuat. Amah David le a milai pawl an rak thlennak khua hmuahhmuah ah a kuat thluh.