Read Falam Chin 1 SAMUEL 31 Bible Online

1 SAMUEL 31 - Falam Chin bible

1 SAMUEL 31

¹Filistin mi le Israel mi pawl cu Gilbon tlang ah nasa zetin an do aw. Cutawkah Israel mi tampi an thi ih, a taangmi cu Saul le a fapa pawl thawn an tlan thluh.

²Filistin mi pawl in Saul le a fapa pawl cu an man ih a fapa Jonathan, Abinadab le Malkhishua pawl cu an that.

³Ral a luar vivo ih Saul cu conkiang in an ngah ih besia zetin an hriam.

⁴Curuangah Saul in a hriamnam kengtu tlangvalpa ih hnenah, “Hi serhtan lo Filistin pawl in dekcoknak menah in hman ih in thah ding hnak cun na ralnam zuuk awla nangmah in i that sawn aw,” tiah a ti. Asinain tlangvalpa cun a ngam lo. Curuangah Saul cun a ralnam zik zum a tluk cih ih a thi.

⁵Saul a thih kha tlangvalpa in a hmuh tikah anih khal a ralnam a zuuk ih a tlukcih ih Saul hnenah a thi ve.

⁶Cuticun Saul le a fapa pathum le tlangvalpa cu hmun khatah an thi. Cuih ni ah Saul ih milai pawl cu an thi ṭheh.

⁷Jezreel horkuam ralih a ummi le Jordan Tiva ihsin nisuahnak lamih a ummi Israel mi pawl in Israel ralkap pawl an tlan thluh ih Saul le a fapa pawl khal an thi thluh ti an theih tikah an khua pawl cu an taan ih an tlanhlo thluh. Cuih hnuah Filistin mi pawl an ra ih cuih khua pawl cu an ra luah.

⁸An do-awk ni ih thaisun ah a thimi pawl ih ralthuam la dingah Filistin pawl an feh ih Gilboa tlang an thlen tikah Saul le a fapa pathum ih ruak an ril teptep kha an hmu.

⁹Saul ih lu cu an tan hnuah a ralthuam pawl an lak. Cule a cuih thuthang cu an milem pawl le misenpi hnenih sim dingah Filistin ram khuazakip ah mi an thlah ciamco.

¹⁰Cun Saul ih ralthuam cu Astartes khawzingnu an biaknak inn ah an ret ih a ruak cu Bethshan khawpi kulhnak hauhruang parah an taar.

¹¹Filistin pawl in Saul ih ruak parih an tuah daan cu Gilead ramih Jabesh khuami pawl in an theih tikah,

¹²anmah lakih ralṭha bik pawl an pok ih zanvarte Bethshan khua ahcun an feh. Hauhruang parih sin Saul le a fapa pawl ruak cu an lak ih Jabesh khua ah an zawn ih cutawkah meisa in an ur.

¹³Cule an ruh pawl cu an lak ih an khawsung tuumkung hnuai ah an phum ih ni sarih sung rawl an ul.