Read Falam Chin 1 SAMUEL 8 Bible Online

1 SAMUEL 8 - Falam Chin bible

1 SAMUEL 8

¹Samuel cu a tar thlang ih curuangah a fapa tla cu Israel mi lakih thuṭhentu a ṭuanter.

²A fapa upa cu Joel a si ih a nauta cu Abijah a si. Beersheba khua ah thuṭhentu an si.

³Asinain an pa ih nuncan vekin an nung thei lo. Paisa ngahnak lawng an ruat ih curuangah nawhthuh tla an lak ih dingthluk lairelnak thawn thu an ṭhen lo.

⁴Cutikah Israel hruaitu pawl cu an tongkhawm aw ih Samuel hnenah Ramah ah an feh ih,

⁵a hnenah, “Zohhnik, nang le na tar zo ih na fapa pawl in na nuncan an thlun fawn lo. Curuangah miphun dang pawl ih an neih vekin in uktu dingah siangpahrang in pe aw,” tiah an ti.

⁶Cutiih siangpahrang an dil cu a lung a kim lo ruangah Samuel cu BAWIPA hnenah thla a cam.

⁷Cutikah BAWIPA in, “Na hnenih an simmi thu hmuahhmuah hi ngai ko aw. Nangmah an lo hnong a si lo. Keimah an siangpahrang in hnong sawn a si.

⁸Izipt ram ihsin ka suahpi ihsin thokin tuihsun ni tiangah ka hnen ihsin an tlan ih khawzing dangdang an bia ringring. Ka parih an tuah ringring mi atu na parah an tuah ve thlang a si.

⁹Curuangah an thu ngai ko aw. Asinain ziangvek in an siangpahrang in an uk ding, ti kimtein an hnenah sim cia awla ralrinnak tla feltein pe cia hai aw,” tiah a ti.

¹⁰Siangpahrang a diltu Israel mi pawl hnenah BAWIPA ih ṭongkam cu Samuel in a sim thluh.

¹¹An hnenah, “Hi vek in nan siangpahrang in a lo uk ding: Nan fapa pawl cu a ralkap ah a tuah ding; a hrek cu raldonak rangleng mawngtu ah an cang ding. A hrek cu a rang ralkap ah an cang ding. A hrek cu rangleng hmai ih tlantu ralkap an si ding.

¹²A hrek cu a ralkap thawngkhat uktu ralbawi an si dingih a hrekkhat cu ralkap sawmnga uktu an si ding. Nan fapa pawl hrekkhat cu a siangpahrang ih lothlotu an si dingih a lo sungih rawl khawmtu, a hriamnam tuahtu le a raldonak rangleng pawl ih thilri tuahtu an si ding.

¹³Nan fanu pawl a hrangah rimhmui an tuah a ṭul ding ih a rawl suangtu le a sangrawhtu tla an si ding.

¹⁴Nan lo lakih a ṭha bik, nan sabit hmuan lakih a ṭhabik le nan olif hmuan lakih a ṭha bik pawl cu nan siangpahrang in a lo lak sak pei ih a kuthnuai bawi pawl a ṭhen thluh ding.

¹⁵Nan khawmmi rawl le sabit sung ihsin ṭhenhra ṭhenkhat a lak pei ih a zung hnaṭuan bawi pawl le a bawi dang pawl a ṭhen thluh ding.

¹⁶Nan hnen-um pawl nunau siseh mipa siseh a lak ih tlunah nan caw le nan rang lakih a ṭha bik pawl a lak pei ih amah hrangih hnaṭuantu ah a tuah thluh ding.

¹⁷Nan ṭilva sung khalin ṭhenhra ṭhenkhat a lak ding. Nanmah khal a sal ah nan cang thluh ding.

¹⁸Cuvek tikcu a hung thlen ngaingai tikah nan lungtho ih nan hrilmi siangpahrang ruangah nan phunzai ciamco leh ding; asinain nan phunzainak cu BAWIPA in a lo theih sak lo ding a si,” tiah Samuel in a sim.

¹⁹Sikhalsehla Samuel ih thu cu an ngai duh lo. “Asilo, siangpahrang kan duh hrimhrim a si.

²⁰Kanmah ih siangpahrang in in uk dingih kan ral pawl donak ah in ho ding. Cuticun miphun dang bangtuk kan si ve ding,” tiah an ti thotho.

²¹Misenpi pawl ih simmi thu cu kimtein Samuel in a ngai ih BAWIPA a va sim.

²²Cutikah BAWIPA in, “An duh mi cu tuah ko awla siangpahrang cu pe hai aw,” tiah a ti. Cuih hnuah Israel mi pawl cu Samuel in an inn ciarah a tlunter thluh.