Read Fore Matiyu 1 Bible Online

Matiyu 1 - Fore bible

Matiyu 1

¹Wasana aiꞌaru aiꞌaru aboraurite kanauguna, Isu Karaisiti aeba Abaraꞌamuke, ae agaꞌnu Tebitike, isige tupisa aborantiye.

²Pigoya, Abaraꞌamu aepisa Aisaki aboraogana, Aisaki aepisa Yekobu aboraogana, Yekobu aepisa Yutabe to aꞌnatabarabe aborantawe.

³Pigoya, Yuta aepisa Peresebe Sarabe aborantase. Piya, Tema yakari puwaisitantiye. Pigoya, Perese aepisa Esoroni aboraogana, Esoroni aepisa Aramu aboraogana,

⁴Aramu aepisa Aminatapu aboraogana, Aminatapu aepisa Nasoni aboraogana, Nasoni aepisa Saramani aboraogana,

⁵Saramani aepisa Powasi aborantiye. Piya, Areyabu yakari potantiye. Pigoya, Powasi aepisa Obeti aborantiye. Piya, Aruti yakari potantiye. Pigoya, Obeti aepisa Yesi aboraogana,

⁶Yesi aepisa waꞌega Tebiti aborantiye. Pigoya Tebiti aepisa Soromoni aborantiye. Piya, Yuraya nkanarimpa yakari potantiye.

⁷Pigoya, Soromoni aepisa Ariyabomu aboraogana, Ariyabomu aepisa Abaisa aboraogana, Abaisa aepisa Esa aboraogana,

⁸Esa aepisa Yiyosapati aboraogana, Yiyosapati aepisa Yoramu aboraogana, Yoramu aepisa Asaya aboraogana,

⁹Asaya aepisa Yotamu aboraogana, Yotamu aepisa Eyasi aboraogana, Eyasi aepisa Esekaya aboraogana,

¹⁰Esekaya aepisa Manasa aboraogana, Manasa aepisa Emosi aboraogana, Emosi aepisa Yosaya aboraogana,

¹¹Yosaya aepisa Yekonayabe aꞌnatabarabe aborantawe. Piya puguni, Yuta kinapa Pebironi mari irakuꞌma ibabute wanta, pi kanabi aborantawe.

¹²Pigoya, igeba Pebironi umintuguna, piꞌna akaꞌi Yekonaya aepisa Siyatiyeri aborantiye. Pigoya Siyatiyeri aepisa Serababeri aboraogana,

¹³Serababeri aepisa Abayati aboraogana, Abayati aepisa Erayakimu aboraogana, Erayakimu aepisa Eso aboraogana,

¹⁴Eso aepisa Seroki aboraogana, Seroki aepisa Ekimu aboraogana, Ekimu aepisa Eriyati aboraogana,

¹⁵Eriyati aepisa Eriyesa aboraogana, Eriyesa aepisa Matani aboraogana, Matani aepisa Yekobu aboraogana,

¹⁶Yekobu aepisa Yosepe aborantiye. Aeba Mariya awaentana puntiye. Aibogana, Mariyaba Isu yakari potaogini, ae ageba: Karaisiti, Koti utaratanta yagarawe, untawe.

¹⁷Aborantapa pipa mayamawe: Abaraꞌamu aepisa agobima aborata kanauguna Tebiti aboranti, pi aꞌwaipa 14 puntiye. Piya, Tebiti aepisa aboraurite kanauguna Yuta kina Pebironi mari ibabute wanta, pi aꞌwaipa pabiyama 14 puntiye. Piya, pi kanabisa aboraurite kanauguna Karaisiti aboranti, pi aꞌwaipa pabiyama 14 puntiye. Mariyaba Isu yakari potantiye

¹⁸Isu Karaisiti aboranti, pi agowapa mayama waintiye: Mariyaba Yosepeka maekiyema utatauguna, kampa atokaema isiyota isiyota puma mintusuguna, Aota Awamusaꞌama Mariyati tumima aoꞌmaeyogana yagara agaꞌe pogini agantawe.

¹⁹Piya pogana, kana utatanta yagara Yosepeba arupu yagara miyomeka mayama napintiye: Naeba kamanaꞌwa pagusama otakana ani pusanaga uwa kakamagi kaikuwema, napintiye.

²⁰Piyama napima mintogana, Waꞌegawamatisa enisore kaꞌwaina amonta tumpa patama maya omintiye: Yosepe, kaeba Tebiti ntagaramaga, wayaka Mariya maekenagaba karuba a-po. Yagara agaꞌe pemipa, pipa Aota Awamusaꞌama esegi potama aboramiye.

²¹Pigoya, masinto yakari potakanaba, ae ageba: Isuwe, pipa kamanatepisa Tauꞌikena yagarawe, omo. Piya, aeba aokinaꞌwapa aguntaenawaipisa iꞌima aogi puwaitakiye.

²²Pigoya aꞌyaꞌwaemaena aborantikana, paipa poropete kaꞌwaina Waꞌegawama nkawamutasa maya kamana untiye: Abiyo. Ageꞌaragawae kaꞌwaina agaꞌe pumagina, masinto yakari pekiripa, agewapa Imanuweriwe ukibewe. Pipa kamanatepisa: Kotiba taege mintiye ukibewe, untiye. Poropete piya kamana unti, pi auꞌwa aborantiye.

²⁴Pigoya, Yosepeba awaibintisa aogamagina, enisorewama kamana omome pi wasimagina, anarimpa kayone potama ababuntiye.

²⁵Pigoya, wayaꞌwaenaba kampa puma mintusuguna yagaraba aborantiye. Piya pogana, Yosepeba ae ageba: Isuwe, omintiye.