Read Fore Matiyu 10 Bible Online

Matiyu 10 - Fore bible

Matiyu 10

¹Isu aeba abagi kina nagisarisa tara tumpaema kinaꞌwa igegaꞌe yogini ampa irosauguna, ke kina igaruba igaikenabe yonintana iki nakiyena ibome kina kaba itakibeka esegiyena imintiye.

²Pigoya, aposoro nagisarisa tara tumpaema kinaꞌmi nkigeba mayamawe: Marusa yagara Saimoni aoso agiwapa Pitawa, ae aꞌnanto Enturuwa, Sepeti ntagara Yemisiwa, ae aꞌnanto Yoniwa,

³Piripiwa, Patoromayowa, Tomasiwa, takisi maeyome ntagara Matiyuwa, Aopayesi ntagara Yemisiwa, Tariyesiwa,

⁴namuꞌisa kiya kina igarubakaikena abugai ntagara Saimoniwa, ainti Isu minagaꞌena punti ntagara Yutasi Isikeriyotiwa sumagini, abagi puntawe. Isu abagi kinaꞌwa yoga kamana uwaimintiye

⁵Pigoya, Isu abagi kina nagisarisa tara tumpaema kinaꞌwa ige uwaitama igarubantana maya untiye: Tigeba to marisa kinaꞌmitiba a-nkwaiyo. Sameriya kinaꞌmi kumatiba a-nkubasiyo.

⁶Isureyo tu, sipisipi kabuba wantasa puma miye kina, igeti mana waiyo.

⁷Wasanamiti uma irosantiripa maya uwaimiyo: Koti kabiratakena yagaba agarosaye, uwaimiyo.

⁸Piya, tigeba yoni kina kaba itaiyo. Puꞌwanta kinapa asiwaitaiyo. Karu kinapa aogi kaba itaiyo. Ke kinapa igaruba igasiyo. Piya, maeyantanaba ikantanarasa wanane. Uwa maeyasa puma tigeba ikantanaba a-mpaentiri uwa iyoꞌmaema aogi puwaitaiyo.

⁹Monebe tabebe uwaenantobe kapa a-nkiraꞌma maete waiyo.

¹⁰Kopa a-nkarakae piyo. Piya, tara kaibe tigisa anape pusuꞌma keꞌi nasikena wantape a-mpaete waiyo. Uwa tika nasiyo. Piya, yoga kinapa yogawaitasa nanintawaipa imegini maeyasa puma timigiri maeyiyo.

¹¹Pigoya, kuma pitaꞌi mataꞌi uma irosantiripa wasana ago igaiyo. Kaꞌwaina kayone puritama kaoꞌena puritakiripa, pabi ae namapi ima pabipi mima waimarate waiyo.

¹²Namankaipinti uma pasintiripa: Mono tigeti waiyema, uwaimiyo.

¹³Piya, kana namapisa kina aogima arupu puma miyiginaba, tigu paruyenamaba igeti wano. Piya, kampa aogima miyiginaba, pi paruyenaba tigetiti aꞌwae puma kanano.

¹⁴Piya, ka yagarama namankapinti kampa tibabute wama kamanati kamana abekiripa, wakibe ntagaba tigisarisa iꞌni aiwaka potate waiyo.

¹⁵Naeba taga urimukuwa, abiyo: Aintisa kanabipa Sotomu Komora kina tumimaena puwaitantana, maya kumatasa kinapa tabe kuntuyena aborawaimikiye. Aintiba toma toma kuntuyena aborakiye

¹⁶Abiyo. Sipisipi kabukarawama ige abakapintiba kampa uwaitakenaena naeba pi tigepa uritauwa, pika tigeba miyarinkama pemisa puma pasema aogimagiri napima nasiyo. Piya pupuntama pemisa puma aogima napima kamparagaena a-piyo.

¹⁷Tigeba wasanamika aogima kiya puma nasiyo. Igeba kamana uritakena namankaipinti tibabute wamagini, mono namankaipinti eru kasutasa tiyegukibewe.

¹⁸Pipa nanagawane. Tigeba nabagi kina mintaka uma tabe kiye kinatibe waꞌega kina igetibe tibaisusu purite wama kamana uritakibewe. Piya, tigeba ige iyobipe to marisa kinaꞌmi nkiyobipe esegima mono uma araiyo.

¹⁹Piya, igeba kamana uritakibepa: Aya kamana ukunemaba abima, tara taraba a-piyo. Pi ntagaba kamana ukena kamanapa Aota Awamusaꞌama napi napiyenaripi ataritakiye.

²⁰Piya puritakiri, kamana yiginaba tige kamana kantaba kampa pikiye. Tibarimpatisa Aota Awamusaꞌama tigupi mikibi, ae kamanaꞌena pikiye.

²¹Pigoya, pi ntagaba aganto kaꞌwainaba aꞌnantopa minaga pekini aegukibewe. Aba kaꞌwainaba yagarawapa pabiyama minaga pekini aegukibewe. Piya, yagara aragawaimpiba inogi ibagipa kamana uwaitama minaga pigini iyegukibewe.

²²Pigoya, nae nawaga kamanataka wasanamiba tigeka abima kama puritakibewe. Pigoya, kaꞌwainaba kampa natakibikana esegima mimagina kanaꞌwa aꞌya pekanaba, aintiba Koti ababikiye.

²³Pigoya, ka kumata uma irosaꞌma mintigini tiyeguma tigarubaigiripa, to kumati paiꞌma tiyegaka waiyo. Piya, naeba ubebema urimukuwa, abiyo: Aꞌyaꞌma Isureyo kumati yoga wairite wanti, pipa igiga puma mintigi, Wasanama Ntagara naeba tumpa irosakuwe.

²⁴Pigoya, abikena namapisa yagara kaꞌwaina tisawampa asu agaikenaenaba pipa kampa waintiye. Piya, kayokaya yagara kaꞌwaina pabiyama tabe yagarawa asu agaikenaenaba pipa kampa waintiye.

²⁵Piya, abikena namapisa yagara aeba tisawampa ae awameta pekanaba kanarasakiye. Kayokaya yagara aeba tabe yagarawampa ae awameta maema aborakanaba pabiyama aogi pikiye. Pigoya, tibatipa Piyesiburu, pipa ke kinaꞌmi tabewaimpawe unamekini, naokina tigepa pabiyamagini tabera kamparaga kamana uritakibewe, piya untiye. Wasanamaba Kotika aekuru peno

²⁶Pigoya, tigeba wasanamika a-tiyekuru piyo. Kakama waintintanaba pipa agorapa kampa kakama waikiye. Pipa aintiba aborakiye. Piya, airarikaegaintaꞌena waintipa, pipa agorapa kampa kakawakiye. Pabiyama aintiba apira puma aborakibewe.

²⁷Pigoya, tununtanabinti urimo kamanapa tigeba ara uwaimiyo. Piya, obina kamana abepa tigeba nama nkagari asu mimagiri kegaꞌe uma uwaimiyo.

²⁸Pigoya, aririꞌama aeguntini tigu tiꞌama aegukena aguyosagakibe kina igekaba a-tiyekuruba piyo. Piya, tigutipe ariripe kaga isibanakinisi agagabinti tumikena esegiyenawantaga yagara Koti, aeka tiyekuru piyo.

²⁹Pigoya, kisabentonto uwaena monentorasa ika pewe. Piya tibarimpaba kampa owe untakanaba ayamagina mabipa tumikiye. Pipa kampaye.

³⁰Piya, wasana tige tiꞌno nkabiyapa pipa aꞌyaꞌmagina aisuma abiwaeye.

³¹Pika tigeba tiyekuruyenabipa a-mpiyiyo. Tigeba kisabepa kampaye. Tigeba wasanarawe. Isu nkage uma aborakena kamanane

³²Pigoya, kaꞌwaina aeba nae nagene wasanami nkiyobi uma aborakapa, naeba pabiyamagi mantarisa nabanempa ae aobi uma aborakuwe.

³³To kaꞌwaina aeba wasanami nkiyobi kakanatakapa, aepa naeba pabiyamagi mantarisa nabanempa ae aobi kakatakuwe. Isuba maꞌena pikena aborantiye

³⁴Pigoya, tigeba naekaba: Aeba paruyena maema aborakena tumintiyeba, a-siyo. Naeba paruyena wanane. Maꞌena pikena kasontentaga tumintone.

³⁵Piya, naeba wasana atatara puwaitakena tumintone. Pika abage yagarawampage isigeba atatara pisigina, anoge aragawampage isigeba atatara pisigina, aentawampage anatuge isigeba pabiyama atatara pikibese.

³⁶Pigoya, kaꞌwaina aeba aokina igetisa yagarama kama potasanaga aborantone.

³⁷Piya, kaꞌwaina aeba abake anoke agu kaoꞌena tabera puwaisitantana naepa uwaenanto punatakibi, aeba nae naoꞌyagaraba kampa mikiye. Piya, kaꞌwaina aeba yagara aragawa agu kaoꞌena tabera puwaitantana naepa uwaenanto punatakibi, aeba pabiyama nae naoꞌyagaraba kampa mikiye.

³⁸Eya, kaꞌwaina aeba maripowa, pipa wasanami igobi punatantanaba kampa aesagabinta naegarakibiꞌnaba, aeba pabiyama nae naoꞌyagaraba kampa mikiye.

³⁹Piya, kaꞌwaina aeba mikenaenawaka owe yekanaba, aꞌyugu potakiye. Piya, naeka napima mikenaenawaka aꞌa-o yekanaba, aboramikiye, piya untiye. Isuka kayone pe kina aogi ikantana maekibewe

⁴⁰Pigoya, wasana kaꞌwaina aeba aogi puritaiꞌnaba pipa nae aogi punataye. Piya, nae aogi punataiꞌnaba Koti aogi potaye. We, ae unataoga naeba kanantokanane.

⁴¹Pigoya, kaꞌwaina poropete yagaraga: Koti nkaoꞌyagarawe, otama aogi potakibiꞌnaba, aeba poropete kinaꞌmi ige awameta ikantanaba maekiye. Piya, kaꞌwaina Koti aegaꞌma tagantana pe kina to kaꞌwainaka: Koti nkaoꞌyagarawe, otama aogi potakibiꞌnaba aeba tagantana pe kinaꞌmi ige awameta ikantanaba maekiye.

⁴²Ae abagi kinane, uwaitamagina, aogaso wani iruꞌma imikibiꞌna ikantanawapa aintiba kampa kaikiye, Isu piya untiye.