Read Fore Matiyu 11 Bible Online

Matiyu 11 - Fore bible

Matiyu 11

¹Isuba nagisarisa tara tumpaema abagi kinaꞌwa kamana piya uwaimiwaetate atate, to kumati mono uwaimirite wantiye.

²Piya pogana, Yoni wani paiꞌitanti ntagara aeba igaꞌna namapi mintana, Karaisiti yoga pome pi awaga kamana abite abagi kinaꞌwa uwaitaogini igeba wamagini,

³Isu maya uma abigantawe: Kaeba utaratanti ntagara Karaisiti kanakiye, untapa, kaebera to ka yagaraga agawa puma misunema, abigantawe.

⁴Piyama abigauguna, Isuba maya uwaimintiye: Tigeba aꞌwae puma wamagiri, agama abentanama kamana uma Yonipa omiyo. Pipa mayaenawe:

⁵Iyorika kinaꞌmiba iyo agawema, igisa iya puꞌwanta kina igeba keꞌi nasi nasi pewema, karu kinaꞌmi nkiꞌamaba aogi piyema, purinta kinaꞌmi iyo agawema, kusi kinaꞌmiba aogi kamana abewemagiri uma omintiri, to kapa mayama amato puma omiyo:

⁶Kaꞌwaina aeba naeka abima aekita kampa pikibiꞌnaba aeba aꞌmu pikiye, iyema omiyo, untiye.

⁷Piya uwaimogini, Yoni nkabagi kina igeba aꞌwae puma wauguna, Isu aeba wasana mintume kina Yonika maya uwaimintiye: Tigeba kaꞌme mpariba Yoniti wama, ayaena agakena wantawe. Misa ka ponta wama maete wate kanate pemisa pogiri agakena wantawa, a. Pipa kampaye.

⁸Wasana kawaina kaiwapa aogi awaꞌena purintogiri agakena wantawa, a. Pipa kampaye. We, wasana aogi kai pure kinaꞌmiba tabe kinaꞌmi ntamapi mintini iwaiba waintini pewe.

⁹Piya, poropete ka agakena wantawa, a. We, nae naeba urimukuwa, abiyo: Tigeba pi agama miye ntagara aeba poropete kaisa kina ige awametapa kampaye. Aeba to awametane.

¹⁰Piya, aeka mono isapisa kamana ka mayama waintiye:Abo. Kamanaꞌne maenta yagara agarubakana paitama kaori wama, kekapa aogi pikiyema, Koti untiye, iye.

¹¹Pika naeba ubebema urimukuwa, abiyo: Wayaꞌmapisa aboranta kaꞌwainaba Yoni wani paiꞌitanti ntagara aepa kampa againtikana, pigo Koti kabiratakena yaga aborakiniba nagora tumima miye kinaꞌnempiba Yonipa asugaikibewe.

¹²Pigoya, Yoni wani paiꞌitanti ntagara, ae yoga agobinti ntagaba Koti kabiratakenaenaba agobima agasiya puma aborantiꞌnaba aboraye. Pika esegi pe kinaꞌmi ige Koti kabiratakena kumapa maekena pewe.

¹³Piya, aꞌyaꞌma poropete kinaꞌmi kamanape Mosese ominti ago kamanape ke nasompentanaga kaeta kanantagana, Yoni aboraogana kamanaꞌwaimpa auꞌwa aborakena kanapa aborantiye.

¹⁴Pigoya: Iraiya aꞌwae puma kanakiyema unta, pipa tigeba Yonika: Iraiyawe, yiyo.

¹⁵Pigoya, ageyaga kinaꞌmaba ma kamanapa abibebe peno.

¹⁶Pigoya, mampabisa ae kinaꞌmita awame puritasuwe, a. Tigeba yagara araga ige awametane. Igeba kumati mima iyo kina maya uwaimewe:

¹⁷Ini yokiripa, nanaga waꞌenaba kampa pewe. Tantara ena pokiripa, nanaga kubeꞌenaba kampa pewe, piya yewe.

¹⁸Piya omesa puma Yoniba yogawa agobintanaba monoka kaꞌisa nanintabe waini wanipe kampa nama aꞌa-o uma miyogini agantiniba maya untawe: Aeba aiboꞌena piye, untawe.

¹⁹We, Wasanama Ntagara naeba tumima wanipe nanintabe naogiri, nagantiripa maya yewe: Aeba uwoma ntanintabe waini wanipe nayaba yagarawe. Aeba takisi maeya kinape aguntaena pe kinape ige iyoꞌyagarawema, naeka yewe. We, mono agowapa iguꞌama kintarama miye kinaꞌmi, ige aogima aegaragiri agawe, Isu piya untiye. Kaꞌisa marisa kinaꞌmiba atama mintanta kamanane

²⁰Pigoya, Karariya kaꞌisa kumati Isuba uwoma ntuga puma esegiyenawampa ago maema aboraogini agantiniba igupa kampa aꞌwae puguna, igeꞌma kamana maya uwaimima untiye:

²¹We Korasini, nantarane. We Petisaita, nantarane. Mebi, Tigeti kukantana tabera aboranti, pipa Taya Saironi kumata aborantisinta igeba intara puma karuꞌena augaꞌmagini igu aꞌwae puntasine.

²²Pika urimukuwa abiyo: Aintisa kanabipa Taya Saironi kina tumimaena puwaitantana, maya kumatasa kinapa tabe kuntuyena aborawaikiye.

²³We, Kapaniyamu kina, tigepa mantari tibabute ikibewa, a. Kampaye. Aintiba agagabinti tumikibewe. Piya, kukantana tige kumati aborantemisa puma Sotomu kumata aborantemisinta, ibabe aintibe Sotomuba uwa waiyesine.

²⁴Pika urimekiri abiyo: Aintisa kanabipa Sotomu kumatasa kina tumimaena puwaitantana, maya kumatasa kinapa tabe kuntuyena aborawaikiye, Isu piya untiye. Tigeba naeti kanamagiri migaraiyo, Isu untiye

²⁵Pigoya, pi ntagaba Isuba abawampa aꞌmu potamagina maya untiye: We naba, kaeba mantage mage tabe agowe. Abikenaenawaika abegana tabe pe kinapa kaka waigasane. Piya, iguꞌamaka abegana inamu kanta pe kinaꞌmipa iyakima imene, pika naeba naꞌmu pugataopa,

²⁶kaeba piyama aboraurite wagana penema, pipa uma esegi puntampene.

²⁷Pigoya, aꞌyaꞌmaena wainatantipa nabanempa nayapi atawaentine. Pika wasana kaꞌwaina yagarawa naeka agoneka kampa abibebe piye. Nabanempa abiwa abibebe piye. Piya, nabanempa ae agowaka pabiyama wasana kaꞌwaina kampa abibebe piye. Yagarawa nae nabinto abibebe puwe. Piya, yagarawa naeba wasana kaꞌwaina nabanempa nkago uma aboramekanaba aege abibebe pikiye, Isu piya untiye.

²⁸Piya ute to maya untiye: Pigoya, kuntaena aesagaꞌma tintaraꞌenabi mpiye kina tigeba aꞌyaꞌma naeti kanawaeyigi migarakenaena timekana paruribeno.

²⁹Piya, naeba nanta nagu paruyenanentaga mintoka, kanamagiri miminte tibota atama agonepa ampa abibebe piyo. Piya pigina tigu timankamaba migarano.

³⁰Pi kuntuyenaba tibota aesagatitaopa pipa aogiyenawe. Piya, pi timontana aesagabikibepa kuntaba kampa tibikiye, Isu piya untiye.