Read Fore Matiyu 12 Bible Online

Matiyu 12 - Fore bible

Matiyu 12

¹Pigoya, pi ntagaba Isuba abagi kinaꞌwapa paita itaogini sabatira witi yugabinti wantawe. Wantini abagi kina igeba igaꞌena ibogini witiba akima nantawe.

²Piya puguni, Parasi kinaꞌmiba igate Isu omima maya untawe: Abo. Kabagi kinaꞌmiba sabatira akumparantaꞌena peganaba ataena piye, untawe.

³Piya omuguna maya uwaimintiye: Tebitibe aokinaꞌmibe igaꞌena ibogini punta, pi kamanapa tigeba kampa aisuma abewa, a. We, tige abintawe.

⁴Igeba tabe mono namapinti iyogana pareti Koti nkamume pipa amigini maema nantane. Pipa aebe aokinaꞌmibe aꞌyuguba kampa nakibewema, mono kiye kinaꞌmi mana nakenawema, akumparantane.

⁵Pigoya, aꞌmuntana kaekena mono kina igeba yoga pumentanawaika Moseseba kamana kaenti, pipa aisuma kampa abewa, a. Pipa ago abintawe. Igeba sabatira yoga pumagini sabati ataena peweba asuwaitaiyo.

⁶Piya, naeba pika urimekiri abiyo: Tiyora asima minti, aeba tabe mono namapa asugasima mintiye.

⁷Pigoya kamana awaꞌena ka mayama waintipa, pi kapa tigeba abisanawa, kampa abewo. We, naeba kaema agunta abasakenaenagaba kampa nabiye. Kaoꞌena waintaga misanaga nabiye, Koti untiye. Tigeba pi kamana abima yesinta, kaintanawai kampa wainta kinapa ma uwa kamanapa kampa uwaitasine.

⁸Pigoya, Wasanama Ntagara naeba pi sabatirapa kabima miyuwe, Isu piya untiye. Isu sabatira ka yagara kaba atantiye

⁹Isu piya ute, pitasaba atate wama mono namankaipinti intiye.

¹⁰Pigoya, pitaꞌi ka yagara mintantiye. Aeba ayapa tagarakiwanta, mintogini wasanamiba Isu abigama maya untawe: Ma ntagaraba sabatirapa kanara kaba atakibepera kampaye, untawe. Piya, igeba uwaba kampa untawe. Kamanaꞌwa abite kamana otakena napimagini untawe.

¹¹Pigoya, Isu aeba iwamu aibatenama maya untiye: Tigetisa kaꞌwaina yagawa kabinti, sabatira tumekanaba sabatiraka uma kasakana uwa mikiyo. Pipa kampaye. Aeba aoꞌmaekiye.

¹²Yaga uwaena kinane. Wasana tigeba pi amantaga kinane. Pika sabatirapa wasana kanara aogi puwaitakune untiye.

¹³Piya ute kana yagarapa: Kayapa parosoma, omintiye. Piyama omogana, ayankasa pogana aibarutama aogi puma to ka aukaꞌisa ayankama waintomesa puntiye.

¹⁴Piya pogini, Parasi kina igeba pintana agate wawaemagini Isu nkaegukenaenaga nikintawe. Isu aeba taga Koti kayokaya yagarawane

¹⁵Pigoya, Isuba pi kamana abite pimpa kumapa mintantipa atate tori wantiye. Waogini uwoma kinaꞌmi aegaꞌma wauguna, yoni kinapa kabaꞌma aogi puwaitantiye.

¹⁶Pigoya, igeba to kaꞌisa kinapa: Nawaga kamana a-nkuwaimiyoma, tonkiya kamana esegima uwaimintiye.

¹⁷Piya pogana, Koti nkawamupisa kamana poropete Aisaya meto kamana kaemaranti, piꞌna auꞌwantagaꞌena mayama puntiye:

¹⁸Mapa kayokaya yagarane. Nae utamarantone, iye.Pigoya aewapa aogi yagaranene. Naeba aeka nabugaye, iye.

¹⁹Naeba Aota Awamusaꞌne aeta atakana aoꞌmaeyakana kamanaꞌne aꞌyaꞌma namuꞌisa kinapa uma aborawaima maema arupu pikiye, iye.Piya, aeba kaba kampa ibiꞌma, taberasa kampa uwaitakiye, iye.Piya, tabe kamanaꞌwapa keꞌiba kampa aborakini abikibewe, iye.

²⁰Pigoya, uwaena misankanto akaꞌyuwaintipa, aꞌyaꞌma kampa akaꞌyuwaisa pumagina ataenaba kampa puratakiye, iye.Piya kaꞌisa yagaba uwaena yakunkanto tamipa, kampa tuꞌma waikana, magi magi kinapa kampa ataba puratakiye, iye.Piya puma, esegima yoga pekana Koti kamanaꞌamaba aborama arupu puma aogi purite wagana pikiye, iye.

²¹Piya pekini, to marisa kinaꞌmiba aeka napinapima agawa pikibewe, Koti untiyema, Aisaya Isuka piya kaentiye. Isuba ke kina agaruba agasogini kamana otantawe.

²²Pigoya pi ntagaba ka yagara kewama aigaramagina aorikaema aiboꞌena puntiye. Aibogini, Isuti ababute wantawe. Piya puguna, Isu kabaꞌma aogi potaogana kamana uma ao agantiye.

²³Piya pogini, aꞌyaꞌma uwoma kina mintume kinaꞌmiba agate tabera pami pumagini maya untawe: Taeba napiyompepa Isuba Tebiti ntagara utaratanta Karaisiti kanta piye, untawe.

²⁴Piya yuguni, Parasi kina igeba pi kamana abite maya untawe: Kumparine, ke kinaꞌmi tabewai agewapa Piyesiburu, ae esegiyenawatasa ke kinapa agaruba igasaye, untawe.

²⁵Piya yuguni Isuba napi napiyenawai igate maya uwaimintiye: Ka marasa aokinaꞌmige kamaena pumagini kamparagaena pigina kaꞌme mpa aborakiye. Piya, to kumatisa kinaꞌmibe to namapisa kinaꞌmibe pabiyama aokinaꞌmige maꞌena puma ataena pigini nama kumaꞌwaipa akasabaꞌmagina ataena puwakiye.

²⁶Piya, Satani ke kinapa ayama agarubaꞌma kama potama agarubakiye, a. Pipa kampaye. Piya pekana aege maꞌena puma ataraisigina aꞌyaꞌwaemaenawampa kamparagaena pusanaga piyaba kampa pewe.

²⁷Piya, naekaba mayawe yewe: Aeba Piyesiburu aoꞌmaeyagina ke kinapa agaruba igasaye, yepa: Pigoya, kaꞌisa tiyokinaꞌmi igeba ke kinapa agaruba igasawe. Pipa ke iyoꞌmaema esegi puwaitagini pi ntugaba pewe, a. Pi ke kina Piyesiburu ae esegiyenarasaba kampaye. Piya, tiyokinaꞌmiba agaruba agoba agamagini, aintisagaba tigepa utaritakibewe.

²⁸Pigoya, naeba Koti Nkawamusaꞌama naoꞌmaeyagi ke kinapa agaruba igasoka, Koti kabiratakenaenaba tigetiba aboraye.

²⁹Pigoya, kewama esegi yagara kanta puma mintakanaba, ayamagina namankapintiba ima kotapa aparikiye, a. Pipa kampaye. Marupa pi esegi yagara arakuꞌma agisa aya kirokaetama pabigo kotankapa aisagakiye.

³⁰Pigoya, kaꞌwaina aeba kayone kampa punataiꞌnaba kama punataye. Piya, kaꞌwaina aeba yagarunte kampa ibabuma aki piꞌnaba aeba igarubaye.

³¹Pika urimukuwa abiyo: Aintiba kotiba aꞌyaꞌma aguntaenabe aꞌyaꞌma kamparaga kamana wasanami yepe kanara mae igaikiye. Pigoya, Aota Awamusaꞌama akayasotakibiꞌna, ae kaintanawapa Kotiba kampa maegaikiye.

³²Wasanama Ntagara nae uma kamparaga punatakibiꞌna, aepa aguntaenawapa uma asuꞌa pogaikuwe. Piya to kaꞌwaina aeba Aota Awamusaꞌama uma kamparaga potakibiꞌna, ae kaintanaba mabipe mantaribe kampa uma asuꞌa pogaikuwe, Isu piya untiye. Ata yawamaba kamparaga yamanka aeye

³³Isu piya untana to maya untiye: Pigoya tigeba ka yawama nkaꞌwakaba: Aogiyenawe, untiri, kana yawaka kaga: Aogiyenawe, yewe. Piya, to ka yawama nkaꞌwakaba: Kamparagawe, untiri, kana yawakaba kaga: Kamparaga yawe, yewe. Piya, yawama nkapa agamagiri, agowaka aogima napikibewe.

³⁴We, kuyawama ntagara, tigeba agunta kina mintawa, aogi kamanapa kapa nanawe ukibewe, a. Pipa kampaye. Tigupi waintintanaba pabiyama tiwamupisa irosaye.

³⁵Pigoya, aogi aguꞌyaga yagaramaba aogiyena aborakiye. Kamparaga aguꞌyaga yagaramaba pabiyama kamparagaena aborakiye.

³⁶Naeba urimukuwa abiyo: Kamparaga kamana toma toma se, pi kamanapa Koti aꞌyaꞌma kina pako pikibi ntaga ibigakini, kamana yigina uritakiye.

³⁷Piya, aintiba kaeka kamanataka kababikibe, pabi kaeka kamanatakabaya katakiye, Isu piya untiye. Kaꞌisa kinaꞌmi: Kukantana peka agakune, untawe

³⁸Piya uma uwaimogini, mono tisa kinape Parasi kaisa kinaꞌmibe maya kamana aꞌwae pumagini omintawe: Tisa, kaeba kukantana ka pega agano, untawe.

³⁹Piya yuguna maya uwaimintiye: Monoꞌwai kampa waima antage kinaꞌmitaba, tigeba kukantanagaba yewo. Tigeba kukantanaba aosoꞌenaba kapa kampaye. Yonati aborantisa puma pabiyama aborakiri agakibewe.

⁴⁰Yona aeba kakaga yaga tabe inoyantawama nkantabaipinti mintantisa pumagi, Wasanama Ntagara naeba pabiyamagi ma antabaipinti kakaga yaga mikuwe.

⁴¹Ainti Koti aꞌyaꞌma kina pako pikibi ntagaba Niniba kumatisa kina aborama mamparisa kinaꞌmi kamparaga kamanati uma abora uritakibewe. Pipa uwaba kampaye. Niniba kumatasa kina igepa Yona aeba wasanarakaꞌyankama igeꞌma kamana uwaimogini abima igu aꞌwae puntaka, piya ma minto naeba Yona ae awametapa kampaye. Pipa asugasima mintogiri, pabi ntaga tigeba kampa piyama aꞌwae pigina pi Niniba kina uritakibewe.

⁴²Piya, mare takaerisa tabe wae aeba pabiyamagina aꞌyaꞌma kina pako pikena yagaba ma mpabisa kinaꞌmiti kamparaga kamanati abora uritakiye. Pigoya pipa uwaba kampaye. Pi kana waepa aeba atuti wama Soromoni aetisa mono abintiye. Piya, ma minto naeba Soromoni ae awametapa kampaye, pipa asugasima mintuwe, Isu piya untiye. Ke kina to kake aꞌwae pumagina kanakiye

⁴³Piya untana, Isu to maya untiye: Kewamaba wasanaba atate wama kaꞌme mpari umima, maru kumakaba aguyosagakiye. Aguyosakate maya ikiye:

⁴⁴Namantepa atate kanantoka, pitaꞌi to kake aꞌwae pumagi wakuwe. Piya ute aꞌwae pumagina agakibipa, kana namapa paga pumagini aogi pugaintane.

⁴⁵Piyaena agate wama ke aokina tonaentisa tara umaema kina to kake kamparagaena pe kina ibabekini kanama pabi ntamapi ampikibewe. Aibigina pi ntagara aeba paipa kampa aogi yagara mintantiꞌnaba aintiba tabera kampa aogimagina ata puwakiye. Mamparasa kamparaga kina tigetiba pabiyaena aborakiye, Isu piya untiye. Isu ano aꞌnanto ige kamanane

⁴⁶Pigoya, Isu aeba wasana mono uwaimima mintogini, ikaꞌi anobe aꞌnatabarabe kamana omikena ampa agawa pumagini mintantawe.

⁴⁷Piya puguna, kaꞌwaina igate maya omintiye: Kanobe kaꞌnatabarabe kamana ugamikena takaꞌi kagawa pumagini mintawe, piyama omintiye.

⁴⁸Piyama omogana Isu maya omintiye: Nano naꞌnatabaraga yewo, untiye.

⁴⁹Piya ute abagi kinaꞌwa mintumeti aya nkasa pumagina maya untiye: Igaiyo. Nano naꞌnatabaragi maye, untana:

⁵⁰Mantarisa nabanempa nkawamu wasima aegara kina pi ige nano naꞌnanto namanaꞌmaba mintawe, Isu untiye.