Read Fore Matiyu 13 Bible Online

Matiyu 13 - Fore bible

Matiyu 13

¹Pigoya, pabi ntaga Isuba namapintisa irosaꞌma wamagina kotu kepari umintantiye.

²Umintogini, wawaya uwoma kinaꞌmi ampa irosaꞌmagini aki puguna, igate to ka wanipisa karebi intiye. Imagina aeba wanipisa karebi mintogini uwoma kina igeba kepari mintantawe.

³Piya puguna, meto kamana toma toma uwaimintana, kapa maya untiye: Abewo. Ka yagarama aintana pikena wantiye.

⁴Wama uma aibarase pogana aowa kaꞌisaba kepi tumpa waintantiye. Aibogana, kabarankama irosaꞌma ampa nawaegaintiye.

⁵Piya aowa kaꞌisaba yabankama nkabobori uwaena manto waintometa tunkwaima, karuꞌena irantiye.

⁶Piya pogana abuꞌwapa tumomepa inata araꞌwaiyogana pa taogana asama pari puma puꞌwantiye.

⁷Piya kaꞌisa aowapa kabubinti tunkwaima iraogana kabuwama aibarusa pogana asa wantiye.

⁸Pigoya kaꞌisa aoba apa mabi tumpa waimagina anonkapa uwoma aborama aosa pama kaꞌisa 100-wa, to kaꞌisa 60-wa, to kaꞌisa 30-wa, suma aboraogana uwoma ntaninta waintantiye.

⁹Piya, ageyaga kinaꞌmaba ma kamanapa abibebe peno, Isu piya untiye. Isu meto kamanaka uwaimintiye

¹⁰Kamana piya umagina uwaimogini, abagi kinaꞌwa igeba agora wamagini abigama maya untawe: Kaeba nanaga meto kamanapa uwaimene, untawe.

¹¹Piya yuguna, aeba maya uwaimintiye: Kakamagina Koti kabiratakena kamana waintemipa, pipa tigemana abikibewema untine. Pigoya, kaꞌisa uwoma kinaꞌmiba kampagini abikibewe, untine.

¹²Pigoya kaꞌwaina aeba mono amintaꞌena maemagina miyekanaba aintiba Kotiba to kake amekana uwomantana aboramikiye. Piya, to kaꞌwaina mono amintaꞌena kampa aogima maema miyekanaba apaꞌurekana uwa mikiye.

¹³Igeba iyo maꞌmaginiba kampagini agabebe pewe. Igerasa abintiniba kampa aogima abibebe pewe. Piya, agowapa kampa abeka ma kamana meto kamanatasa uwaimuwe.

¹⁴Pigoya, igeka Aisaya meto kamana mayama kaenti, piꞌna esegi piye:Igerasa uwa abintiniba igutasaba kampa aogima abibebe pikibewe, iye.Piya, iyorasaba agantiniba kampa aogimagini agabebe pikibewe, iye.

¹⁵Ma mparasa kina igepa iguꞌama esegi puwama ige akumpagini, iyorika pewe, iye.Pika iyowamaba kampa aogimagina agabebe pikiye, iye.Igewamaba kampa aogima abibebe pikiye, iye.Piya, iguꞌamaba kampa aogima napikiye, iye.Piya pumagini iguꞌkampa aꞌwae pigipa ayamagi naeba aogima kaba itakuwe. Pipa kampaye, Koti unti kamana Aisaya piyama kaentiye.

¹⁶Pigoya tigeba tiyoyaga mintiri, tigeyaga mintawa, pika tiꞌmuntanabi mpintawe.

¹⁷Naeba ubebema urimukuwe: Poropete kina mono kina uwoma kinaꞌmi igeba tige abima agantana pi agakenagaba ibugagate itaogini, uwa kampa agama abintane, Isu piya untiye. Aintana asigikena kamana ago uwaimintiye

¹⁸Piya untana, Isu to maya untiye: Pigoya, ma aintana asigikena kamana urimo kamana, piꞌna nkagowa uma aborarimekiri abiyo:

¹⁹Aꞌyaꞌma kina koti kabiratakena kamana abimagini aogima kampa igupi napikibe kina igeti Satani irosaꞌma aintana asigimarantapa maerite wagasaye. Pi ntagara aeba kepi aowa tumpa waintanti pi nkawametane.

²⁰Pigoya yabankama nkabobori tumpa waintantisa nkawameta piyamagini miye kina igeba mono abimagini pabigo iga ibegini napimagini miyewe.

²¹Igupipa abupa kampa panta inata araꞌma miyewe. Piya pegana aogi kamanaꞌneka maꞌena pumagini ataena piginaba ae abintemi kamana agaro kaikiye.

²²Pigoya, kaꞌisa aowa kabubinti tumpa waintanti, pi nkawameta miye kinaꞌmiba mono abimagini mintagana, mampabisa kuntaenagabe mone kutakabe napi napima miyekana, igaenama iguꞌama maema aꞌyugu puwaigasakini pabigo monoꞌama nkauꞌwapa kampa aboraye.

²³Pigoya, apa mabi tumpa waintantisa pi nkawameta mikibe kinaꞌmiba mono abimagini igutasa maemagini miyewe. Piya pegana, kaꞌwainatiba auꞌwapa 100-wa, to wainatiba 60-wa, to kaꞌwainatiba 30-wa, suma aboraye, Isu piya uwaimintiye. Yogabinti yoni tagakena meto kamana untiye

²⁴Piya untana, Isuba meto kamana to ka maya uwaimintiye: Ka yagarama yogawati aogi aintana aowa asigitanti, aeta Koti kabiratakenaenaba awame pukuwe.

²⁵Pigoya kana yagara aeba aintanaba asigitate waogana aseka kama yagarawampa kanamagina yoni nkaosa maemagina aibarase pugaite wagaintiye.

²⁶Pigoya, kana aintana pumaraomepa iꞌmagina nakena aborakena pogana yonipa kaga tarage uma irantiye:

²⁷Piya pogini, kayokaya yagara igeba agate yogawama nkabapa omima maya untawe: Tabe yagarare, kaeba yogagatiba aogi aintana asigimarantampepa, aetasabaya yonipa tagayema, abigantawe.

²⁸Piyamagini abigauguna maya untiye: Pipa kama kina kaꞌwaina asigimarantegina tarage uma iraye, yogini, igeba abigama maya untawe: Abintaga, wama uma iꞌma maebugasano, untawe.

²⁹Piyama yuguna maya uwaimintiye: Kampaye. Tigeba yoni igintiri kaga nakenaena igisanaga uwa ataiyo.

³⁰Nakenabe yonipe kaga waimaginisi aborakibese. Pigoya, nakena maekena yaga aborakapa, yoga kina uwaimekini igeba marupa yoni kibiꞌma iꞌmagini asaema yakupi kaentini, nakena aintanaba maemagini namantepinti ataigina waikiye, untiyema, Isu piya untiye. Masitetige yisitiwamake meto kamanane

³¹Pigoya, meto kamana ka maya uma uwaimintiye: Koti kabiratakenaenaba masiteti aꞌwanto piyamawe. Wasana kaꞌwaina aowa yogawati metantiye.

³²Kana yamankapa to kaꞌisa yamanka piyama wanane. Aeba uwaenantowe. Kana yaba iꞌmaginaba kaꞌisa nakena yawamapa igasimagina tabe yaena piye. Piya pegina, kabarankamaba kanama amarapa ampa mima inapa kiyewe, untiye.

³³Piya untana, meto kamana to ka maya uwaimintiye: Koti kabiratakenaenaba yisitiba piyamawe. Ka waeꞌma yisiti maemagini paretibinti paigu pekanaba, pi pareti anosama igaena tabera pukiye, Isu piya untiye. Isuba meto kamanaꞌamana untiye

³⁴Pigoya, Isu aeba wasana kamana uwaimintintanaba pi meto kamanaꞌamana uwaimintiye. Kamana auꞌwapa kampa aboramagina uwaimintiye.

³⁵Piya pogana, poropete yagara kaꞌwaina kamana abima mayama kaenti, piꞌna esegi puntiye: Nawamupipa meto kamanaꞌamana aboraka ukuwe. Piya, ma aborantemitasa kakanta kamana wairite kanama agowapa ampaema aborakuwema, Isu piya untiye. Yogabinti yoni tagakena meto kamanaꞌama nkagowane

³⁶Pigoya, Isuba pi aꞌyaꞌma kina itaogini wauguna namapinti intiye. Ima mintogini abagi kina igeba aeti wamagini omima maya untawe: Witi yugabinti yoni taganti pi kamana ago kaeba yega abeno, untawe.

³⁷Piya umagini abigauguna maya uwaimintiye: Wasana aogi aintana asigiyemipa Wasanama Ntagara naewe.

³⁸Yogaba pipa aꞌyaꞌma marisa kinane. Aogi aintanaba pipa nae monota miye kinane. Yoni nkaosa asigintemi, pi kinapa kewama nkaokinane.

³⁹Pigoya, pi yoni nkaosa asigintemi ntagara, aeba Sataniwe. Piya, witi maekena yagaba pipa ainti tabe kanawe. Naninta maema akibikena kinapa enisore kina igewe.

⁴⁰Pigoya, yoni iꞌma yakupi kaeyasa pumagina, ainti tabe kanabipa aborakiye.

⁴¹Piya, aintiba Wasanama Ntagara naeba enisore kinaꞌne uwaitakini maga maga naokinaꞌne igetisa naegarakenaenawaipa ata puwaitakenaenabe agunta pe kinape kibiꞌma,

⁴²tayaba yakupi itakini tumpikibewe. Pitaꞌi tumpimagini kubeꞌena pumagini iwarasa kaki aema mikibewe.

⁴³Pigoya, pi ntagaba arupu kina igeba mantarisa ibawaimpa ae kumata pa nkeꞌwasaena piyaenama eꞌwasa puwaitakiye. We, ageyaga kinaꞌmaba ma kamanapa abibebe peno, Isu piya untiye. Wasanama mone pogisi abatama maenti meto kamanane

⁴⁴Pigoya, Isu toba maya untiye: Koti kabiratakenaenaba piyamawe: Mone pogisi yogari kakataogana waintantiye. Piya waintogana, kaꞌwaina uma abatamagina to kakantiye. Piyamagina tabera aꞌmu pumagina aꞌyaꞌwaemaenawapa to kina imogini mone amuguna wama yoga uma ika puntiye, Isu meto kamana piya untiye. Tabe ikantana pasesuwama mpeto kamanane

⁴⁵Pigoya Koti kabiratakenaenaba ka yagarama yoga pumagina pasesuga aguyosaganti, ae piyamawe.

⁴⁶Aeba aogi pasesu agategina, wama aꞌyaꞌwaemaenawapa maema wasana imima mone maeritegina wama aogi pasesu uma ika puntiye, Isu piya untiye. Kukoꞌama mpeto kamanane

⁴⁷Pigoya, Isu to ka meto kamana maya untiye: Koti kabiratakenaenaba kuko piyamawe. Wasanami kuko wanipinti motagana tumegini inoyantaba toma toma ampa paiꞌma awaitaye.

⁴⁸Piya pegini, paibegana uwa mari iyegini kana inoyantaba pako pumagini nakenaba tuꞌnapi atantini kampa nakena inoyantaba uwa kasagana waye.

⁴⁹Pigoya, aintisa kana mampa aꞌya pekanaba pabiyaena aborakiye. Piya pekini pi ntagaba enisore kinaꞌmi maga maga nasi nasi pumagini, aogi kinaꞌmi abakapintisa agunta kinapa kibiꞌmagini,

⁵⁰tayaba yakupinti ipasanaigini tumikibewe. Pitaꞌi tumpima kubeꞌena pumagini iwarasa kaki aema mikibewe, untiye.

⁵¹Piya untana, Isuba abagi kinaꞌwa ibigama maya untiye: Tigeba aꞌyaꞌma ago abibebe pewa, a, untiye. Piya yogini, igeba: Ago abune, untawe.

⁵²Piya yuguna aeba maya uwaimintiye: Pigoya, mono tisa kinaꞌmi Koti kabiratakenaenama nkagoba abinta kina, igeba mono abikenaena uwaena waintiye. Piya, wasanama aotasaenawatasa tonarona maema aboramisa puma, igeba mono abikenaenawaipisa tonarona aogi paisaenabe kasasaenabe maema napimagini aboraramewe, Isu piya untiye. Nasareti kumatasa kinaꞌmi Isu ikabitantawe

⁵³Pigoya, Isuba meto kamana toma toma uma aꞌya atate, mawati wantiye.

⁵⁴Wama mono namapi imagina kamana yogini, wasanamiba abite pami pumagini maya untawe: Aetasabaya ma aogi napiyenabe awameꞌena potakena esegiyenabe maeye.

⁵⁵Taeba agowapa abintune. Aeba kapenta yagarama ntagarawe. Anowampa ageba Mariyawe. Piya, aꞌnatabarami nkigewaipa Yemisiwa, Yosepewa, Saimoniwa, Yutasiwa sumawe.

⁵⁶Pigoya amanaꞌnatabaraba taege kaga mintawe. Pigoya aeba aꞌyaꞌwaemaenaba aetasa maemagina aborantiye, untawe.

⁵⁷Piya umagini aeka abuguna kampa aogi puntiye. Aibogana, Isu maya uwaimintiye: Koti unti kamana yemi poropete yagarama kamana uwoma kinaꞌmi ibugaye. Piya, mawatape agowatape namankapipe ageba kampa waintiye, untiye.

⁵⁸Piya, igeba aeka kampa aogima ntapiyumeka, Isuba kukantanaba uwomapa pi kumatapa kampa puntiye.