Read Fore Matiyu 15 Bible Online

Matiyu 15 - Fore bible

Matiyu 15

¹Pigoya, pi ntagaba Yerusaremi kumatisa Parasi kinape mono tisa kinape kaꞌisa Isuti ampa irosaꞌmagini mayama abigama untawe:

²Kabagi kina igeba nanaga tayabamagi meto kamana agoba aemita pewe. Piya puntini igeba naninta nakenaba, iyantanaba kampa punta uwa nawe, untawe.

³Piya ute abigauguna, Isuba maya uwaimintiye: We, tigeba pipa nanaga tigeti mpeto kamana ago wasintiri, Koti aeꞌwa nkawamupisa kamanapa aemita pewe.

⁴Piya, Kotiba mayama utantiye: Kaeba kano kaba kamana abimagina isiꞌwaisipa asagaꞌyuyo, iye. Piya, kaꞌwaina aeba anoke abakega kamparaga kamana uma ata puwaisitakibipa, aepa aeguma kaiyo, untiye.

⁵Pigoya, tigeba pipa aya pewe. Yagara araga igeba inogi ibagipa maya kamana uwaimewe: Nautasaenaba mapa tisigepa kampa tisiminta, tabe mono namapinti maete ima Kotiti aꞌmuntana amukuwe, piya umagini, inogi ibagi kampa aogima iyoꞌmaeyagiripa, tigeba abeganaba aogi piyo.

⁶Tigeba piya pumagiri Koti kamanapa aemita puntiri tigeti kamanapa maema wasima asagaꞌyuyewe.

⁷We, kumpari kina, tigeka Koti Aisaya omogana meto kamana ago mayama taga untiye:

⁸Ma kinaꞌmiba iwamutasaba nae nage asagaꞌyuntini, iguꞌamaba pagasara miyewe, iye.

⁹Naeti monoꞌwaipa kampa yewa, uwaba yewe, iye.Piya, nae kamanaꞌnepa kampa unta, wasanami kamana yewema, Koti iyema, kaentiyema, Isu piya untiye. Agu yagara iꞌnintana potakena kamanane

¹⁰Pigoya, Isu aeba pi kamana uwaimite to kaꞌisa kina igegaꞌe yogini kanauguna maya uwaimintiye: Naeba kamana urimekiripa aogima abima napiyiyo.

¹¹Tintabaipinti tumemintana, piꞌnaba tiguꞌamapa iꞌnintanaba kampa potaye. Tiwamupintisa irosaꞌma iyemintana, piꞌna tiguꞌamapa iꞌnintanaba potaye, untiye.

¹²Piya yogini, abagi kina igeba agora wamagini maya omima untawe: Kaeba kamana uwaimekini Parasi kina abimagini ata pepa abeno, untawe.

¹³Piya yuguna, pi Parasi kinaka maya uwaimintiye: Aꞌyaꞌma yaba mantarisa nabanempaba kampa kurinti, pipa abuꞌyaga igima maebugaikiye.

¹⁴Piya, tigeba igepa uwa itaiyo. Igeba iyorika kinaꞌmi to kaꞌisa iyorika kina ke iyakikena kinane. Piya, ka aorika yagarama to ka aorika yagara ke ayakikibipa kaga agagabi tumikibese, untiye.

¹⁵Piya yogana Pitaba Isu maya omintiye: Meto kamana yempeꞌna nkagoba aborama yega taeba abeno, untiye.

¹⁶Piya yogana Isu maya untiye: We, tigeba pabiyama tigu napi napiyena kampa wainta mintawa, a.

¹⁷Agoba mayamagiripa kampa abewe: Tiwamupi nagana tintabaipinti tumimagina ayasaurite keꞌwati to kake tumiye.

¹⁸Piya, tintabaipinti waintana tiwamupisa irosai, piꞌna tiguꞌamapa iꞌnintana pumagina kamparaga potaye.

¹⁹Piya, wasana antabaipintisa aguntaena toma toma irosai, pipa mayamawe: Ata napiyenawa, wasana aegukenaenawa, kumiyenawa, kupiyonawa, kuntanawa, kumpari kamana otakenaenawa, akayasukenaenawa sumagina,

²⁰pintanama tiguꞌamapa aegumagina iꞌnintanaba potaye. Piya, tiyantana kampa punta naninta nantanamaba tiguꞌamapa aeguma iꞌnintanaba kampa potaye, Isu piya untiye. Kenani marisa wae kaꞌwaina Isu agisuntiye

²¹Pigoya, Isu aeba Yuta kina ige maba atate to marisa kinaꞌmi mpari Taya Saironi kuma waintusumeti wantiye:

²²Wamagina umintogana, Kenani marisa wae, pi mara miyome nkwaeꞌmaba kanama Isuka kegaꞌe uma agisumagina maya untiye: We, Waꞌega, kaeba Tebiti ntagaragawa, naeka kantara punatao. Araganepa kewama tabera aigarama amiyo piye, untiye.

²³Piya yogana abintanaba, Isuba kamanapa kapa kampa aꞌwae pomintiye. Piyama kampa aꞌwae pogini, abagi kina igeba omima maya untawe: Kaeba waya otagana wano. Aeba takaꞌi tabe kigaꞌe uta kanaye, untawe.

²⁴Piya yuguna aeba maya uwaimintiye: Naeba Isureyo aruyenabisa yaga kabubama miye kanta pe kinaꞌamanamiti unatantine, piya untiye.

²⁵Piya yogana, kana wae aeba agora ampa irosaꞌma parokaema esotamagina: Waꞌega, kaeba uwa naoꞌmaeyo, untiye.

²⁶Piya yogana, Isureyo kinaꞌmige uwa kinaꞌmige mono abikibeka Isu meto kamanapisa maya omintiye: Yagarantomi ntaninta ipaꞌmagi kara imekanaba kampa aogi pikiye, untiye.

²⁷Piya yogana, kamana mayama aꞌwae pumagina omintiye: Waꞌega, pipa kanara yene. Pigoya karantontomi ibawaimpigi naninta yabaera atamagini nagana aritawa tumeginiba pipa uwa nawe, untiye.

²⁸Piya yogana maya omimagina untiye: We waya, kamatitiꞌenaga imagina waintiye. Pi yempesa pugatano, untiye. Piya yogana pabigo aragawapa kabaꞌmagina aogi puntiye. Isuba uwoma kina kaba itantiye

²⁹Pigoya, Isu aeba pi mparasa to kake aꞌwae puma kanama Karariya kotuta ampa irosantiye. Irosaꞌma amuti ima mintogini,

³⁰uwoma kina kanagana pumagini aeti ampa irosantawe. Igeba igisa iya puꞌwanta kinape, iyampu aigakayoꞌnaꞌna kinape, iyorika kinape, aibo kinape, to kaꞌisa inuntana ibome kinape uwoma kina aꞌyaꞌma ibabute kanama Isu agora ampa aki puwaitantawe. Aibuguna kabaꞌma aogi puwaitawaentiye.

³¹Piya pogini, aibo kinaꞌmiba kamana untawe. Igisa iya puꞌwanta kinaꞌmiba ke nasintawe. Iyampu aigakayoꞌnaꞌna kinaꞌmiba aogi puntawe. Iyorika kinaꞌmiba iyo agantawe. Piya puguni, wasanamiba pi agate Isureyo kinaꞌmi Kotiwaipa tabera iꞌmu potantawe. Isu 4,000 kina naninta imintiye

³²Pigoya, Isuba abagi kina igegaꞌe uma maya uwaimintiye: Naeba aꞌyaꞌma ma kinaꞌmika nantara puwe. Igeba naege kakaga yaga mimagini igaꞌenaga purewe. Piya, naeba uwaitakini igeba naninta kampa nanta wamagini, keꞌi uma iyonanta pumagini wareꞌnasanaga abimagi tara puwe, untiye.

³³Piya yogini, abagi kinaꞌwampiba maya omintawe: Mapa kaꞌme mpariwa, tabe nanintaba aetasa aborama ma uwoma kinapa imekana naigina kanarasa waetakiyema, omintawe.

³⁴Piyama omuguna, Isu ibigama maya untiye: Tigeti ntanintaba ayaki waintiye, yogini, igeba maya untawe: Tonaentisa tara umaema paretiwa, uwaena inoyantantonto tarantowa sumagina waintiye, untawe.

³⁵Piya yuguna, abintana yogini kana aꞌyaꞌma kinapa aki pumagini maraꞌmintantawe.

³⁶Piya puguna, kana paretibe inoyantabe maema Kotiti aꞌmu potamagina, apako pumagina abagi kinaꞌwa imogini pako pumagini pi kinapa imintawe.

³⁷Imuguni, aꞌyaꞌma kina namagini igaꞌe pantawe. Aibuguna, arita waiyomepa kibiꞌmagini tonaentisa tara umaema waꞌnu kupi iraguguna awaitantiye.

³⁸Pigoya, naninta nanta waba 4,000 wa mintuguni, waya yagaraba kampa aisuntawe.

³⁹Piya potate, Isuba wasana uwaitaogini wauguna aeba wanipisa karebi imagina wama Magatani mari uma irosantiye.