Read Fore Matiyu 16 Bible Online

Matiyu 16 - Fore bible

Matiyu 16

¹Pigoya Parasibe Sarusi kinape igeba Isuti ampa irosaꞌmagini amiyo pumagini maya untawe: Kaeba yegana mantarisa awameꞌena aboraka agano, untawe.

²Piya yuguna, aeba maya uwaimintiye: Tigeba ase ikena pegiripa maya yewe: Abayarere puwaewaikana aiba pa takiye, yewe.

³Maregiripa maya yewe: Ibinapa tunusuma atami pikana ka aekiye, yewe. Tigeba ibinankama nkagoba abintawe. Pi ma kanaꞌama nkagoba nanaga kampa abewe.

⁴Antage kina, mono kampa wainta kina, awameꞌena ka agakenaga yewo. Tigeba tonaba kampaye. Yonati awameꞌena aborantisa pumagina aborakiri agakibewe. Piya uwaimitegina itate wantiye. Parasi Sarusi kinaꞌmikaba meto kamana untiye

⁵Pigoya, abagi kina igeba Isuge kotupa taꞌemagini maroti uma irosantini, nanintaba igeguꞌama kampa maenta wantawe.

⁶Piya, Isu maya uwaimintiye: Pigoya, paretibi yisiti atagana anosamisa puma, Parasi Sarusi kinaꞌmi ata kamanaꞌwai anosasanaga kabiyiyo, untiye.

⁷Piya yogini, igeba mayama mare-u me-u puntawe: Pareti atate kanaompeka piyaba uramiye, untawe.

⁸Piya kamana yuguna, pabigo kana kamanaꞌama agebi pasogana abite maya uwaimintiye: We, tigeba timatitiꞌenaba uwaenantowe. Tigeba nanaga naninta kampa maete kanakaba abima tara tara tigiba napiyewe.

⁹Naeba kaꞌena punto, pipa karuꞌena tigeguꞌa pegiri kampa napiyewo. Naeba pareti nayakamutasa 5,000 kinaꞌmi imuwagini namagini igaꞌe pauguni, aritapa kibiꞌma waꞌnu kupa ayaki iraguguna awaitantiye.

¹⁰Pareti tonaentisa tara umaema pabintantorasa 4,000 kina imuwagini namagini igaꞌe pantini, aritapa kibiꞌma ayaki waꞌnu ku iraguguna awaitantiye.

¹¹Pigoya, naeba nanintagaba kampa urimuwa, pipa aogimagiri abibebe pusanaga yuwe. Piya, naeba Parasi Sarusi kinaꞌmi ata kamanaꞌwai anosasanaga aogima kabiyiyo, yuwe, untiye.

¹²Piya kamana uwaimogini, ibaba abibebe pumagini maya untawe: We, paretiwama yisitigaba kampa iye. Parasi Sarusi kinaꞌmi kamanaka aogima kabiyiyoma iye, piya untawe. Pitaba Isuka Karaisitiwema uma aborantiye

¹³Pigoya, Isu aeba wamagina Sisariya kumata, Piripi kabinti kumata uma irosakena puntana, abagi kinaꞌwa ibigama maya untiye: Wasanamiba Wasanama Ntagara naekaba kewe yewema, ibigantiye.

¹⁴Piyama ibigaogini, igeba maya omima untawe: Igeba kae kageba toma toma sewe. Kaꞌisamiba Yoni mono wani paiꞌitanti ntagarawe yegini, kaꞌisamiba Iraiyawe yegini, kaꞌisamiba Yeremayawe yegini, to kaꞌisamiba to ka mintanti poropetewe, kaekaba piya yewe, piya untawe.

¹⁵Piya uma omuguna, to kake ibigama maya untiye: Pigoya tigeripa pipa naekaba kewe, untiye.

¹⁶Piya yogana Saimoni Pitaba maya untiye: Kaeba utaratanti ntagara Karaisiti, Koti miyaba ae yagaragawe, untiye.

¹⁷Piya yogana Isu maya omintiye: Saimoni, Yona ntagara, kaeba kaꞌmu po. Ma kamanapa ka yagaramaba kampa ugamiye. Mantarisa nabanempa uma aboragamintiye.

¹⁸Pika naeba kamana ka ugamukuwa, abo: Pita kaeba yabakawe. Ma ntabata naokinaꞌnepa itakini atokaemagini mintigina aꞌabiwama nkesegiyenamaba kampa ipasanakiye, untiye.

¹⁹Piya untana to maya untiye: Naeba Koti kabiwaitakena kumaꞌama kiwapa kamuwe. Pigoya mabi kabe aiꞌitaganaba, mantariba pabi nkawameta aborakiye. Piya, mabi kabe kiꞌitaganaba, mantariba pabi nkawameta pabiyamagina aborakiye, untiye.

²⁰Piya utegina, abagi kinaꞌwapa kamana esegima uwaimima maya untiye: Naeka Karaisiti yagara mintiyemaba tigeba wasanaba ankuwaimiyo, untiye. Isu puꞌmagina asikibi kamana uwaimintiye

²¹Pigoya pi ntaga Isuba agobima ainti aꞌyaꞌwaemaena aborakibi, pi kamana aboramagina abagi kinaꞌwa uwaimintiye. Aibuntana Yerusaremi kumati iyekini monota kabiyume kinaꞌmibe, tabe mono kiye kinaꞌmibe, mono tisa kinaꞌmibe tabe kuntaenaba aboramimagini, aeguyigina puꞌmagina kakaga yaga mite to aogama asikibi, pi kamanapa aꞌyaꞌma uwaimiwaentiye.

²²Piya uwaimogana Pitaba Isu abiri agegaꞌe uma kabiꞌmagina maya omintiye: Waꞌega, Kotiba kaoꞌmaeyakana pintanaba kampa aboragameno, untiye.

²³Piya yogana Isu akaꞌintaesi potama Pitapa maya omintiye: Satanigawa, kaeba natate wagaso. Kaeba antage ki nayakima Kotikaba kampa napiyene. Kaeba wasanama kamanaꞌamana napiyene, untiye.

²⁴Pigoya, pabintaga Isu kamana ka mayama amato puma abagi kinaꞌwapa maya uwaimintiye: Wasana kaꞌwaina nae naegarakena puntanaba auꞌama kamana akabitate wasanami igobi potakibikaba a-nkaekuru puma maripowa aesagaꞌuritegina naegarano.

²⁵Pigoya kaꞌwaina mikenaenawaka owe yekanaba, aꞌyugu potakiye. Piya, to kaꞌwaina aeba naeka mikenaenawaka aꞌa-o yekanaba aboramikiye.

²⁶Pigoya kaꞌwaina aeba mabi aꞌyaꞌwaemaena maemagina aguꞌamankapa aeguma kaiyekanaba, aya pukiye, a. Agupa ayamabaya to kakema ika pekana kanarasakiye, a. Pipa kampaye.

²⁷We, naeba yekiri abiyo: Wasanama Ntagara naeba, nabanempa mantarisa eꞌwasaenama naeti ampa eꞌwasa punataka, enisore kinaꞌwapa ibabeka tumukune. Piya pumagi, aꞌyaꞌma kinaꞌmiba mampabi pentana mana, pabi nkawameta antotaꞌenaba imukuwe.

²⁸Pigoya naeba taga urimukuwa abiyo: Tigetisa ma kaꞌisa minta kinapa kampa purintigi, Wasanama Ntagara naeba tumima waꞌegaenanepa abora maema aborakini nagakibewe, Isu piya untiye.