Read Fore Matiyu 17 Bible Online

Matiyu 17 - Fore bible

Matiyu 17

¹Pigoya, Isu aeba tonaentisa kaꞌumaema yaga aꞌya puwaogana, Pitana, Yemisina, aꞌnanto Yonina, sumagina ibabute wasana kampa minta amuti intawe.

²Pitaꞌi iyora asima mima auꞌamaba to auga puntiye. Piya pogana, aowawamaba pankama nkeꞌwasa pemisa puma eꞌwasa puwantiye. Aibogana kaiwampaba waeꞌwae pumagina tabera eꞌwasa puwantiye.

³Piya pogana, Mosesege Iraiyage pabigo ampa aborama aege kamana uma abuguna igeba igantawe.

⁴Piya puguna, Pitaba Isu maya omintiye: Waꞌega, mataꞌi miyokana aogi piye. Pika abintaga kakaga ke nama kiyeno, kaeꞌena kana, Mosesenta kana, Iraiyanta kana sumagi, kiyeno, untiye.

⁵Piya yogana, pabigo wae ibinankama tumimagina itikaewantiye. Aibogana ibinankama antabaipintisa kamana ka mayama tumintiye: Mepa nabugai ntagaranene. Tabera naꞌmu potauwa, ae kamana abiyo, untiye.

⁶Piya kamana abite, abagi kina igeba iyowarisa aigarepaꞌmagini tabaraba pumagini tabera iyekuru puntawe.

⁷Piya puguna, Isuba igora wama aya ikaya puma maya untiye: Tigeba asima, karuba a-pumagiri miyiyo, untiye.

⁸Piya yogini igeba iyomaꞌmagini agaumepa, Isu abiwa agantawe.

⁹Pigoya, amutisa tumintini Isu maya uwaimintiye: Ma kasaꞌena aga, pi kamana wasanaba a-nkuwaimima mintigi, Wasanama Ntagara naeba purintapisaba naogamagi asiyekiri uwaimiyoma, uwaimintiye.

¹⁰Piyama uwaimogini, pi abagi kinaꞌwa abigama maya untawe: Iraiya marupa irosakana ae akaꞌi utaratanti ntagara Karaisitiba irosakiyeba, mono tisa kinaꞌmiba nanaga yewema, abigantawe.

¹¹Piyama abigauguna maya uwaimintiye: Iraiya aeba taga kanama aꞌyaꞌwaemaena ampa maemagina aogima arupu pikiyeba untane.

¹²Pika urimekiri abiyo: Iraiya mparu mpaenti ntagaramaba ago irosaꞌma mintogiri, kampa napinta, tigeti ntapiyena aegaꞌma ataena potantane. Piya, Wasanama Ntagara naepa pabiyama ataena punatakibewe, untiye.

¹³Piya yogini igeba mayama abintawe: Pipa Yoni mono wani paiꞌitanti ntagara aeka iye, untawe. Isu ke kinaꞌma antabaipinti minta yagaranto kaba atantiye

¹⁴Pigoya, amutisa tumimagini amuri wasana mintumeti tumpa irosauguna ka yagara Isuti kanama agora ampa parokaema maya omintiye:

¹⁵Waꞌega, kaeba yagaraneka kantara potao. Aeba aonanta puma wareꞌnaowa pumagina tapa wagite wanipintiba tumite piye.

¹⁶Piya pegi abagi kinakampiti ababute kanaogini kabaꞌma aogi potakena pugagate igiga pumagini uwa atawe, piye omintiye.

¹⁷Piya omogana Isu maya omintiye: We, timatitiꞌena kampa wainta amu kina tigeba, naeba ayaki yaga tigege mimagi kuntaenaripa aesagaꞌmagi tiyoꞌmaema mikuwe, a, untiye. Piya umagina: Kana yagaranto ababute kanaiyo, untiye.

¹⁸Piya yogini igeba ababute kanauguna Isu kana ke kina kabiraogana kana yagaranto atate waogana aogi puntiye.

¹⁹Aibogini, abagi kina igeba abiri abigama maya untawe: Taeba nanaga ke kina agarubakenaba pugagate ataune, untawe.

²⁰Piya yuguna, aeba: Timatitiꞌenaripa uwaenantowe, uwaimintiye. Piya untana to maya untiye: Taga timatitiꞌena uwaena yamankaꞌanto kanta puma wairitantagiripa, maro nkamuꞌamaka: Tigabao, yiginaba tigabakiye. Pigoya, aintiba ka yuga kampa waintigiripa kanara kampa pikibewe.

²¹(Piya, ke kina pipa to kaꞌenarasaba kampaye, uwa nunamurasage monoka naninta aꞌa-o uma mikenaenarasage igarubakibewe, Isu piya untiye.) Isu purintapisa asikena kamana uwaimogana tara puntiye

²²Pigoya, ainti Isuba Karariya mari nasi nasi puntana, abagi kina maya uwaimintiye: Wasanama Ntagara naeba eꞌero ntagaba kampa mintakana minagaꞌena puma wasanami nkiyapi natakini,

²³naeguyigi puꞌmagi, kakaga yaga miyekana to kake nabage pikiye, untiye. Piya yogini, abagi kinaꞌmiba abite ata inta paritantawe. Mono namataka takisi punti kamanane

²⁴Pigoya, Kapaniyamu kumati aꞌwae puma kanauguni tabe mono namankama takisi mone maemagini mintantawe, piya pume kinaꞌmi ige Pita abigamagini maya untawe: Tisarimpaba tabe mono namankama takisi atabera aya piye, untawe.

²⁵Piya yuguna, Pita maya untiye: Owe. Aeba ataikaiwe, untiye. Piya ute Isu mintome ntamapinti imaginaba kana kamanapa kampa omintogana aewa abigama maya untiye: Pita kaeba nana kagi napiyene. Mabi to marisa tabe kinaꞌmiba igeba ketisa tabe takisi moneba maeyawe. Iyoꞌmitisabe uwa to ampa kabinta kinaꞌmitisabaya maeyawema, abigantiye.

²⁶Piyama abigaogana: Pi ampa kabinta kinaꞌmitisawe, untiye. Piya yogana Isuba to maya omintiye: Pipa kanara yena, pigoya pika iyokina igeba uwa miyewe. Pigoya, taeba Koti nkaokinatawe.

²⁷We, igeba taeka abima aꞌyugu atabusanaga kotuti wama igaꞌna atagana tumokana inoyanta maru okabikibi, pi paibuma awamu atarama ka mone maema wama tasigekaba tabe mono namankama takisi menkimo, piya untiye.