Read Fore Matiyu 18 Bible Online

Matiyu 18 - Fore bible

Matiyu 18

¹Pigoya, pabi ntaga abagi kina igeba Isuti wamagini maya uma abigantawe: Koti kabiratakena yaga aborakanaba ke tabeba mikiye untawe.

²Piya yuguna, Isu uwaena yagaranto ka kegaꞌe yogana kanaogana abakankaipi asitamagina,

³maya untiye: Taga urimukuwa abiyo: Tigeba tigupa aꞌwae puma yagara araga ano aba aegaramisa puma mikibepa, Koti kabiratakenaenama nkagupi uma pasikibewe. Piya kampa pikibepa taga kampa uma pasikibewe.

⁴Piya, kaꞌwaina aeba ma ntagaranto ae awameta tumima mikibiꞌnaba Koti kabiratakenaenama nkaguta kiya mikiye.

⁵Pigoya, kaꞌwaina naeka napimagina ma kana yagaranto aoꞌmaekibiꞌnaba pipa aeba nae naoꞌmaekiye, Isu piya untiye. Ataenama wasanama nkamatitiꞌenaba maema kamparaga potaye

⁶Pigoya, Isu to kamana maya untiye: Piya, maya yagaranto naegarakana, kaꞌwaina ayakekana kamparagaena pukibemipa, kana ayakikibi ntagara arakuꞌma tabe yabantama anaꞌmubi ubuꞌatama tabe wanipinti apasanakasagana naisemisinta: Pipa kanara pewe, yesine.

⁷Aguntaena pukena amiyoꞌena asi nasiba mara aboragita, ataenabi miyune. Aibegiba, aguntaena aborakibi ntagarama aintiba ataenabi mikiye.

⁸Pigoya, kayankamabera kagisawama kamparagaena pikena pekanapa, arisaꞌma maebugaso. Kagisa kaya tararasa aguntaena pekanaba, ainti tayaba tayaba yakupi maebugatasanaga piya po. Kagisa kaya kampa wainta yagara mintana miyaba kumati uma irosakibempepa, pipa kanarane.

⁹Pigoya, kao agama kamparagaena pikena pekanapa piꞌma maebugaso. Tara kaoyaga mintana ainti tayaba yakupi maebugatasanaga piya po. Kaorika mintana miyaba kumati uma irosakibempepa, pipa kanarane, Isu piya untiye. Yaga kaka wanti meto kamanane

¹⁰Pigoya, Isu to kamana maya untiye: Tigeba pasemagiri ma ntakarantonto igekaba abigina uwaena kantaba a-peno. Naeba pika urimukuwa abiyo: Enisore kinaꞌwai igeba mantarisa nabanempa nkaobi asi nasi aborama miyewe.

¹¹(Pigoya, Wasanama Ntagara naeba kabubama miye kina iguyosaꞌma ibabikena tumintone.)

¹²Piya, kaꞌwaina sipisipiwa 100 igetisa kaꞌanto kabubawakanaba kaikibera, 99 igepa itate kabubinti wama kaka waiꞌnaka uma aguyosakiye. Pika tigeba nanawe yewe.

¹³Naeba tagaka urimukuwe. Aeba aogima aguyosagakiye. Aguyosaꞌma aboratamaginaba, 99 minta igeka wanane. Kaka wai aeka aꞌmu pikiye.

¹⁴Piya, ma ntakarantonto igetisaba pabiyama kaꞌwainaba kamparagaenabi misanaga mantarisa nabanempati kampa aogi piye, Isu piya untiye. Aguntaena pikibe kinaꞌmika iyoꞌmaekena kamanane

¹⁵Piya untana Isu to maya untiye: Pigoya kaoꞌyagara kaꞌwaina kaeti aguntaena maema aborakanapa kaeba wama tisibiri aguntaenawapa aborama omo. Aeba kamanaka abima paruma kayone pekanapa abegana pabigo aꞌya peno.

¹⁶Piya, kamanaka aꞌa-o uma kampa abekanapa, ka yagarawo, tara yagarawo isiba peginisi isige agowapa kaga abima uma arupu potaiyo.

¹⁷Piya, kapi kamanati aꞌa-o uma kampa abekiripa mono kiye kinaꞌmi-nkakiyenabi ababotaiyo. Ige kamana aꞌa-o umagina kampa abekiripa: Aeba to kina, agunta kinane, otaiyo.

¹⁸Pigoya, naeba taga urimukuwa abiyo: Tigeba mabi aꞌyaꞌwaemaena aguntaenawai uwa ataigina waiyekanaba, mantariba pabiyama waikiye. Piya, mabi uma uwa kasiginaba, mantarisa pabiyama uwa kaikiye.

¹⁹Pigoya abiyo: Tigetisa tara yagara taramisi kaꞌenaga isigu kata atokaemaginisi esotaisiginaba, mantarisa nabanempaba abiwaisimikiye.

²⁰Piya, wasana tarawo, naeka akibigipa, naeba ibakapi mikuwe, Isu piya untiye. Ata kayokaya yagarama mpeto kamanane

²¹Pigoya Isuba kamana piya yogana, Pitaba aeti uma mayama abigantiye. Waꞌega, naoꞌyagarama aguntaena punatakapa, aguntaenawapa asuꞌa pugasakana ayaki pekana kanarasakiye. Piya, asuꞌa pugasakana tonaentisa tara umaeyakana kanarasakiyoma, abigantiye.

²²Piyama abigaogana Isu maya omintiye: Tonaentisa tara umaemaba kampaye. Kampa aisuntaenaba uwa asuꞌa pugaso.

²³Pigoya, pika Koti kabiratakenaenaga, meto kamana yekiri abiyo: Ka marasa tabe yagara kaꞌwaina kayokaya yakarakinunka: Iretane namikibewema, igegaꞌe untiye.

²⁴Pigoya, ka yagara ababute kananta aetiba iretawapa 10,000,000 tora waintantiye.

²⁵Aeba tabe irita pipa antota amikenagaba mone aguyosagantiye. Aibogana tabe yagara aeba pi ntagarama nkwaya yagarawape, aewape, yaga kotankape aꞌyaꞌmagini wasanami ikantana maeyigina, kana monewamaba aeꞌenaena puwaewanema, untiye.

²⁶Aiyogana, kayokaya yagara aeba tabe yagarama nkagisabi ampa parokaema maya uma agisuntiye: Tabe yagarane, kaeba uwa nataga naeba ainti iretagapa kamenoma agisuntiye.

²⁷Piyama agisogana tabe yagara aeba antara potama igaꞌna namapipa kampa ababotanta atunkapa uwa atatantiye.

²⁸Piya potaogana namapintisa irosaꞌma tumima waomepa kana kayokaya yagara aoꞌyagara ka tumpa abatama, aeti atunkapa 100 tora waintogana, abatama arakuꞌma anaꞌmu kana uꞌma tutusotama maya untiye: Atuntepa pabigo ma kanara namo, untiye.

²⁹Piya yogana, aoꞌyagara aeba agora uma parokaema agisuma maya untiye: Kaeba uwa nataga ainti naeba iretagapa kamukuwe, untiye.

³⁰Piya uma agisogana, kamanaꞌwapa kampa abinta wama yogini aoꞌyagaraba maya uma igaꞌna namapi ababotantawe. Aibuntini maya omintawe: Iretagapa amiwaegaite irosakibene, untawe.

³¹Piya pogini, aege atokaema yoga pume kinaꞌmiba agate igeba intara pumagini wama tabe yagara kana kamana uma omiwaentawe.

³²Piya yuguna aeba abite kayokaya yagara aepa to kake kegaꞌe uma maya omintiye: Kaeba kamparaga yagaragawe. Nagiseka naeba nantara pugatama tabe iritanepa atagatauwe.

³³We, kaeba kaoꞌyagaraga pabiyama kantara potama auꞌisanawe, piya untiye.

³⁴Piya uma tabera amoꞌena pumagina irebu kinaꞌmiti atama maya untiye: Tigeba kamparagaena potama karana atamagiri miyigina tabe iritanepa aꞌya wakiri ataiyo, untiye.

³⁵Pigoya, tigeba tinta aseꞌyonabisa aguntaena kampa mae igasiginaba mantarisa nabanempaba pabiyama kuntaena puritakiye, Isu piya untiye.