Read Fore Matiyu 19 Bible Online

Matiyu 19 - Fore bible

Matiyu 19

¹Pigoya Isu aeba toma toma kamana uma aꞌya atate, Karariya maba atate Yontani wani mparoteri uraꞌema wama Yutiya irosantiye.

²Irosaogini wasana uwoma kinaꞌmi igeba aegarauguna yoni kinaꞌwai kaba itantiye.

³Aibuguni, kaꞌisa Parasi kinaꞌmiba aeti irosaꞌma, amiyo potakena maya uma abigantawe: Ago kamanatepinti wasanama waya kaꞌmaenaraka puma waya kaikenaba kanara payawa, uramoma abigantawe.

⁴Piyama abigauguna maya uwaimintiye: Tigeba mono kamana mayama waintipa, pipa kampa aisuma abewa, a. Aꞌyaꞌmaena Koti maru maema aborantanaba, wabe wayape kaga aborawaigitantine.

⁵Aborawaisitama, maya untine: Pika wamaba anope abape isitate wayaꞌwampati uma atokaema, isigeba ka kina kanta puma miyese, untiye.

⁶Piya, isigeba taraba kampa punta, kaꞌena puma miyese. Koti atokae isitantika, wasanamaba a-nkatara isitano, Isu piya uwaimintiye.

⁷Piya uwaimogini igeba maya untawe: We, pipa Moseseba waya kaikena puntiripa esa amima otaiyoba, piyaba nanaga untiye, untawe.

⁸Piya yuguna Isuba maya uwaimintiye: Monoka kampa karuꞌena abima tige akuneka Mosese waya kaikenaenagaba abima owe puritantine. Piya, agobintiꞌnaba piyaba kampa untine.

⁹Pika naeba urimukuwa abiyo: Kaꞌwaina wayaꞌwampaba kumiyonaba kampa puntakana uwa kaite to wae maekibipa, aeba kumiyenaba pikiye, Isu piya untiye.

¹⁰Piya yogini, abagi kina igeba maya omima untawe: Wawaya isige agoba piyama waintika, waya kampa maenta uwa mikenaenaba, pipa kanarane, untawe.

¹¹Piya yuguna Isu maya uwaimintiye: Pi ye kamana ukubopa, pipa uwa kinaꞌmi wanane. Pi utawaitanta kinaꞌmi mana ubikibewe, untiye.

¹²Wasana kaꞌisa kinapa inogi intabaipintisa waya kampa maekena kina aborawe. Piya, kaꞌisa kinapa wasanami i kasamagini waya kampa maekibewema, uwaitawe. Piya, to kaꞌisa kinaꞌmiba mantari kabiratakenaenaga napimagini waya kampa maenta uwa miyewe. Pigoya, ma kamanapa otawaitai kinaꞌmi mana abima aegaraiyo, Isu piya untiye. Isu inamu ntakarantonto akayona puwaitantiye

¹³Pigoya, igeba inamu ntakarantontowai Isuti ibabute kanauguna, ayapa iꞌnota atama nunamu ikiyema omintawe.

¹⁴Aibuguni, abagi kina igeba karu kamana uwaitauguna, Isuba maya untiye: Tigeba itaigini yakarantonto igeba naeti kanaiyo. Tigeba a-nkakunkitaiyo. Piya miye kinaꞌmi kaba Koti kabiratakenaenaba utawaitantine, untiye.

¹⁵Piya ute ayapa inota atama kayone puwaitategina, kana maba atate tori wantiye. Tabe kutantaga masimabi kaꞌwaina Isu akabitantiye

¹⁶Pigoya, ka yagarama Isuti ampa irosaꞌma abigama maya untiye: Tisa, naeba aogiyenaba aya pukuboti, eꞌwasaena maemagi aꞌyaꞌma yagaba miyaba mikuwoma, abigantiye.

¹⁷Piyama abigaogana, maya omintiye: Pi aogiyenagaba nanaga nabigane. Aogiyenama nkagoba kaꞌanto mintiya, kaeba aꞌyaꞌma yaga miyaba mikuwe untanapa, ae kamana ago abima wasiyo, untiye.

¹⁸Piya yogana, aeba: Ae kamana agowema, abigantiye. Abigaogana maya untiye: Paisa mono ago kamanaꞌamaba maya iye: Kaeba wasanaba a-nkaeguma kaiyoma, kumiyenaba a-poma, kuntanaba a-poma, kumpari kamanapa to wainapa a-sotaoma,

¹⁹kano kaba kamana wasiyo. Piya puntana kaekaka kabemisa puma kaokinakaba pabiyama kabeno, piya untiye.

²⁰Piya yogana kana yagara aeba maya omintiye: Pipa wasirite kanama mintantone. Pika kapa aya pusuwema abigantiye.

²¹Abigaogana Isu maya omintiye: Kaeba arupu puma aogima mpikenaga untanapa, wama kotagapa to kina imima mone maemagina kusi kina imegana aogima miyepa, mantari aogiyenagapa aboragamekana kaeba kanama ampa naegarao, untiye.

²²Piya yogana kana yagara abima kamparaga potate wantiye. Kotapa taberakaꞌya waitantogana, pika piya puntiye.

²³Piya pute waogana, Isuba abagi kinaꞌwa maya uwaimintiye: Naeba taga urimukuwa abiyo: Tabe kutantaga kinaꞌmi kabiratakena manta kumati ikenagaba pipa igiga puma tabe kuntuyenawe.

²⁴Naeba pabi kamana to kake urimukuwe. Tabe kamoro yagawama naꞌama nkagepinti uma pasikenaenaba pipa esegiyenawe. Piya, tabe kutantaga yagaramaba Koti kabiratakena kumati ikenaba pipa to awameta, tabe kuntaenawe, untiye.

²⁵Piya yogini, abagi kinaꞌmiba pi kamana abite pami pumagini maya untawe: We, kebaya mantariba ikiye, untawe.

²⁶Piya yuguna Isuba igantana maya untiye: Pipa wasanama piya pikenaenaba kampa waintiye. Pipa Koti ka pikenaena waintiye, piya uwaimintiye.

²⁷Piya uwaimogana Pitaba pabigo awamuta uꞌmagina maya untiye: Abo, taeba aꞌyaꞌwaemaenarepa takabiwaetate kaepa kaegaraune. Pigoya aintiba piꞌna nkantotapa nanaena aboraramikiye, abigantiye.

²⁸Piyama abigaogana Isu maya uwaimintiye: Naeba taga urimekiri abiyo: Aintiba aꞌyaꞌwaemaena aborama aogi pikena kanabipa, Wasanama Ntagara naeba eꞌwasa naemu yabaeneta miyekini, naegara kina tigeba pabiyama mampabisa tabe kinaꞌmi nkimu yabae nagisarisa tara tumpaema pitaꞌi mima, Isureyo aruyena to nagisarisa tara tumpaema kinaꞌmi ige kamana uma aꞌya itakibewe.

²⁹Pigoya, kaꞌwaina aeba naeka uma aganto, aꞌnanto, amanaꞌma, ano aba, araga yagarawa, kumaꞌwa, kiyanka, atate aeba naegarakibiꞌnaba piꞌna antotapa uwomantana maema mintana aintiba miyabaꞌena maekiye.

³⁰Piya, iba kaꞌisa kiya kinaꞌmiba igeba kayokaya kina miyigini to iba kayokaya pe kinaꞌmiba igeba kiya kina uma mikibewe, Isu untiye.