Read Fore Matiyu 2 Bible Online

Matiyu 2 - Fore bible

Matiyu 2

¹Pigoya, Eroti pi mparasa waꞌega yagara mintogana, Isu aeba Petariyamu kumata Yutiya mara aborantiye. Pigoya pi kanabipa, pa nkirosaꞌmitisa to marisa nori aisuma aganta kinaꞌmi Yerusaremi kumata ampa irosaꞌma, ibigama maya untawe:

²Yuta kina tige aoso Waꞌega ae kumata aboraye. Taeba maroti maretisa yakari potanti noriwa agategi, ampa ae agisabi parokaema taꞌmu potakena kanaune, untawe.

³Piya yuguna, waꞌega yagara Eroti abima pami pogini, aꞌyaꞌma Yerusaremi kuma ago kina igebe pami puguna,

⁴Eroti aeba aꞌyaꞌma tabe mono kiye kinape mono tisa kinape igegaꞌe yogini aki puguna: Karaisiti yagaraba, ae kumata aborakiyema untanema, ibigaogini,

⁵maya omintawe: Yutiya mari Petariyamu kumatane. Pika Kotitisa kamana abima uwaimikena poropete kaꞌwaina mayama kaemarantiye:

⁶Petariyamu kuma Yuta mari, kaeba Yuta kuma aiꞌne tuminta kumapa kampaye, iye.Kaetisa kiya yagara ka aborama, Isureyo naokina kabiwaitakiyema, kaemarantiye untawe.

⁷Piya yuguna abite, Erotiba nori aisunta kina ibira igegaꞌe umagina, pi nori aborantika pasema ibigaogini omuguna:

⁸Petariyamu kumati waiyema, uwaitama maya untiye: Tigeba wama esegima uma aguyosaꞌma, kana yagaranto aboratate kanama unamigi, pabiyama naeba wama naꞌmu potamagi agisabi parokaekuwe, untiye.

⁹Kana waꞌega yagarama piya uwaimogini abite wantawe. Keꞌi wantini maroti mawaitisa nori aganta, pipa pabiyama to kake aboraogini agaurite wauguna, kana yagaranto mintome ntamankama abobora esegima waintantiye.

¹⁰Piya pogini, igeba nori agate tabera iꞌmuntanaba puntawe.

¹¹Piya pumagini, namapinti ima yagarantobe anowampa Mariyape isigama, irakabima ae ageba asagaꞌyuma, kotawaipisa iꞌmuntanaba maema aisa potamagini, kori yabape, aogi agunta kagupe, tusa masawaepe amintawe.

¹²Piya puguna, Waꞌegawama amonta paitama akayuwaitaogini, igeba Erotiti kampa aꞌwae puma wanta, to kiꞌi wama mawaiti wantawe. Yosepege Mariyage Isu ababute Isipi mari wantase

¹³Pigoya igeba aꞌwae puma wauguna, Waꞌegawamatisa enisore kaꞌwaina Yosepe amonta patama, kamana maya untiye: Kaeba asima, yagarantobe anope isibabute Isipi mari tiyegaka wama, nae kamanaka agawa puma miyiyo. Abo. Eroti aeba yagaraga aguyosaꞌma aegukena piya, ababute wagaso, omintiye.

¹⁴Piya omogana, Yosepeba asima yagarantoke anoke isibabute aseka Isipi mari paiꞌma wamagini,

¹⁵pitaꞌi umintuguna Eroti purintiye. Piya, poropete kaꞌwaina Waꞌegawama nkawamupisa kamana maya untiye: Yagaranepa Isipi mari mintaka, kegaꞌe yekana pitaꞌisa kanakiye. Pi kamanaꞌama esegi puntiye. Eroti uwaitaogini inamu ntagara iyeguntawe

¹⁶Pigoya, nori aisunta kina igeba Eroti ikabitate wauguna, agowa abite agobipa tabera puntiye. Piya pumagina irebu kina uwaitaogini, igeba wama Petariyamu kumatasabe awamori kumaꞌantontorasabe, masi yagara kabowaipa tara kampa punta yagara, igepa aꞌyaꞌma iyeguntawe. Pipa nori aisunta kina ige iwamupisa kana yumesa puma, pabi kana yagara iyeguntawe.

¹⁷Pigoya, pika poropete Yeremaya kamana maya unti, piꞌna esegi puntiye:

¹⁸Arama kumatasa ka kamana abogini, tabera intaraꞌena puma kubeꞌena puguni abewe, iye.Areseriba araga yagarawa aegugasumeka iguyosakate tabera kubeꞌena pekini, aurikena pugagate atakibewe, piya untiꞌna esegi puntiye. Yosepebe waya yagarawampabe aꞌwae puma kanantawe

¹⁹Pigoya, Eroti puꞌwaogana, Yosepe Isipi mari miyogana, Waꞌegawamatisa enisore kaꞌwaina amonta patama maya omintiye:

²⁰Yagara aegukena punta kinapa ago puꞌwawe. Kaeba asima, yagarantobe anope isibabute Isureyo mari waiyoma, omintiye.

²¹Piyama omogana, Yosepeba asima yagarantoke anoke isibabute Isureyo mari wantawe.

²²Pigoya, Akereyasi aeba abawampa Eroti mparupa maema Yutiya mara kabinti, pi kamanapa Yosepe abitegina, pitaꞌi wama umikenagaba karu puntiye. Piya pogana, Waꞌegawama amonta kiꞌisa kamana uma aboramogana, pimpa atate Karariya mari wama,

²³ka kumapa, agewapa Nasareti, pitaꞌi wama umintantiye. Piya, Karaisitika poropete kinaꞌmi: Ae agewapa Nasareti yagarawe ikibewe, unta, piꞌna esegi puntiye.