Read Fore Matiyu 20 Bible Online

Matiyu 20 - Fore bible

Matiyu 20

¹Pigoya, Isu to kamana maya untiye: Koti kabiratakenaenaba waini yugawama nkaba aeta meto kamana ukuwe. Piya, waini yugawama nkaba kaꞌwaina abaya aseka kaꞌisa kayokaya yagara ibabikena wantiye.

²Pigoya kaꞌisa ibabuma ka yagasa ikantanaba wantora piya uma aborawaimogini abuguna kanarasaogini yogawati uwaitaogini wantawe.

³Pigoya to pabi ntaga abaya to kake wama kaꞌisa kina maketi kumati uwa mintuguna,

⁴uma igama maya uwaimintiye: Waini yugane waintiya, wama uma pigi, ikantanaba kanara timukuwe, yogini, abite waini yugawati wantawe.

⁵Pigoya, kagi abebege atamaisakenage pogana, to kake wama pabiyama uma ibabuntiye.

⁶Pigoya atamai to kake wama kaꞌisa kinapa yoga kampa punta uwa mintuguna uma ibatama maya uwaimintiye: Tigeba nanaga eꞌero ntaga uwanama mintagana atamaisaye, untiye.

⁷Piya yogini maya omintawe: Ka yagaramaba yoga kamanapa taepa kampa tababuma urataine, untawe. Piya yuguna maya uwaitama untiye: Waini yugane waintiya, wama piyo, uwaimintiye.

⁸Piya, yogawama nkababa piya puma mintogana, aseyogana kiya yagarawa mayama omima untiye: Kaeba yoga kina igegaꞌe uma mone imo. Ainti ibabo kinaꞌmitisa agobima imirite wamagina maru ibabo kinaꞌmitiba uma imima aꞌya po, piya untiye.

⁹Piya yogana abite ainti atamai ibabunta kina ige igegaꞌe yogini kanauguna kaꞌwainanta kaꞌwainanta wantora imiwaentiye.

¹⁰Piya imogini, maru kanaume kinaꞌmi igeba agate: Taepa ikantanaba mesuba puma tamikiyema, napintawe. Aibuguna pabiyama wantora wantora imintiye.

¹¹Piya imogini agate, yogawama nkabapa kabiꞌma maya untawe:

¹²Ainti kana kina igeba yogaenaba uwa anagiꞌena ampa pewe. Piya taeba pipa pankaerugumpa taise pagapaga yugaena puma mintokana ase iya, pipa nanaga ainti kana kina igeke ka awametapa tamiye, untawe.

¹³Piya yuguna, yogawama nkababa igetisa ka yagara maya omintiye: Naoꞌyagara, naeba ataenaba kampa pugatauwa, kaeba wantoraga ugamogana abima kanarane yempene.

¹⁴Pika monegapa maete wao. Naeba ainti kana kinapa kaeke ka awameta timukuwema napiyegana kanarasaine.

¹⁵Pintanaba pipa naeꞌenawe, pika naeba agowama nae napimagi, piya mayaena pikena untapa pukuwe. Kaeba nanaga nanta aseyonaneka poganapa abima ataba pene, untiye.

¹⁶Pika kayokaya kinaꞌmiba kiya kina miyigini, kiya kinaꞌmiba kayokaya kina mikibewe, Isu piya untiye. Isu purintapisa asikena kamana kakagara untiye

¹⁷Pigoya Yerusaremi kumati ikena puguna, Isu aeba abagi kina nagisarisa tara tumpaema igeꞌamana ibabogini ibiwai wantawe. Keꞌi wantini maya uwaimintiye:

¹⁸Abewo, taeba Yerusaremi kumati iyune. Pitaꞌi nabanempaba Wasanama Ntagara naepa tabe mono kiye kinape mono tisa kinape ige iyapi natakini igeba: Aeguyiyoma, unatamagini,

¹⁹namuꞌisa kinaꞌmiti unataigini igeba karana natama eru kasutasa naeguma maripora ita nataigi purukuwe. Puꞌmagi kakaga yaga miyekana nabanempaba to kake asinatakiye, Isu piya untiye. Yemisige Yonigeba tabe mikenaga untase

²⁰Pigoya, pi ntaga isinowaisimpa Sebeti ntagara tara isibabute Isu nkagora kaꞌenaga esotakena uma parokaentiye.

²¹Uma parokaeyogana abigama maya untiye: Kaeba nanaga kabiye, yogana, aeba maya untiye: Kaeba yega, yagarane tara ainti tabe Waꞌega aborakibempe ntagaba kayatakanti kayakeꞌmasima mikibese, untiye.

²²Piya yogana Isu maya omintiye: Tigeba aiboꞌenarika piyaba yewe. Nae nantaraꞌenabi tisigeba kanara pasikibeso, untiye. Piya yoginisi isigeba: Owe, pabiya pukuse, untase.

²³Piya yusuguna maya uwaisimintiye: Nae nantaraꞌenabi taga pasikibese. Pigoya, nayatakanti nayakeꞌmasi mikena kamana ukenaenaba pipa naetiba kampa waintiye. Nabanempa uwaitanti kina, ige pi yabaerapa mikibewe, Isu piya untiye.

²⁴Pigoya, to nayataraꞌmu abagi kinaꞌmiba pi kamana abite kana agantoke aꞌnantokeba ka isibirantawe.

²⁵Piya puguna Isuba igegaꞌe uma maya uwaimintiye: Mampabisa tabe kinaꞌmiba esegima kabiwaitawe. Imagini miye kina igeba uwa kinapa igasimagini tabe kinaꞌwai miwaetawe. Pipa abintawe.

²⁶Pigoya tigeba itigiso atigiso piyo. Pika tigetisa kaꞌwaina imagini kiya mikena puntanaba, aokinaꞌmi kayokayaꞌena pumagina miyeno.

²⁷Pigoya kaꞌwaina aeba paitaritamagina kiyari mikena puntanaba, aokinaꞌmi ige yoga kina miyeno.

²⁸Piya, Wasanama Ntagara naeba pabiyama tige nae kayokayaꞌena punataiyomaba kampa tumintone. Naeba tige kayokaya pumagi, mikenaenanetasa uwoma kina ika puma aꞌwatitakena tumintone, Isu piya untiye. Isiyorika yagara tara isiyo agawaisitantiye

²⁹Pigoya Isube abagi kinaꞌwape igeba Yeriko kuma agaite wauguni, wasana uwoma kinaꞌmi iyegaꞌma wantawe.

³⁰Piya pugunisi, isiyorika yagara tara ke awamori mintusuguni, Isu kanama keꞌi waye, untawe. Yugunisi abite pabigo agasiya kigaꞌe uma maya untase: Waꞌega, kaeba Tebiti ntagara tasigeka kantara po, untase.

³¹Piyama tabera kegaꞌe yusuguni, aꞌyaꞌma kinaꞌmiba: Paka pisoma, uwaisimumepa, isigeba kampa abintinisi to kake esegima kegaꞌe umaginisi maya untase: Waꞌega, Tebiti ntagara, kaeba tasigeka kantara purasitao, untase.

³²Piya yusuguna, Isu aeba abite keta asimagina mintana yoginisi kanausuguna: Nana purasitaomagirisi yesema, isibigantiye.

³³Piyama isibigaoginisi maya omintase: Waꞌega, tasiyo agarasitaoma yuse, untase.

³⁴Piya yusuguna, isiyora aukaya pogana pabigo isiyo apinaꞌma agantase. Aibuntinisi Isu aegaꞌma wantase.