Read Fore Matiyu 21 Bible Online

Matiyu 21 - Fore bible

Matiyu 21

¹Pigoya, wamagini Yerusaremi kumata uma irosakena puntawe. Piya puntini, Oribesi amuta irosaꞌma uwaena kumaꞌanto ka, agewapa Petipaesi pipa agaikena puntana Isuba abagi kinaꞌwampitisa tara yagarara uwaisimima isigarubaꞌmagina,

²maya untiye: Tisigeba maretaꞌi uwaena kumaꞌanto waintiti wamagirisi, tonki yaga anobe aikeribe igaꞌnara mintakibesa, uma iyobaꞌma isibabute kanaiso.

³Tisigeba piya pisigina kaꞌwaina tisibigakirisiba maya omiso: Waꞌega aeba pikaba aꞌyo mpaekenaga iye, omiso. Piya yisiginaba owe urisitakiye, piyama uwaisitaoginisi wantase.

⁴Pigoya, pintanaba uwaba kampaye. Poropete ae meto kamanaꞌama esegi penema piya puntane. Aeba maya kamana kaentiye:

⁵Tigeba Saiyoni kumatasa kinapa maya uwaimiyo: Abewo. Waꞌegari aeba aguparuyenawaka uma tonki yaga akabapi mima tigeti waye, iye.Pika aikeri yaga akabata mima waye, piyama kaentiye.

⁶Pigoya uwaisitaoginisi abagi yagara tara isigeba wamaginisi Isu nkawamu wasimaginisi,

⁷yaga anoke aikerige uma iyobaꞌurite kanausuguni, kaiwaipa atamagini abobori ama agutauguna ima mintantiye.

⁸Piya pogini, uwoma kinaꞌmi kaiwaipa atamagini keꞌi ama aguta wauguni, kaꞌisa kinaꞌmiba yanta aerisaꞌma agurite wantawe.

⁹Aibuntini, uwoma kinaꞌmi aoribe akaꞌibe wama iꞌmu potama maya untawe:We, Tebiti ntagara taeti kanaye. Waꞌegawama nkawamuta kanaika taꞌmu potano.We, inatisa yagaraga taꞌmu potano, uta wantine.

¹⁰Pigoya Yerusaremi kumati iyogini, kuma ago kinaꞌmiba pami pumagini maya untawe: Pipa ke kanagini yewe, yuguni,

¹¹maya uwaimintawe: Poropete Isu, aeba Karariya mari Nasareti kumatasa aborantiꞌna pimpaye, piya untawe. Tabe mono namapi ikantana puguna Isu igarubantiye

¹²Pigoya, Isuba pitaꞌi tabe mono namapi iyomepa pitaꞌi ikantana puma mintuguna, igarubantana mono ankami ankami pume kinaꞌmi ntabaebe kabara ataume ntabaebe apasanaꞌma asunukaentana,

¹³maya uwaimintiye: Mono isaꞌama maya iye: Mono namantepa nunamu ukena namantana peno, iye. We, tigeba piya kuntana pe kinaꞌmi ntamantana piye, uma igarubantiye.

¹⁴Piya utegina, pi tabe mono namapinti mintogini iyorika kinape iraena ibome kinape aeti kanauguna kaba itantiye.

¹⁵Piya pogini, tabe mono kiye kinaꞌmibe mono tisa kinaꞌmibe igeba pi esegiyena ometana agantini yagara araga tabe mono namupi iꞌmu potamagini: Tebiti ntagara taeti kanagi taꞌmu peno, piya yuguni abintini, igeba kamparaga potamagini,

¹⁶Isu maya omintawe: Ma nkaraga yagarami iꞌmu pugatapa abeno, untawe. Piya yuguna Isu maya untiye: Naeba ago abuwe. Piya, mono kamana ka waintipa mayama kampa aisewo: Inamu kina nonotasa kinaꞌmi inta maema aseꞌyo pegana iwamupi Kotiti iꞌmuntana aogima aboraye, pipa kampa aisewoma, ibigantiye.

¹⁷Aibumagina, akabiwaitate Yerusaremi kumatisa tumimagina Petani kumati ima ase yogana waintiye. Isu yogana piki ya asawantiye

¹⁸Pigoya, abayara tabe kumati aꞌwae puma kanaogana agaꞌena abuntiye.

¹⁹Piya pogana ke awamora piki ya ka agategina wama agori aꞌwaka uma aguyosagaomepa aꞌyenkamana waintogana agantiye. Agate kana ya maya omintiye: Kaeba apa toganaba kampa aekibene, yogana, pabigo kana yaba tamiriꞌma asamagina pari puwantiye.

²⁰Piya pogini abagi kina igeba agategini pami puma maya untawe: We, ma ntaba nana pumagina agaropa asaye, untawe.

²¹Piya yuguna Isu maya uwaimintiye: Naeba taga urimekiri abiyo: Tigeba tiguꞌama tara tara kampa punta esegima timatiti pumagiri mikibepa, pipa yara kukantana aboramisa puma pipe to kaꞌisaena pikibewe. Piya, tigeba maro amuꞌamaka: Kaeba tigabaꞌma wanipinti tumo, yesinta, pabi ikibesa pesine.

²²Pigoya, aogima timatiti puma mintiri aꞌyaꞌwaemaenaga esotaiginaba Koti aborarimikiye, Isu piya untiye. Kiya kinaꞌmi Isu amiyo puma abigantawe

²³Pigoya, wama tabe mono namapi ima mono untiye. Umagina mintogini, monotasa tabe kiye kinape Yuta kinaꞌmi monota kabiyume kinape igeba aeti wamagini maya uma abigantawe: Kaeba mataꞌi aꞌyaꞌwaemaena pempepa ke nkawamuta pene. Ke ugatagina pene, untawe.

²⁴Piya yuguna, Isu kamana maya uma aꞌwae pumagina uwaimintiye: Naeba ka kamana tibigakiri unamigi, naeba pabiyama ke nkawamutapaya aꞌyaꞌwaemaenaba poka pipa antotapa urimukuwe:

²⁵Yoni mono wani paiꞌitantintana aetasa aborantiye. Pipa mantarisaenabera wasanamintanawema, ibigantiye. Piyama ibigaogini igeba: Nana kamana omusune, ugate uwa asabaꞌwantawe. Aibuntini maya untawe: Taeba mantarisaenawe yekanaba, nanaga kamanaꞌwapa kampa abintawe, ukiye.

²⁶Piya, wasanamantanawe yekiniba, wasanamiba Yonikaba tabe poropetewe umagini ataena puratakibewe, untawe.

²⁷Piya utegini igeba: Kampa abintune, untawe. Piya yuguna Isu kamana mayama aꞌwae puwaimintiye: Pi yepa kanarana, pipa naeba pabiyama ke awamutapaya aꞌyaꞌwaemaena poka antotapa kampa urimukuwe, Isu piya untiye. Ka yagarama ntagara taramisi meto kamanane

²⁸Piya untana to maya untiye: Kamana ka urimekiri abimagiri agaiyo. Ka yagarama ntagara tara mintantase. Aibusuguna aeba amaru yagarawa maya omintiye: Yagarane, ibaba kaeba wamagina waini yugaena uma po, omintiye.

²⁹Piya omogana kana yagara aeba maya untiye: Aerawane, kampa nabosagaye, untiye. Piya utegina ainti to uma aꞌwae puma napimagina uma puntiye.

³⁰Piya pogana isibaba aeba to aintisa yagara pabi yoga kamana omogana maya untiye: Naeba kanaraka uma pukuwe, untiye. Piya ute ainti antawama ata pogana atate wagaintiye.

³¹Pigoya, tigeba aentagaramaba abawampa nkawamu wasintiyeba yewe, untiye. Piya yogini igeba: Amaru yagarawampawe, untawe. Piya yuguna Isu maya uwaimintiye: Naeba tagaka urimukuwe. Ae pemisa puma takisi maeya ku kinape kupiyo waepe paitamagini Koti kabiratakenaenama nkagupi uma pasigiri, tigeba aintisaena pikibewe.

³²Piya, Yoni ampa irosaꞌma arupu puma mikena ki tiyakogiripa, tigeba monoꞌwapa aꞌa-o yuguni takisi maeya ata kinape kupiyo waepe ige uwasuwama aꞌyugu mikenaenawaipa atategini wasintane. Igeba piya puguripa, tigeba igantiripa aintiba kampa tintara pumagiripa kampa aꞌwae pumagiri abintane, Isu piya untiye. Waini yugara kamparaga kinaꞌmi kabinta meto kamanane

³³Piya umagina, Isu to maya untiye: Naeba to ka kamana urimukuwa, abiyo. Wasana kaꞌwaina mawata waini kurintiye. Kuꞌma aꞌya atamagina, ainkima kagisa kimagina waini anti airakenaena puntiye. Piya potama yoga kiye pikena nama kitama kiya kabiwaitate to mari wantiye.

³⁴Umintogana nakena aborakena kana aboraogana, kayokaya kinaꞌwa: Waini naeꞌena kaꞌisa maete kanaiyoma, uwaitaogini wamagini kiya kabima miyume kinaꞌmiti uma irosantawe.

³⁵Irosaꞌma yuguni, kana yoga kiye kina igeba kayokaya kina irakuꞌma kapa uwa aeguntini, kapa ara aeguntini, piya kapa yaba kasutasa ausa aeguntawe.

³⁶Piya puguna yogawama nkababa to kake uwoma ntagara uwaitaogini ampa irosauguni pabiyaena puwaitantawe.

³⁷Piya puguna ainti aeꞌwa ntagara mayama napimagina otantiye: Yagarane agarubakana wakiniba ae awamu wasikibewema, napintiye.

³⁸Piyama napima otagana ampa irosaogini agate, kana yoga kiye kinaꞌmiba maya mare-u me-u puntawe: Aintiba pi ae kana yuga maesanaga, taeba aepa aegugaite aintana pekana taeꞌenaena pikiye, untawe.

³⁹Piya yuguna pabigo ampa irosaogini, agaruba urite yoga awamori uma aegumagini kaintawe, Isu piya untiye.

⁴⁰Pi kamana uma aꞌya atate, Isu wasana ibigama maya untiye: Yogawama nkabawampa aeba ampa irosantanaba, aintiba kana waini yuga kiye kinapa aya puwaitakiyema, ibigantiye.

⁴¹Piyama ibigaogini igeba maya omintawe: Kamparagaena potantaka pabiyama kamparagaena puwaitama iyegukiye. Aibuntana waini yugawatapa aogi kiye kina ibabuwaitakini igeba aꞌyaꞌma yagaba wainiwapa maema amimagini mikibewe, untawe.

⁴²Piya yuguna Isuba maya uma amato puma uwaimintiye: Mono isapi kamana ka waintipa, pipa tigeba kampa aisewa, a. Pipa mayamawe:Nama kikena kinaꞌmiba ka ya ago kainta ntawama iba waꞌega ya asima waintiye, iye.Pintanaba Waꞌegawamaba ago pega taeba agantompeka taꞌmu pune, untiye.

⁴³Pika urimukuwa abiyo: We Yuta kina, Koti kabiratakenaenaba tigetisa tipaꞌma to aoso kina, mono auꞌwapa maema aborakibe kina imikiye.

⁴⁴(Pigoya wasana kaꞌwaina pi waꞌega yara aeguma au aerisa puma aikiye. Pipa pi waꞌega yawamaba pipa wasana to kaꞌwaina abobora tumpa waima aeguma aigisebaꞌma aerisa puwakiye, Isu piya untiye.)

⁴⁵Meto kamana piya yogini monotasa tabe kiye kinaꞌmibe Parasi kinaꞌmibe igeba abibebe pumagini: We, pipa taeka iye, untawe.

⁴⁶Piya ute arakuꞌma aegukena napiyumepa, wasanamiba Isukaba: Poropete yagarawe, yumeka iyekuru pumagini uwa atantawe.