Read Fore Matiyu 22 Bible Online

Matiyu 22 - Fore bible

Matiyu 22

¹Pigoya, Isuba meto kamana to ka amato puma maya uwaimintiye:

²Mantari kabiratakenaenaba mampabisa tabe yagara kaꞌwainata awame pukuwe, untiye. Piya, tabe yagara kaꞌwaina yagarawampa nkwae ibaꞌena pomuguna tabe naninta maema kao puntiye.

³Piya puntana kayokaya kinaꞌwa uwaitaogini aꞌyaꞌma uwaiminti kinaꞌmiti wama kegaꞌe uma ibabikena wantawe. Wama uma uwaimuguni: Aꞌa-o, untawe.

⁴Piya yuguna tabe yagara aeba kayokaya kinaꞌwa to kaꞌisa mayama uwaitama untiye: Tigeba wama naokinati wama maya uwaimiyo, untiye: Tabe yagara aeba ago naninta maema aki pugasima yegini uwoma apa purumaka ago aegumagini kao pugasawe. Aibumagini aꞌyaꞌma nanintaba ago maema aogi pumagini tiyobi pewe. Pika tigeba kanaigi yagaranepa waya ababomima kana naninta namagi taꞌmu potano, iyema uwaimiyoma uwaitaogini wantawe.

⁵Pigoya igeba wama uma uwaimuguni, kamana abima aekita potate, kaꞌwaina aeba yogawati wantiye. Aibogana to kaꞌwainaba situwawata kabikena wantiye.

⁶Piya pusuguni to kaꞌisa kinaꞌmiba kayokaya kinaꞌwapa irakuꞌma iyegumagini kaintawe.

⁷Piya puguna tabe yagara aeba ata pumagina irebu kina uwaitaogini igeba uma iyegumagini namankaipa yaku nkigiꞌma kaewaegaintawe.

⁸Piya puguna tabe yagara aeba to kake kayokaya kinaꞌwa maya uwaimintiye: Nanintaba ago kao pugasune, piya kegaꞌe uwaimintompe kinapa igeba iyekita pumagini kampa kanapa aerana, kasiyo.

⁹Piya, tigeba keꞌi nasi nasi pumagiri wasana ibatakibepa ibabute kanaiyo, untiye.

¹⁰Piya yogini kayokaya kina igeba keꞌi nasi nasi pumagini uwa kamparaga kinape aogi kinape aꞌyaꞌmagini ibabuguni irosaꞌma namapa ampa pumaema mintantawe.

¹¹Mintuguna tabe yagara aeba igakena iyomepa, ka yagara aogi kaiba kampa aminta uwa ima asu mintogana agate maya omintiye:

¹²Naoꞌyagara, kaeba aya pegina kaigapa aogiyenaba kampa amirinta asumintane, yogana, aeba kamana asaba wantiye.

¹³Aibogana, tabe yagara aeba kayokaya kinaꞌwa uwaimima maya untiye: Tigeba agisa ayata kirokaema tununtanabinti apasanaigina tumima, pitaꞌi tumpimagina awamu uparisa puma kubeꞌena pumagina miyeno, Isu piya untiye.

¹⁴Piya untana to maya untiye: Pi puntisa puma igegaꞌe unta kinapa uwomane. Piya, ibabuma kibiꞌitanta kinapa tarantowe, Isu untiye. Takisi monega Isu abigantawe

¹⁵Isu piya uwaimogini, Parasi kina igeba ka auꞌi wamagini kamana tobi tabi potama arakurikena kamana uma abintawe.

¹⁶Piya puntini, ibagi kinaꞌwaipe Eroti nkaokina kaꞌisamipe: Kamana uma aborama, uwaimuguni igeba Isuti wama maya untawe: Tisa, taeba kae agoba abune. Kaeba taga ntagara mintane. Piya, ima tumima minta kinakaba kampa karu punta esegiyenawaika kampa kaekuruba puma Koti mponoꞌama kipa kanara uramima tayakene.

¹⁷Piya, ka kabigakuna, uramo: Mono kinaꞌmita, taeba Aroma waꞌega yagara Sisa takisi mone amusupera kampaye, untawe.

¹⁸Piya yuguna intabaipinti kumpari kamanaꞌwai igate maya untiye: Kumpari kina, tigeba nanaga minaga punatakenaga yewe.

¹⁹Tigeba tabe yagara Sisa mone ame, pi ka nayakigi agano, untiye. Piya yogini mone ka maema ayakuguna ibigama maya untiye:

²⁰Amankape awaꞌenabe mapa kewema, ibigaogini

²¹igeba: Sisantawe, untawe. Piya yuguna maya uwaimintiye: Pigo yewa, Sisantanaba Sisa amiyo. Piya, Kotintanaba Koti amiyo, untiye.

²²Piya umagina uwaimogini, igeba abima pami potategini atate wantawe. Purintapisa asikenaenaga Isu abigantawe

²³Pigoya igeba wauguni, pabintaga kaꞌisa Sarusi kina igeba Isuti ampa irosantawe. Pi kina igeba: Purintapisa asikenaenaba kampa waintiye, piya uma miyume kinane.

²⁴Pi ige Isu maya uma omintawe: We tisa-o, Moseseba kamana mayama kaentiye: Wasana kaꞌwaina yagarawa kampa aboratanta purekanaba aꞌnanto kiyaba maetama aganto antotapa yagara aborano, untiye.

²⁵Pigoya, abakatepi ka agaꞌna tonaentisa tara umaema mintantawe. Aibuntini marusa iganto waya maemagina yagara kampa aboranta mima puꞌwaogana, aꞌnanto kiya aetantiye.

²⁶Aeba pabiyama yagara kampa aboranta mima puꞌwaoganaba, aꞌnanto to kaꞌwaina kiya waepa pabiyama taetantiye.

²⁷Piya pumagini tonaentisa tara umaema agaꞌnaba aꞌyaꞌmagini puꞌwaewauguna, kiya wae aeba ainti mima purintiye.

²⁸Piya, igeba ka waeꞌamana aꞌyaꞌmagini maentaka, ainti asiratakena yagaba ke nkwae mikiyema abigantawe.

²⁹Piyama abigauguna Isu maya uwaimintiye: Tigeba mono kamanape Koti nkesegiyenagabe kampa napima kamanapa umagiri ata pewe.

³⁰Asikena yagaba wawayapa to kake kampa maekibewe. Igeba enisore miyesa puma asu mikibewe.

³¹Pigoya, tigeba asikenaenaga yepa urimukuwe. Koti aeba kamana urimintipa, pipa tigeba aisuma kampa abewa, a.

³²Maya urimintine: Naeba Abaraꞌamu, Aisaki, Yekobu ige Koti mintuwe, untiye. Piya untika, aeba puꞌwanta kinaꞌnane. Aeba iyoganta kinaꞌmi Koti mintiye, Isu piya untiye.

³³Kamana piya yogini, wa waya aꞌyaꞌma kina igeba mono yomeka abima pami puntawe. Isu mono aiꞌnega abigantawe

³⁴Pigoya, Isu kamanaꞌama Sarusi kina irakuꞌma akunogini, Parasi kina igeba abite aki puntawe.

³⁵Aki pumagini kamana awaꞌena abinta, iyoꞌyagara ka otauguna agoꞌena pumagina maya untiye:

³⁶Tisa, mono kamana aiꞌneba aeꞌna tabeba piye, untiye.

³⁷Piya yogana Isu maya omintiye: Kaeba aꞌyaꞌma kagu kaumakape napiyenagape Waꞌega Kotigapa aꞌyaꞌma amegana waiyeno.

³⁸Pi kamanapa mono aiꞌneba asugasimagina waintiye.

³⁹Pigoya to ka abae wainti, isigeba ka awametane. Pipa mayama: Kaekaka kabemisa puma pabi nkawameta kaokinaka kabeno.

⁴⁰Pi kamana aiꞌne taramisi Mosese nkago kamanape poropete kina ige kamanape agona pese, Isu untiye. Isu aeba Karaisitika Parasi kina ibigantiye

⁴¹Pigoya, Parasi kina aki pumagini mintuguna Isuba ibigamagina maya untiye:

⁴²Tigeba Karaisitikaba nanawe yewe. Aeba ke ntagarawema, ibigaogini, igeba Tebiti ntagarawe, untawe.

⁴³Piya yuguna Isu maya uwaimintiye: Piya, Tebiti aeba Awamusaꞌama otaogana ayaga utaratanta yagara Karaisitikaba Waꞌeganeneba, omintiye. Aeba maya untine:

⁴⁴Tabe yagara aeba nae Waꞌegaba maya omintine: Kaeba nayatakanti ampintaga, kama kinakapa kagisabi ibabuma aki peno, untiye.

⁴⁵Pigoya, Tebiti aeba nanaga agaꞌnukaba: Waꞌeganeneba, untiyema, ibigantiye.

⁴⁶Piya uma ibigaogini igeba kamana aꞌwae puma omikenaga napigate uwa atantini, pi ntaga aeka karu puntawe. Piya puntini, aintiba to kake kampa kamanapa abigantawe.