Read Fore Matiyu 23 Bible Online

Matiyu 23 - Fore bible

Matiyu 23

¹Pigoya pi ntagaba Isuba kaꞌisa kinape abagi kinaꞌwape maya uwaimintiye:

²Mosese marutapa mono tisa kinake Parasi kinake miyewe.

³Pika kamana aborama urimigiripa abimagiri wasiyiyo. Piya, igewai miyesa pumaba a-mpiyiyo. Igeba kamana iwamupisa untiniba agowapa kampa wasiyewe.

⁴Igeba kuntaena asaema tibota aesagatitate, igewaipa uwa ika miyewe.

⁵Pi aꞌyaꞌwaemaena pepa iꞌmaete imaena mana pewe. Igeba mono nunamurasa tusantanawai puwaitagini pu uꞌma, toma tomantana maema paentaenabi miyewe.

⁶Piya pumagini, tabe naninta nakena yagabe mono namapi mikena yagabe marusa yabaera paitama asu misanaga ibugaye.

⁷Wa waya uwa kinaꞌmi keꞌibe kumatibe iꞌmu purataiyema iyowa agasiya pumagini mintini, igewaipa tisawe uwaimisanaga ige atakae puma miyewe.

⁸Pigoya, tigeba pipa tisawe uramiyomaba a-siyo. Tisaripa Koti abintowe. Piya, tigeba uwa aꞌyaꞌmagiri aganto aꞌnanto mintawe.

⁹Pigoya, mabi kawainaka tabaweba a-siyo. Mantari tibarimpaba kaꞌanto mintiye.

¹⁰Pigoya kiya kinateneba a-suritaiyo. Kiya yagararipa Karaisiti aeba kaꞌantowe.

¹¹Piya, tigeti kiya ima mikibiꞌnaba tige kayokayaꞌena peno.

¹²Piya, kaꞌwaina aeꞌwa nkaumarasa au maete ima miyekanaba, merunkaba potakiye. Piya to kaꞌwaina au maete tumima miyekanaba ababuma mesuba potakiye, Isu piya untiye. Mono tisa kinake Parasi kinake igeꞌma kamana Isu untiye

¹³Piya yogana Isu amato puma maya untiye: We, mono tisa kinake Parasi kinake kumpari kina, tigeba ataenabi mikibewe. Nana pegiri wasanami igeba mantari kabiratakena kumati uma pasikena yegiripa ke akunkigasawe. Tigeripa kampa uma pasintiri ige uma pasikena yegiripa aꞌa-o uma akaꞌya waitawe.

¹⁴We, mono tisa kinake Parasi kinake, kumpari kina, tigeba tara taraena puma, ataenabi mikibewe. Tigeba eꞌero nunamurasa agoꞌena pumagiri ainti abeya waeꞌmi mpone kutankai aꞌyaꞌma aisaga, piꞌna nkantotapa aintiba kamparaga ikantana maekibewe.

¹⁵We, mono tisa kinake Parasi kinake, kumpari kina, tigeba ataenabi mikibewe. Tigeba wanipe mabe agasigasima nasimagiri to marisa kina ababuma tibagi kinati me nkatakena wantiri, pigo tige kamparagaena pesa puma ayakigina aeba tigasimagina tabera kamparagaena puma aꞌabibi tumikiye.

¹⁶We, tiyorika kiye kina, tigeba ataenabi mikibewe. Nanaga mayaba yewe: Tabe mono namata aigima uma esegi pepa pipa kamparine. Pigo tabe mono namatasa aogi awaꞌenawata aigima esegi puma ukenagaba nanaga tagakaba yewe.

¹⁷We, tigeba aibo kina tiyorikane. Awaꞌena pipa uwaenawe. Awaꞌena wainta aota namankama asugasima aeba tonawe.

¹⁸Pigoya, to kapa mayawe yewe: Aratara aigima uma esegi pepa pipa kumparine. Pi arata aboborisa aꞌmuntanara aigima esegi puma ukenagaba, nanaga tagakaba yewe.

¹⁹We, tiyorika kina tigeba, aꞌmuntana pipa uwaenawe. Aꞌmuntana wainta aratawama asugasima aeba tonawe.

²⁰Pika kaꞌwaina aeba aratara aigima uma esegi pekanaba arata aeꞌwape abobori waintintanabe kagaꞌena pukiye.

²¹Pigoya, kaꞌwaina aeba tabe mono namata aigima uma esegi pekanaba, pipa mono nama aeꞌwape kana mono namapi miyiꞌnape kagaꞌena pukiye.

²²Piya, kaꞌwaina aeba mantari aigimagina uma esegi pikibipa, pipa Koti marunkape kana marunkama nkababe kagaꞌena pukiye.

²³We, mono tisa kinake Parasi kinake kumpari kina, tigeba ataenabi mikibewe. Yogarisaenabe to kaꞌisaena maema nayataraꞌmu aki pumaꞌma kapa Kotinta atakena kamana yewe. Piya puntiri ka aukaꞌi auꞌwantagaꞌena monota uma arupu puma, agama kaoꞌena puma kamana ago wasima aegarakenaenaba pipa kampa pewe. Ka wasintiri to kapa wasiyiyo.

²⁴We, paitama miye tiyorika kiye kina, tigeba maeyaena pewe: Wanitipisa kiꞌnunkama agama maema maebugasagana, tabe yagawamaba kampa aganta pabigo asagaꞌyuma paga iyopotaye.

²⁵We, mono tisa kinake Parasi kinake kumpari kina, tigeba, ataenabi mikibewe. Tigeba tuꞌnatipe kankaberipe aririsaba wani nkaema waeꞌwae puntiri antabaipintisa kampa aeyobagana iꞌnintanabe aguntaenabe awaitama waintiye.

²⁶We, Parasi kaorika kina kaeba, marupa tuꞌna kankabegapa antabaipintisa kaꞌena waintipa, pipa waninkaema aogi pugaite ainti aririsaba waninkaema aeyobao.

²⁷We mono tisa kinake Parasi kinake, kumpari kina, tigeba ataenabi mikibewe. Wasana aru piyama mintawe. Wasana aru aboboriba awaꞌena puma aogi pugasawe. Piya, antabaipintiba puꞌwanta kinaꞌmi ayampube karebe kobabe waintiye.

²⁸Tigeba pabiyama tipa wasana iyora aogi tiwa maema miyewe. Piya tintabaipinti pipa kumparipe monoꞌama aguya aikenaenabe awaitama waintiye. Tisa kinapa kamparaga ikantana maekibewe Isu untiye

²⁹We, mono tisa kinake Parasi kinake, kumpari kina tigeba ataenabi mikibewe. Tigeba poropete kinaꞌmi nkiru paga pumagiri aogi pewe. Piya puntiri paisa mono kinaꞌmi nkiru yugaba awaꞌena puntiri,

³⁰maya yewe: Tayabamagi mintantata miyompesinta, igepa kampa iyoꞌmaema poropete kinapa iyegumagi ataenaba kampa puwaitaompesine, yewe.

³¹We, tigeba piya kamana umagiri poropete iyegunta kina ige igaꞌnugi miyepa agoripa uma aborawe.

³²Piya, tiyabamagi kaintaba uwa inatasa atata kanantagiri, tigeba pabita amato pegana tabe kuntu piye.

³³Tigeba kuyarawe. Tigeba maꞌama nkawarorawe. Kaintanama nkantota aꞌabibinti tumikena yaga aborakiripa aeta paiꞌma wama kakakibewe. Pipa kampaye.

³⁴Pigoya abiyo: Naeba tigeti poropetebe, aogi napiyena puma abinta kinape, mono tisa kinape, uwaitakini uma irosaigiripa, tigeba kaꞌisaba iyeguma kamparaga puwaitakibewe. Piya puntiri kaꞌisaba maripora iyeguntiri, kaꞌisaba mono namapinti eru kasutasa iyeguma aꞌyaꞌma kumati igarubata nasikibewe.

³⁵Piya pugini, aogi kinaꞌmi korankai uwarakaꞌya airiꞌma ataena purite kanama mintanta, piꞌna nkantotapa tigeti ampa aborarimikiye. Pai Eboro, aetasa maꞌena aborama purite kanama Perekaya ntagara Sekaraya ae tabe mono namapi arata agora aeguma aꞌya puntane. Piꞌna nkantotapa tigeti ampa aborarimikiye.

³⁶Pika taga urimukuwa, abiyo: Pi aꞌyaꞌma kamaena purite kananta, pi kaintanaba ma kanabi mpiye kina tigeti ampa puma aꞌya pikiye, Isu piya untiye. Isu Yerusaremi kumatasa kinamika kubeꞌena puntiye

³⁷Piya untana Isu to maya untiye: We, Yerusaremi kina, Yerusaremi kinaꞌmitaba, tigeba nanaraka poropete kama puwaitama mono kina tigeti uwaitantapa yaba kasutasa iyeguma kaiyawe. Kokorewama awagiꞌnu agagatasa isamu puma agagapinti itamagina miyemisa pumagi, naeba tigepa agasiyama ibabumagi nagora aki puwaitakena yuwagini, aꞌa-o urite kanamagini mintantane.

³⁸Pika nama kumatipa kasakana kabu isubumagina waikiye.

³⁹Piya yekiri abiyo: Naeba titakiri kampa naganta mirite wamagiri, asaba: Waꞌegawama nkawamuta kanaika ae taꞌmu potano, ukibepa, pi ntagaba tigeti to kake aborakuwe, Isu piya untiye.