Read Fore Matiyu 24 Bible Online

Matiyu 24 - Fore bible

Matiyu 24

¹Pigoya Isu aeba tabe mono namapisa irosaꞌma waogini, abagi kina igeba ainti wantini tabe mono nama aogima kimarantakini agama agabantini omuguna,

²maya uwaimintiye. Ma kanabipa waiyegiri agawe. Pigoya, naeba tagaka urimukuwa abiyo. Kama kinaꞌmi irosaꞌma nama kumatiba akasagasuba kasigina, ka yabankamaba to ka yabankama nkabobora wareꞌnaigina nama tubo aborama waikiye, Isu piya untiye. Aintiba uwoma kuntuyena aborakiye, Isu untiye

³Piya ute Oribesi amuti ima mintogini, abagi kina ibiwai agora wamagini abigama maya untawe: Pi yempentanaba ae ntaga aborakiye. Pipa kaega ampa irosakena yagawo, mampa aꞌya pikena yagawo aborakena pekanaba, nana kukantana kapa aborakiyema, abigantawe.

⁴Piyama abigauguna Isu maya uwaimintiye: Ainti kaꞌwaina kumpari urigasima tiguꞌama maema aꞌyugu puritasanaga aogima kiya kabimagiri miyiyo.

⁵Piya wasana uwoma kina irosaꞌma nae nage umagini: Naeba Karaisiti nawe umagini, uwoma kinaꞌmi nkiguꞌama paibumagini kamparaga puwaitakibewe.

⁶Pigoya, maꞌena pewe kamana abintiripe, esiba kamana abitegiri tiyekuruba a-puma: Kana aꞌya piyeba, a-siyo. Pi maꞌena maru pikibepa, asa akaꞌi agogo yaga aborakiye.

⁷Maga maga kinaꞌmiba kamaena pigini, to kaꞌisa kinaꞌmiba to ka marisa kina uma iyeguyigini kamaena purite wagana pikibewe. Kaboba tabera aborakana imimapa tabera purite wagana pikiye.

⁸Pigoya pi ntagaba marusaena uwa tiki nakiyenaba tabera aborarimikiye.

⁹Pigoya, pi ntagaba tibabute wamagini tiki nakiyena purintini tiyeguma kaikibewe. Aꞌyaꞌma marisa kinaꞌmiba naetaka kama puritamagini kamparaga puritakibewe.

¹⁰Piyaena aborakiniba uwoma kinaꞌmi monopa kaitegini iyokinaka minagaꞌena pumagini igobi puma kamparaga uwaitakibewe.

¹¹Piya pigini, uwoma kumpari poropete kina ampa irosaꞌmagini, napi napiyenari maema aꞌyugu purigaikibewe.

¹²Pigoya mono aguya aikenaenama anosama abae pekana, agu kaoꞌenaba uwoma kinaꞌmitiba kaka wakiye.

¹³Pigoya kaꞌwaina aeba monopa esegima aegaꞌmagina mintakana kanaꞌwapa aꞌya pekanaba, ababikiye.

¹⁴Pigoya Koti kabiratakena aogi awaga kamanaꞌama maga maga wagana pumagini, aꞌyaꞌma marisa kinaꞌmi ige agowaipa maema aborakana, kanapa aꞌya puwakiye, Isu piya untiye. Aintiba kamparagaena aborakena kamanane

¹⁵Piya untana Isu to maya untiye: Poropete Taniyeri kamana kaenti, pipa pasema aisuma abiyo. Piya, ma nkisapi aisuma agakibe kinaꞌmiba aogima abiyo. Pi kamanaꞌama esegi pekanaba kamparagaenaba tabe mono namapi ataigiri tiniꞌena pikibewe.

¹⁶Piya pumagiri igate, Yutiya mari mikibe kinaꞌmiba tiyegaka amu mari iyiyo.

¹⁷Piya pigini, wasanami abeꞌi mintakibetisaba namatipinti aꞌwae pumagiri ima kotatipa a-mpaentiri uwa waiyo.

¹⁸Piya, to wasanamiba yogari mintakibetisaba aꞌwae pumagiri waꞌeri a-nkwama kai kabiripa a-mpaentiri uwa waiyo.

¹⁹We, pi kanabipa igaꞌentaga waepe inamuganto mono amikibe waepe kamparagama mikibewe.

²⁰Tigeba Waꞌega esotaigina abintakiri, tiyegaka paiꞌma wakenaenaba esiba yagabe sabatirape a-nkaborano.

²¹Piya, pi ntagaba tabe kuntuyena aborakiye. Pintanaba ma aborantitasaba kampa aborantine. Aintibe to kake kampa aborakiye.

²²Piya, Kotiba kanapa kasama arosakenaenagaba umarantine. Kampa piya untemisinta, wasana kaꞌwaina mono maema mikenaenaba pipa kampa aboramisine. Piya, Koti aeꞌwa nkibabikena kinaka umagina kanapa kasama, arosakiye.

²³Pigoya: Karaisitiba mataꞌi taeti aboraya, marotaꞌi igeti aboraye, piya kamanaꞌama wagana pekiripa, a-nkabiyo.

²⁴Piya, pi ntagaba kumpari karaisitibe kumpari poropetebe ampa irosaꞌma kukantanaba toma toma agasiyaena pumagini wasanami abikenaenawaipa maema aꞌyugu puwae igaikibewe. Piya puntini Koti aeꞌwa nkibabikena kinaꞌmi nkabikenaenawai maema aꞌyugu puwaigaikenaba kasaꞌenabe awameꞌenabe tabera aborakibewe.

²⁵Pigoya naeba maru urimoka, ainti aborakiripa aibopa a-piyo.

²⁶Pigoya, pika kaꞌme mpari Karaisiti aboragi agaune yigiripa, a-nkwaiyo. Piya nama pitaꞌi mataꞌi aboraye yigiripa, pipa a-nkabiyo. Kampaye.

²⁷Wasanama Ntagara naeba kakamaba kampa kanakuwe. Apayaena pegina aꞌyaꞌma aukaꞌi eꞌwasa puwamisa puma, naeba pabi nkawameta aborakuwe.

²⁸Eya, wasana purinta kina wainti mpari kegebankama kanama ampa aki pemisa puma, pabi nkawameta aborakiri nagakibewe, Isu piya untiye. Wasanama Ntagara tumikena kamanane

²⁹Piya untana Isu to maya untiye: Pigoya, tabe kuntuyena pikibi kanaba aꞌya puwakana, papa tunusekana, opa kampa eꞌwasa pekana, noriba tutu pekana, mantaba kuru pekana esegiyenawapa iyobaꞌma kareko pikiye.

³⁰Pigoya Wasanama Ntagara nae kukantanaba mantari aborakini aꞌyaꞌma maga maga kinaꞌmiba pi agate kubeꞌena pumagini nagisigi naeba mantarisa ibinankama nkabobori eꞌwasaena esegiyenanentaga tumpa irosakuwe.

³¹Piya, enisore kinaꞌnepa uwaitakini tabe kigaꞌe uma ma maretibe metibe, atibe abetibe naokinaꞌnepa kibiꞌmagini ibabuma aki pikibewe, Isu piya untiye. Piki yawamaka meto kamana untiye

³²Piya untana Isu to maya untiye: Pigoya, piki yawama kana aboragiripa agama abewe. Aꞌno mpaꞌma pari pegiripa agantiripa: Tabe pa tagiya wakena piye, yewe.

³³Pabiyama urimontana aborawae wakiri, agantiripa, naeka: Aeba kabera ampa asintiye, yiyo.

³⁴Piya, kamana ka taga urimukuwa abiyo: Ma kanabi miye kinapa kampa purinta uwa mintigina pi aꞌyaꞌwaemaenaba aborakiye.

³⁵Pigoya mantabe mabe aꞌya wakana, kamanaꞌnepa waiyaba waima kampa kakakiye, Isu untiye. Kaꞌwaina aeba kanapa kampa abintiye

³⁶Isu piya untana to maya untiye: Pigoya, pintana aborakena yagaga wasana kaꞌwaina kampagina abibebe puntiye. Piya, enisore kina igeba pabiyama kampa abintawe. Yagarawa naebe pabiyama kampa abintuwe. Nabanempa ae abintowa abintiye.

³⁷Piya Nowa mintanti kanabi wasanami aꞌyaꞌwaemaena puntasa puma, Wasanama Ntagara nae ampa irosakena yaga agarosakiniba pikibewe.

³⁸Piya, paipa wani kampa pagintoginiba, nanintabe wanipe uwa nantini, ibaꞌena puntini, pumagini aꞌyuguma mintantawe. Mintuguna, Nowaba pabigo wanipisa karebi iyogana,

³⁹tabe wani paꞌma ipirintantisa puma, Wasanama Ntagara nae ampa irosakena yagaba pabiya awameꞌena pikibewe.

⁴⁰Pigoya, pi ntagaba tara yagarara yogari mintisiginaba, Kotiba kaꞌwainapa ababuntana to kaꞌwainapa aꞌa-o uma atakiye.

⁴¹Piya, waya taramisi naninta kaoꞌena puma mintisiginaba, kaꞌwainapa ababuntana to kaꞌwainapa aꞌa-o uma atakiye.

⁴²Pika tigeba aogima kabiyiyo. Waꞌegaripa kanakena kanapa kampa abintawe.

⁴³Pigoya, tigeba agowapa mayama abiyo: Ka kumatasa kina ku kina ma aseka irosakiyema napiyisinta, iyogabama mima nama kumaꞌwaipa kabiyiginaba kuntanaba kampa maeyisine.

⁴⁴Pigoya, Wasanama Ntagara naekaba pabiyama kampa napikibe kanabi, kanakuboka aseyo puma miyiyo, piya untiye. Aogi yuga yagarage ata yuga yagarage isige meto kamanane

⁴⁵Piya untana amato puma maya untiye: Waꞌega kaꞌwaina kayokaya kinaꞌwampa ige kiyawaika otamagina maya omikiye: Naeba wama umintakanapa, kaeba kiya kabiwaitama asi nasiba naninta ka awameta imima miyo, ukiye. Pigoya, aeba ayama miyekanapa kiyaba mono wantaga awamu wasikenaena wantagane otaiyo.

⁴⁶Piya, aeba yoga otanta pipa aogima puma miyekanaba, waꞌega yagarawapa irosaꞌmagina abekanaba aꞌmu potakiye.

⁴⁷Naeba taga tagaꞌya yekiri abiyo: Aeba pi ntagaraba pipa kiya tabe otama aꞌyaꞌmaenawatapa kabiyenoma otakiye.

⁴⁸Pigoya, pi kayokaya yagara aeba waꞌeganepa agaropa kampa kanakiyema, antabaipintiba napimagina,

⁴⁹karana itamagina, kayokaya kina iyegumagina, nanintabe esegi wanipe nama aibo aboꞌena puma karana itakanaba,

⁵⁰togana waꞌega yagarawa aꞌwae puma kanakena kanapa, pi kampa napinta mintakana,

⁵¹agaronkanto irosaꞌma agarubaꞌma kumpari kina aiꞌaruyenabi atakana ata maru mpikiye. Pi mparupi igeba iwara upaba puma kubeꞌena puma mikibewe, Isu piya untiye.