Read Fore Matiyu 25 Bible Online

Matiyu 25 - Fore bible

Matiyu 25

¹Isu kamana ka maya untiye: Pigoya, pi kanabipa Koti kabiratakenaena nayataramu aratagawae igeta meto puma maya ukuwe, untiye. Piya, ibaꞌwae aoꞌmaekena puntini, igeba wama wasana keꞌi kabima mimagini, ababikena kaneꞌwaipa maete wantawe.

²Pigoya, nayakaꞌmu aragawae igeba aibona, piya to nayakaꞌmu aragawae igeba napi napiyena waintagana sumawe.

³Piya, aibo aragawae igeba kaneꞌwaipa uwa maete wama kampa napima waninkapa kampa awaitama tiginta wantawe.

⁴Pigoya, napi napiyena waintaga aragawae igeba wanipa awaitama ari atamagini kaneꞌwaipa maete wantawe.

⁵Piya puguna wasana kampa karuꞌena kanaogana, aobi puma mintuguna iwaiga ibogini waintawe.

⁶Waintuguna, aseka nkabubu saogana, kegaꞌe kamana ka mayama aborantiye: We, wasana ago kanaya, karuꞌena asimagiri uma ababiyo, untiye.

⁷Pigoya aratagawae igeba abite iyogama asimagini kaneꞌwai maema tabe puguna tantiye.

⁸Piya puntini, aibo aragawaeꞌmipa napi napiyena waintaga aragawaepa maya uwaimintawe: Taeba kanete tabe pokana tuꞌmakena piya, tigeba wanipa kapa ariꞌma na tamiyo, untawe.

⁹Piya yuguni, napi napiyena waintaga igeba maya uwaimintawe: Piya kampa pukune. Wanipa pipa kaga kampa kanarasaratakiye. Tigeba situwati wama ika piyo, untawe.

¹⁰Pigoya, igeba kaneꞌwaipika wani ika pikena wagasuguna aobi pume ntagara ampa irosaꞌma aratagawae aseꞌyo puma kaneꞌwaintaga mintume ige ibabogini wantawe. Wamagini kumati uma irosaꞌma namapinti ima kabe kitama naninta namagini mintantawe.

¹¹Mintuguni aibo aratagawae igeba kanama kegaꞌe umagini: Naba-o, naba-o, kabe aitatao, untawe.

¹²Piyama kegaꞌe yuguna maya uwaimintiye: Naeba taga urimekiri abiyo: Naeba kampa tigao kinatawa, wagasiyo, untiyema, Isu untiye.

¹³Piya, kanapa kampa abintaka, tiguꞌama kiyeba aogima kabima miyiyo, Isu piya untiye. Kayokaya kina mone asa iminta meto kamanane

¹⁴Piya untana, Isu to amato puma maya untiye: Aintiba tabe yagara kaꞌwaina punti, pi nkawameta aborakiye, untiye. Pi tabe yagara kaꞌwaina pagasa mari wakena puntana kiya kinaꞌwa igegaꞌe uma monewa kabitaiyema pako puma imintiye.

¹⁵Pigoya, ka kiye yagara mone asaba nayakaꞌmu ($5,000) amintiye. To kaꞌwaina tara asa ($2,000) amintiye. To kaꞌwainapa ka asa ($1,000) amintiye. Piya potate wantiye.

¹⁶Wagasogana pabigo 5,000 tora maeyome kiye yagaramaba agobima to kake aborakena yuga pogana to 5,000 tora aborantiye.

¹⁷Piya, to aoꞌyagara 2,000 tora maeyome, aeba pabiyama yoga pogana to kake 2,000 tora aborantiye.

¹⁸Pigoya, 1,000 tora maenti, aeba tabe yagarawampa moneba maete wamagina uma ka kuꞌmagina kaitaogana waintantiye.

¹⁹Pigoya, tabe yagarawai eꞌero kana mintana, aꞌwae puma kanantiye. Kanama mone iminti kiye kina igegaꞌe uma mone kamana abikena aki puntiye.

²⁰Piya pogana 5,000 tora aminti, aeba ampa irosaꞌma to kasa 5,000 tora me nkatantana maya untiye: Tabe yagarane, kaeba mone asaba nayakaꞌmu asa namintampetasa naeba yoga pogana, to kake nayakaꞌmu asa mampa aboraye, untiye.

²¹Piya yogana tabe yagarawampa maya omintiye: Kaeba aogi kayokaya yagaragawe. Kaeba aogiyena pene. Kaeba yogarapa aogima kabiyene. Kaeba uwaenarapa aogima kabiyempeka naeba ugatakana, to kaꞌisaenaba kabikibena, kaeba kanama tabe yagaragampa, naege ampima kaꞌmu po.

²²Piya yogana, 2,000 tora aminti kiye yagara aeba ampa irosaꞌma maya untiye: Tabe yagarane, kaeba mone asaba tara asa namintampepa, pitasa naeba yoga puma maema aki pogana to kake tara asa mampa aboraye, untiye.

²³Piya yogana tabe yagarawampa maya omintiye: Kaeba aogi kayokaya yagaragawe. Kaeba aogiyena pene. Kaeba yogarapa aogima kabiyene. Kaeba uwaenarapa aogima kabiyempeka naeba ugatakana, to kaꞌisaenaba kabikibena, kaeba kanama tabe yagaragampa naege ampima kaꞌmu po.

²⁴Piya yogana, ainti mone 1,000 tora aminti, aeba ampa irosaꞌma maya untiye: Tabe yagara, naeba agogapa mayama abintuwe. Kaeba agasiya yagaragawe. Kaeba to kinaꞌmi yoga pumarapisaba naninta uwa maeyane. Piya, to kinaꞌmi aintana asigimarapisaba uwa maeyane.

²⁵Pigoya naeba pika naekuru pumagi, ka mono asa namintampepa maete wama mabinti kaitaogana waintika, mampa maete mekamuwa maeyo, untiye.

²⁶Piya yogana tabe yagarawampaba maya kamana aꞌwae pomintiye: Kaeba kayokaya yagara ata yagara kamparaga yagaragawe. Naeba yogaba kampa punta uwa mima to kinaꞌmi pumarapisa maema nakena yuwe. Piya, aintanaba kampa maemagi uwa kupisa maema namigi nakena yuwe.

²⁷Naekaba piyama napimagina monenepa mone kiye kinaꞌmi imekini yoga puma to kaꞌisa maemagini atantaga ampaeyosintawe, untiye.

²⁸Piya ute to maya untiye: Tigeba mone apaꞌma nayataraꞌmu mone asa urinti ntagara ae amiyo.

²⁹Piya, kaꞌwaina Kotitisa maentintanaba aogima maema miyekanaba, pipa uwomantana to kake aboramikiye. Piya, to kaꞌwaina Kotitisa maentintana kampa aogima maema miyekiniba, apaꞌurigina pipa uwa mikiye.

³⁰Pi kamparaga kayokaya yagaraba arakuꞌma tununtanabinti apasanaigina tumeno. Pitaꞌi tumpima awamu uparisa puma kubeꞌena pumagina miyeno, Isu piya untiye. Wasanama Ntagara aꞌyaꞌma kina pako pikena kamanane

³¹Piya untana Isu to maya untiye: Pigoya, ainti Wasanama Ntagara naeba mantarisa eꞌwasaena wantaga enisore kinaꞌmi abakapi igege irosaꞌmagi, awaꞌena yabaeneta imagi mikuwe.

³²Piya punta, aꞌyaꞌma maga maga kina igegaꞌe yekini nae naora ampa aki puwaekibewe. Aibigi, kiya kaꞌwaina sipisipibe memebe pako pemisa puma, pabiyama pako pumagi,

³³sipisipiba nayatakanti aki puwaitanta, memeba nayakeꞌmasi aki puwaitakuwe.

³⁴Piya puwaitanta, naeba Waꞌegawaimpana nayatakantisa kina maya uwaimukuwe: Nabanempatisa akayona maenta kina, tigeba kanama Koti kabiratakena kasa kumati ampaema miyiyo. Pipa paitakaꞌya maba kampa aborantogana utaritantiye.

³⁵Piya, tigeba mayaena punatantaka: Nagaꞌena nabogiripa nanintaba namintane. Wanika nabogiripa namintane. Naeba to marisa namu kanaogiripa aogima nababuma natantane.

³⁶Nauka miyuwagiripa tigeba nautasaenaba namintane. Yonintana naboga waitamintuwagiripa tigeba kaoꞌena punatantane. Piya igaꞌna namapi mintuwagiripa kanama ampa nagantane. Pigoya pika kasa kumati ampaema miyo, ukuwe.

³⁷Piya yekini, monota arupu puma asoya puntaꞌnagiba maya kamana aꞌwae puma unamikibewe: Waꞌega, kaeba aeta kagaꞌenaba kaboga nanintaba kamintompene. Piya, aeta wanikaba kaboga kamintompene.

³⁸Piya, to marisa namupa aeta kanauku namapipa kababugatantompene. Piya, aeta kaukapa mintuku kautasaenaba kamintompene.

³⁹Piya, kapa aeta yonintanaba kaboganape igaꞌna namapipe mintuku uma kagama kaoꞌmaentompene, ukibewe.

⁴⁰Piya yigipa, naeba Waꞌegawaimpa naba maya uwaimukuwe: Naeba taga urimukuwa, abiyo. Tumima uwaena kanta puma miye naokina kaoꞌena puwaitantapa, pipa nae punatantasu piye, ukuwe.

⁴¹Piya utegi, nayakeꞌmasisa kina igepa maya uwaimukuwe: Kaniꞌena puritanta kina, tigeba nabanempaba Satanike aokinaꞌwake tayaba yaku kaewaitanti, pitaꞌi tumima miyiyo.

⁴²Tigeba maya puntawe: Naeba nagaꞌena nabogiripa nanintaba kampa namintane. Piya, wanika nabogiripa kampa namintone.

⁴³Piya, to marisa namu kanauwagiripa kampa nababuma aogi punatantawe. Nauka mintuwagiripa nautasaenaba kampa namintane. Yonintana nabogiripe igaꞌna namapi mintuwagiripe kampa ampa nagantane. Pigoya, tigeba tayaba yakupi tumpiyiyo, uwaimukuwe.

⁴⁴Piya uwaimekini, nayakeꞌmasisa kina igeba maya ukibewe: Waꞌega, kaeba aeta naninta wanika kagaꞌenaba kabogana mintukupe, to marisa namu kanaukupe, kauka mintukupe, yonintana kabogana mintukupe, igaꞌna namapi mintukupe, aeta kagamagi taekitaba pugatantompene, ukibewe.

⁴⁵Piya yigipa maya uwaimukuwe: Naeba taga urimukuwa abiyo. Tumima uwaena kina kanta puma miye naokina kayone puma kaoꞌena kampa puwaitantapa, pipa nae kampa punatantasu piye, ukuwe.

⁴⁶Pigoya, igeba iki naki puyaba kumati tumigini, pi aogima arupu puma miye kina igeba aꞌyaꞌma yaga miyaba kumati ima asu mikibewe, Isu piya untiye.