Read Fore Matiyu 26 Bible Online

Matiyu 26 - Fore bible

Matiyu 26

¹Pigoya, Isu aeba pi kamana uma aꞌya atate abagi kinaꞌwa maya uwaimintiye:

²Tara yaga aꞌya pekana Pasoba yagaba aborakiye. Pigoya, pi ntaga nabanempaba Wasanama Ntagara naepa wasanamiti unatakini maripora naegukibewe, untiye.

³Piya yogini, pabi ntaga tabe mono kiye kinape Isureyo kinaꞌmi kiye kinape, igeba monota paitanta yagara Kayapasi, ae namapi aki puntawe.

⁴Aibumagini pasema Isu arakuꞌma aegukena kamana uma abintawe.

⁵Piya puntini maya untawe: Ma nkaota yagaba kampa piya pukune. Aꞌyugu aꞌyaꞌma kinaꞌmi maꞌena puratasanagawe, untawe. Waya kaꞌwaina agunta wani Isu paiꞌatantiye

⁶Pigoya, Isu aeba Petani kumati wama Saimoni, karu yagarama ntamapinti ima naninta nantiye.

⁷Namagina mintogana, waya kaꞌwaina aeti wamagina tabe ikantana wantaga aogi yaba kankabentobisa aogi agunta masawae aꞌnoti paiꞌatantiye.

⁸Piya pogini, abagi kinaꞌmiba agate uma iyekita pumagini maya untawe: Pi tabe ikantana wantagaꞌenaba nanaga uwa kasaye.

⁹We, pitasa mone uwoma maema kusi kina imekana kanarasakenawe, untawe.

¹⁰Piya yuguna Isuba abite maya uwaimintiye. Tigeba nanaga ma kana waepa abima kunta potawe, a. Pi nkwaepa aeba naukaena punataye.

¹¹Pigoya, kusi kinapa asi nasi tigege miyigiri aintiba iyoꞌmaekibewe. Piya, naeba pipa tigegeba asi nasiba kampa mikuwe:

¹²Naeba ago purekini kainatakibewe, pika masawaepa nauꞌama paiꞌma aogi potaye.

¹³We, naeba taga urimukuwa abiyo: Maga maga aogi mono kamana urite wantiniba, ma nkwayaꞌma nauꞌama aogi potai, pi nkawaga kamanapa kaga urite waigini abae pikiye, Isu untiye. Yutasiba Isu minaga pikena mone maentiye

¹⁴Pigoya, nagisarisa tara tumpaema abagi kinaꞌwapisa ka yagara, agewapa Yutasi Isikerioti, aeba tabe mono kiye kinaꞌmiti wama maya uwaimintiye:

¹⁵Naeba Isu minaga puritakiripa, tigeba moneba ayaki namikibewema ibigantiye. Piyama ibigaogini, pabigo 30-wa siriba mone aisuma amuguna maentiye.

¹⁶Maeritegina Isu minaga pikena apasa puma mintantiye. Isu aeba abagi kinaꞌmige Pasoba naninta nantawe

¹⁷Pigoya, yisiti kampa wainta pareti nakena yaga agarosaogini, abagi kina igeba Isu abigamagini maya untawe: Taeba ibaba Pasoba nanintaba ae ntamapi kao pugatasune, untawe.

¹⁸Piya yuguna maya uwaimintiye: Tigeba kumati ima ka yagaramati wama maya omiyo: Tisarempaba kaeka maya iye: Kanaꞌne agarosagi kae namapi ima nabagi kinaꞌmige Pasoba naninta nakenaga yuwe iyema, omiyo, untiye.

¹⁹Pigoya, Isu yome kamanapa abagi kinaꞌmiba wasiwae uꞌmagini wama Pasoba nanintaba maema kao puntawe.

²⁰Piya puguna ase yogana, Isuba nagisarisa tara tumpaema abagi kinaꞌwapa ibabute pi ntamapi ima Pasoba naninta nantawe.

²¹Nantini Isuba maya uwaimintiye: Naeba taga urimukuwa abiyo: Tigetisa kaꞌwaina nae minaga pikiye, untiye.

²²Piya yogini, abagi kinaꞌmi intawamaba tabera kamparaga pogini ka ka abigaurite wama: Waꞌega, naeka iyepera kewe, untawe.

²³Piya yuguna aeba maya uwaimintiye: Ma ntagara tuꞌnapi naege aya kaga atami ntagara, ae naepa minaga pikiye.

²⁴Piya, Wasanama Ntagara naeba mono kamanata unatanti kiꞌi wakuwe. We, Wasanama Ntagara naepa minaga punatakibiꞌnaba ataenabi mikiye. Piya, pi ntagarapa wasanama kampa yakari potantesinta, kanara pesine, Isu untiye.

²⁵Piya yogana Yutasi, minaga yagaramaba pabigo abigama maya untiye: Tisa, naeka kapa yeno, untiye. Piya yogana Isu: Pabigo yene, untiye. Isu abagi kinaꞌwa ara naninta imintiye

²⁶Pigoya igeba naninta namagini mintuguna, Isuba pareti maema aꞌmu potama ako puma abagi kinaꞌwa maya uma imintiye: Mapa nae nauna, maema naiyo, untiye.

²⁷Piya utegina, waini kankabe pabiyama maema Koti aꞌmu potama maya uma imintiye: Tigeba aꞌyaꞌwaemagiri naiyo.

²⁸Mapa Kotiti aoso atokaekena korantene. Aꞌyaꞌma kinaꞌmiti aguntaenari aꞌsua penema ataritauwe.

²⁹Pigoya, urimekiri abiyo: Mabipa waini wanipa ibanto ainkagogo namagi aꞌya puwe. Pigoya to kake kampa nanta uwa mimagi ainti nabanempa kabiratakibi kumati tigege kasa waini nakune, untiye.

³⁰Pigoya, ini urite kumatisa wama tumima maro nkaukaꞌi Oribesi amuti intawe. Pita Isu akabita kena kamana untiye

³¹Pigoya keꞌi wantini Isu maya uwaimintiye: Mono isaꞌama naeka mayama unti, piꞌna esegi pikiye: Sipisipira kabima minti ntagara aeguyiginiba, kana sipisipi iyegaka aibarara puwakibewe, iye. Piya yemisa puma tigeba iba ma nkaseka aꞌyaꞌwaema natate tiyegakaꞌya puwakibewe.

³²Piya pigi purintapisa asinataka, Karariya mari wama paitaritakuwe, untiye.

³³Piya yogana Pita maya omintiye: Kaꞌisa kina igeba aꞌyaꞌwaemagi kaekaba abima katate ata pikibewa, pigoya naeba pipa kapa abimagi kampa katategi ataenaba kampa pukuwe, untiye.

³⁴Piya yogana Isu maya omintiye: Kampaye. Naeba taga ugamukuwa abo: Ma ibasa aseka kokorewama kampa aga untakana, kakaga yaga uwameka unatakibene, untiye.

³⁵Piya yogana Pita maya untiye: Kaeka kaeguntini naepa pabiyama naegukena pigipa, uwamegaba kampa ugatakuwe, untiye. Piya yogini abagi kinaꞌwampiba aꞌyaꞌma pabiya uwaentawe. Isu Kesemeni yugabi nunamu untiye

³⁶Pigoya, wama yogaba ka agewapa Kesemeni, pitaꞌi uma irosaꞌmagina Isuba abagi kinaꞌwa maya uwaimintiye: Tigeba mata mintiginto, naeba marotaꞌi wamagi nunamu ukuwe, untiye.

³⁷Piya ute, Pitake Sebeti ntagara tarage ibabute wantiye. Wantana pabigo napiyenawapa kunta puma kampa ayampu puma tabaraba puntiye.

³⁸Piya puntana maya uwaimima untiye: Nantawamaba tabera kunta puma puremantana nabiya, tigeba mata tiyogaba puma naege miyiyo, uwaimintiye.

³⁹Piya uwaimite, uwaenantora wama mabi uma parokaema maya uma nunamu untiye: Nabanempa, abegana kanarasakana ma nauki nakiyenaba naparo. We, nae napiyenanepa a-nkaegaranta, kaeka ntapiyena mana aegarao, untiye.

⁴⁰Piyama nunama ugaite kakaga abagi kinaꞌmiti aꞌwae puma kanama iwaita mintuguna igate, Pitapa maya omintiye: Tigeba naege uwaenantoba tiyogamaba kanara kampa misiwa, a.

⁴¹We, timiyoꞌena abekiri amu puma wareꞌnasanaga tiyogaba pumagiri nunamu yiyo. Tiguꞌamaba aseyo pegina aritiꞌamaba kunta piye, untiye.

⁴²Piya ute to kake wama kamana maya uma nunamu untiye: Nabanempa, nauki nakiyenama naparikena abegana kampa aogi pekanapa, uwa abiwaeyekana kae kamanaꞌama esegi peno, untiye.

⁴³Piya ute aꞌwae puma abagi kinaꞌpa iwaita mintuguna ampa ibatantiye. Piya pogana iyowama kunta pogana igate

⁴⁴itate to wama nunamu yogana kakaga puntiye. Kamana maru yome, pabi kamana uma untiye.

⁴⁵Nunama aꞌya atate aꞌwae puma abagi kinaꞌmiti kanama maya uwaimintiye: Tiwairabampa waikena untiripa, ainti piya piyo. Mapa Wasanama Ntagara nae agunta kinaꞌmiti unatakena kanaꞌne agarosaye.

⁴⁶Pika asiyigi wano. Minaga punatakibi ntagara pabigo irosaye, Isu piya untiye. Kama kinaꞌmi Isu arakurintawe

⁴⁷Piya uwaimima mintogini, nagisarisa tara tumpaema abagi kina igetisa iyoꞌyagara Yutasi aeba uwoma kama kinapa paita itaogini pabigo ampa irosantawe. Tabe mono kiye kinape Isureyo kiye kinape uwaitauguni, irebube maꞌena kasupe maete ampa irosantawe.

⁴⁸Pigoya, kana minaga yagaramaba marupa maya kamana uwaimintiye: Amo nakiri agantiripa, pimpayemagiri arakuriyo, uwaimintiye.

⁴⁹Piya uwaimite ampa irosaꞌma Isuti wama: We, Tisane, untana pabigo amo nantiye.

⁵⁰Piya pogana Isuba maya omintiye: Naoꞌyagara, yoga pikena ute kanampepa karuꞌena ibanto po, untiye. Piya yogini igeba pabigo kanama arakuꞌma ayatara kirokaentawe.

⁵¹Piya puguna Isuge mintume kina igetisa kaꞌwaina kasonkapa abamu kantibisa pabigo aꞌyu pumagina tabe kiye yagarama kayokaya yagara aegukena age arisa kaintiye.

⁵²Piya pogana Isu maya omintiye: Kasokapa maemo kabamu kantibinti paka puro. Kaꞌwaina aeba maꞌena puntanaba antotapa maꞌenamana aꞌyaꞌwaema kinapa iyegukiye.

⁵³Pigoya, kaeba naekaba nanawe yene. Nabanempapa kanara kampa esotakana pabigo uwoma enisore kina uwaitakini tumima naoꞌmaekibewema, kampa napiyewo.

⁵⁴Pigoya tumima naoꞌmaeyigina monota naeka meto kamana unta, piꞌna nkauꞌwapa kampa aborasanaga, uwa pintanaba aboranamikiye, Isu untiye.

⁵⁵Piya utegina uwoma kina arakurikena kanaume, igepa maya uwaimintiye: Tigeba naeka abeganaba kama yagara kanta pegiri irebu maꞌena kasutintaga kanama ampa nababewo. We, naeba asi nasi abora, tabe mono namapi mono urimima miyone. We, narakurikena untiripa pita narakurisanawe.

⁵⁶Piya, pipa uwaba kampaye. Pipa poropete kinaꞌmi mono isapisa kamanaꞌama esegi puwaeyenema aborawaentiye, Isu untiye. Piya yogini abagi kinaꞌmiba Isu atate aꞌyaꞌmagini iyegaka wawaegaintawe. Monota paitanta kiye yagarama ntamapi ababute intawe

⁵⁷Pigoya, irebu kina igeba Isu arakuꞌurite monota paitanta kiye yagara Kayapasi aeti ababute wantawe. Pi ae namapi mono tisa kinape kabiyume kinape aki pumagini mintantawe.

⁵⁸Pigoya Isu ababute wauguna, Pitaba igama maro ita maro ita putagina ainti wantiye. Wamagina uma irosaꞌmagina tabe kiye yagarama kagisa kagopi uma paꞌima kayokaya kinaꞌmi nkibakapi uma: Isupa ayabaya otakibeka agakuwe, ute uma maraꞌmintantiye.

⁵⁹Pigoya tabe kiye kinape aꞌyaꞌma monotasa kanisore kinape igeba Isu kumpari kamana maema aborama otamagini, aegukena kamana umagini abintawe.

⁶⁰Aibuntini kumpari kamanapa uwoma uma aboramagini abumepa aeguyema kamanapa kapa kampa aboraogini aguyosaꞌma mintantawe. Piya puguni tara yagararamisi aborama,

⁶¹Isuka maya untase: Ma ntagara aeba Koti tabe mono nama akasabaꞌma kakaga yaga aꞌya peka to kake kima aꞌya pukuwe yogara abintomene, untase.

⁶²Piya yusuguna paitanta kiye yagara aeba asimagina Isu maya omintiye: Kae kamana yepa nanaraka ugatagana pipa ka aukaꞌisaba ukena napiyepera kampaye, untawe.

⁶³Piya yogana, Isuba kamana kampa unta asabaꞌmagina mintantiye. Piyama mintogana monota paitanta yagara aeba to kake abigama untiye: Koti miyaba yagara, ae aobi kabigakanapa umagina esegi po. Kaeba Karaisiti, Koti Ntagaragabera kampayema, abigantiye.

⁶⁴Abigaogana Isuba maya untiye: Pabigo yene. Pigoya, ka urimukuwa abiyo: Aintiba Wasanama Ntagara naeba esegiyenama nkagowama ae ayatakanti mimagi mantarisa ibinankama nkabobori tumpa irosakiri nagakibewe, untiye.

⁶⁵Piya yogana monota paitanta kiye yagara aeba pi kamana abima amoꞌena puma kaiwa atutu puntana aokina maya uwaimintiye: Aeba Koti akayasotaya, pika nanaga to kake ukune. Pipa kampaye.

⁶⁶Pi kamanapa tigeba abimagiri, ayama napiyewe, untiye. Piya yogini igeba: Aeba ataena piya, aeguma kaiyo, untawe.

⁶⁷Piya utegini, igeba Isu nkaowapi kaisa potama aeguyuguni, kaꞌisa kinaꞌmiba iya kasu atamara aeguntini,

⁶⁸karana puma maya untawe: Kaeba Karaisiti yagara mintanapa, kaeguyemi ntagarama nkagewapa yo, untawe. Pita Isuka agantuwema uwame otantiye

⁶⁹Piya puma mintuguna, Pita aeba abeꞌisa kagisa kagopinti mintantiye. Mintogana, kayokaya araga kaꞌwaina aeti wama maya untiye: Kaeba Isu, Karariya yagara, aege miyempene, untiye.

⁷⁰Piya yogana, aeba wasana mintume kina ige iyobi uwame umagina: Nae kampa abinto kamana kaeba yene, untiye.

⁷¹Piya ute kabebi tumikena pogana, kayokaya araga to kaꞌwaina agate aeka wasana maya uwaimintiye: Ma ntagara Isu Nasareti kumatasa yagara aege miyine, uwaimintiye.

⁷²Piya uwaimogana Pitaba to kake uwame uma waya untiye: Naeba kana yagara aepa kampa agantuwe. Pipa Koti nkaobi taga suwe, untiye.

⁷³Piya otate mintogini, wasanamiba Pitati wama maya untawe: Taeba kamanakapa ago abibebe pune. Kaeba taga ige aruyenabisawe, untawe.

⁷⁴Piya yuguna, to kake Koti nkaobi uma esegima aꞌyugu kamana uma: Naeba kana yagaraba kampa agantuwe, uwaimintiye. Piya yogana pabigo kokore aga untiye.

⁷⁵Piya pogana, Isu kamana maya unti: Kokorewama kampa aga untakana kaeba kakagara uwame unatakibene unti, pi kamana napimagina abeꞌi wama tabera antara puma kubeꞌena puntiye.