Read Fore Matiyu 27 Bible Online

Matiyu 27 - Fore bible

Matiyu 27

¹Marogini tabe mono kiye kinape to kaꞌisa Isureyo kabiyume kinape aꞌyaꞌma aki puma Isu aeguma kaikena kamana uma esegi puntawe.

²Piya yuguni Isu ayatarara kirokaetama ababute tabe yagara Pairatiti metantawe. Yutasi uma kobama purintiye

³Pigoya purikiyema uma esegi puguna, Yutasi minaga yagara aeba agama abite: Nanaga piyaba puwe, ute, antawama kampa aogi pogana, kana 30-wa mone siriba amintapa maete kiya kina aꞌwae puma imintana uwaimima maya untiye:

⁴Naeba kumpari sumagi, kaintanawa kampa wainta yagara minaga pogana ataena piye. Piya yogini igeba: Taetiba nanaga kanama yene. Pipa kaeꞌenawe, untawe.

⁵Piya ute moneba aꞌa-o yuguna, pi tabe mono namapinti uma maebugaite kaiwa amirite wama uma kobantiye.

⁶Piya pogini, tabe mono kiye kinaꞌmiba kana moneba kita puntini maya untawe: Moneba wasana ikantanaga tabe mono namapisa monebisa atakanaba kampa aogi pikiye, untawe.

⁷Pigoya, kana monerasaba ayabusune, umagini mare-u me-u pumagini magabu pome ntagara ae ma, namu kinaꞌmi ige iru yuga, pitaꞌi aboranema ika puntawe.

⁸Pigoya, kana mawama nkageba: Kora mpawe, untawe. Piya kana agiba uwa waintiye.

⁹Pigoya, paipa mono kamana Poropete Yeremaya nkawamupi aboranti, pi kamanaꞌama nkauꞌwapa aboranti, maya untiye: Isureyo kina igeba ikantanawa 30-wa mone siribawe, untawe.

¹⁰Piya, kana monerasa magabu pome ntagara ae ma ika puntawe. Waꞌegawama unamintisa puntawe, Yeremaya piyama kaentiye, untiye. Pairati Isu abigantiye

¹¹Pigoya, igeba Isu tabe yagara Pairatiti ababute wauguna abigama maya untiye: Yuta kinaꞌmi Waꞌega Yagaraba kaewo, untawe. Piya yogana Isuba: Pabigo yene, untiye.

¹²Pigoya, tabe mono kiye kinaꞌmibe monota kabiyume kinaꞌmibe kamana otaugunaba, antotapa kampa aꞌwae puma uwaimintiye.

¹³Piya pogana Pairatiba abigamagina maya untiye: Kamana ugataganapa, nanaga kaꞌiba kamanapa kapa kampa yene, untiye.

¹⁴Piya yogana Isuba kamanapa kapa kampa aꞌwae pumagina yogana, kiya yagaramaba uwoma agi napintiye. Pairatiba Isupa maripora aeguyiyo untiye

¹⁵Pigoya aꞌyaꞌma kabu, Pasoba naninta nakena yagaba, pi mparisa kiya yagarama aeba Yuta kinaꞌmi nkigaꞌna kina kaꞌwainaka age yugunaba auꞌima iyoba imima mi pomekana piye.

¹⁶Pigoya, pi ntagaba ka kamparaga yagara igaꞌna namapi mintantiye. Agewapa Parabasiwe.

¹⁷Pigoya, wasana aki puma miwaentuguna Pairatiba mayama ibigantiye: Ke uwa ataoma yewe. Parabasipera Isu aeba Karaisiti yagarawe ye, ae uwa atasuwe, piya untiye.

¹⁸Piya Yuta kina igeba uwa Isupa igobi potama aeti metaume pi abintana piya untiye.

¹⁹Pigoya, Pairatiba kamana uma aꞌya pikena yabaera mintogana, wayaꞌwampa aeti maya kamana ataogana wantiye: We, naeba iba asekapa amonta agama aeka tabera nantara puwa, pi aogi asoya yagara uwa atao, untiye.

²⁰Pigoya tabe mono kiye kinape kabiyume kinape igeba aꞌyaꞌma kinaꞌmi imo atikebaꞌmagini maya untawe: Omigina Parabasi uwa atantana, Isupa aeguyenoma, omiyo, untawe.

²¹Piya yuguna kiya yagaramaba to kake ibigama maya untiye: Aepera, ae uwa ataoma yewe, untiye. Piya yogini igeba: Parabasiwe, untawe.

²²Piya yuguna maya uwaimintiye: We, Karaisiti yagarawe ye ntagara, aepa aya pukuwema, ibigantiye. Piyama ibigaogini, aꞌyaꞌwaemagini ka kamana umagini: Maripora pureno, untawe.

²³Piya yuguna Pairatiba to kake umagina: Nana kaintanarakawe, untiye. Piya yogini to kake tabe kamana uma: Maripora pureno, untawe.

²⁴Piya yuguna Pairatiba napiyomepa kamanaꞌwampaba kampa aogi puntiye. Piya pogini, pabigo tabe maꞌena pikena puguna, yogini wani amuguna iyora ayapa wani nkaentana maya untiye: Ma ntagarama kaintanaba naetiba kampa tamakaeyano. Pipa tige aꞌwae puma timuwe, untiye:

²⁵Piya yogini igeba iwamu kaꞌi kaꞌi: Kanarane, untawe: Pi kaintanaba taebe tagaꞌnugitibe taeti waikiye, untawe.

²⁶Piya yuguna, Pairatiba Parabasi uwa ataogana igeti waogana, Isupa eru kasutasa aegugasimagina, maripora aeguyiyema irebu kina ababuwaimintiye. Irebu kinaꞌmi Isu akayasotantawe

²⁷Pigoya, pi tabe kiye yagarama irebu kinaꞌwa kaꞌisamiba igeba Isu ababute namapintisa tumima, irebu kinaꞌmi ntamapinti ababute ima, yuguni aꞌyaꞌma irebu kinapa ampa aki puntawe.

²⁸Aki puwaeyuguni Isunta kaiwapa atagasima tabe yagaramanta tete kai potantawe.

²⁹Pigoya, ake wainta taminoku ka pugasimagini aꞌnotapa taminonkitantawe. Piya potantini, wantapa ka amuguna ayatakanti uꞌmagina tabe kina kanta puma mintantiye. Aibogini igeba wama agora uma irakabima akayasotama maya untawe: We, Yuta Waꞌega Yagara, kaeba aya pene, untawe.

³⁰Piya ute, igeba kaisa potama, wantawa apaꞌma pabigo aꞌno nkaiwaꞌma aeguntawe.

³¹Piyama aegumugaitegini, pi tete kaiba atagasimagini to kake aeꞌwa kai maema amitamagini maripora aegukena ababute wantawe. Isu maripora aeguyuguna purintiye

³²Pigoya, ababute wama keꞌi ka yagara uma abatantawe. Agewapa Saimoni aeba Sairini kumatasa, ae tutusotauguna Isunta maripoba maema aesagaꞌu ataogini wantawe.

³³Wamagini, maba ka agewapa Korikota, pipa kamanatepisa aꞌno nkayampu amuta, uma irosantawe.

³⁴Uma irosaꞌma waini wanipi asa tusa wanipa paigu puma amikena yuguna, nabigategina aꞌa-o untiye.

³⁵Piya pogini pabigo maripora itagintawe. Piya puguna maripora mintogini, kaiwata teteꞌena pumagini pako puntawe.

³⁶Piya puritegini maraꞌmimagini kiya kabitantawe.

³⁷Pigoya, aꞌnotapa agowapa mayama kaimaranta waintantiye: Mapa Isu, Yuta kinaꞌmi Nkwaꞌega kaema atantawe.

³⁸Pigoya, maꞌena kuntana yagara tara kaga maripora iyeguma to ayatari to ayatari pumagini isitantawe.

³⁹Pigoya pitaꞌi wa waya wate kanate pume pi kinaꞌmiba Isu akaya kamana omima maya untawe:

⁴⁰We, tabe mono nama akasabaꞌma kakaga yaga kima aꞌya pukuwe yempe ntagaragawa, kaeka kaupa aoꞌmaeyowe. Kaeba Koti Ntagara mintanapa, mariporasa iyobaꞌma tumowe, untawe.

⁴¹Pigoya, tabe mono kiye kinape kabiyume kinape igeba pabiyama akayasotama maya untawe:

⁴²Wasana kaꞌisa kina iyoꞌmaentikana, aeꞌwa nkauꞌamampa aoꞌmaekenagaba igiga pumagina kunta piye. Aeba Isureyo kina tae Waꞌega mintanaba, mariporasa iyobaꞌma tumeka aeti uma atokaeyano.

⁴³Aeba: Naeba Koti Ntagara nawe, ute, amatitiꞌenawapa Kotiti atantegina waintika, pika Kotiba aeka abekanaba iyobaꞌatano, untawe.

⁴⁴Pigoya maꞌena kuntana yagara tara aeke kaga iyegunta, isigeba pabiyama akayasotama umaginisi kamparaga potantase. Isu puꞌwantiye

⁴⁵Piya potama mintuguna, kagi abebe pogana ase uma maba kanarasama waintogana atamaisa puntiye.

⁴⁶Piya atamaisaogana Isuba pabigo kegaꞌe uma maya untiye: Iro-i, Iro-i, arama sabatani, untiye. Pipa maya untiye: We Kotinempa, Kotinempa, nanaga natane, untiye.

⁴⁷Piya yogini, mintume kina igetisa kaꞌisa kinaꞌmi abite maya untawe: Mae ntagara aeba Iraiyaka kegaꞌe uma agisiye.

⁴⁸Piya yuguna, ka yagara aeba karuꞌena wamagina kai atuta asa wanipi aemagina asara kitamagina Isu amikena pogini kaꞌisa kinaꞌmiba maya untawe:

⁴⁹Kaeba uwa ataganao. Iraiyaba taga kanama iyobaꞌatakana tumeka agakune, untawe.

⁵⁰Piya yuguna, Isuba to kake tabera kegaꞌe yogana aumaba iwaegaintiye.

⁵¹Piya puroganaba, tabe mono namapi Koti nkaukaꞌi akumparanta kaiba atisa aturite tumima abeti tumpa tasawaogana tara awatentana puntiye. Piya puntana imimapa tabera pogana tabe yabapa aibako pumagina kuya mpaentiye.

⁵²Pigoya, pitaꞌi wasana iru wairite wanti, pipa aꞌwaiyogini mono kina, pai purinta kina, igetisa kaꞌisa kinapa iyogama asintawe.

⁵³Piya, Isu aeꞌwa paitama asiyogini igeba irubintisa imagini aota mono kuma, Yerusaremi, ima uwoma kinaꞌmi aborawaimintawe.

⁵⁴Pigoya, irebu kinaꞌmi kiye yagarabe aokinape Isuta kiya kabima mintume kinape, igeba pi imima pomepe to kaꞌisaenabe agamagini abite, iyekuru puma maya untawe: Ma ntagara aeba taga Koti Ntagarawe, untawe.

⁵⁵Pigoya, Isu aegunta pitaꞌiba wayapa uwoma pagasari mimagini pi puntanaba agama abintawe. Igeba Isu Karariya marisa aegaꞌma kanama kayokayaꞌena potantaꞌnagi,

⁵⁶igeba Mariya Matara kumatasa wa, piya to auka Mariyawa, Yemisike Yoseke isinowa, pigoya to kaꞌwaepa Sebeti ntagara tara isige isinowa, to kaꞌisa waena sumagini, igeba kaga mimagini agantawe. Isu kaitantawe

⁵⁷Pigoya asenamaisaogana, Arimatiya kumatisa aꞌyo ampiyome tabe kutantaga yagara, agewapa Yosepe, Isu mpono abima abagi puma mintantiye. Pi ae kanantiye.

⁵⁸Kanama Pairatiti wama, Isu yabaewaka omogana abite yogini irebu kina igeba amintawe.

⁵⁹Piya puguna Yosepeba wasana wasaba maema wae kairasa asagakokima maete wantiye.

⁶⁰Maete wama, yaba nkage, aewa nkaruwema kana kaba kuꞌmaranta, pipi Isupa metama tabe yabantama ka aꞌwarigasogana awaba aigunkaogana wantiye.

⁶¹Pigoya kana wasana aru awarapa Mariya Matara kumatasawa, to Mariya aoꞌwaena suma isigeba mimaginisi agantase. Irebu kinaꞌmi Isu nkarura kiya kabintawe

⁶²Marogana sabati aboraogini, tabe mono kiye kinape Parasi kinape igeba aki purite Pairatiti wamagini maya untawe:

⁶³Tabe yagarare, taeba kamana ka napiyompeka ugamukune. Aegutompe kumpari yagara aeba aogama mintana maya untiye: Puꞌmagi papa kakaga peka naogamagi asikuwe, untika asisanaga kabikibewe.

⁶⁴Piya abagi kinaꞌwampi wamagini kuntana isuꞌurintini ago asiwayema, wasana kampari uwaigaisanaga yegini irebu kina igeba arura esegima kiya kabimagini mintigina, kakaga yaga aꞌya peno. Paipa kumpari sumagina: Naeba Koti ntagara nawe untikana, aintisa kumpari kamanaꞌama abobori anosasanaga, uwoma tagi napima ugamune, untawe.

⁶⁵Piya yuguna Pairatiba maya uwaimintiye: Kanaraka irebu kina timekiri ibabute wama wasana aruba akumpa kiya kabiwaitaigini pasemagini mikibewe, untiye.

⁶⁶Piya yogini igebe irebu kinaꞌmige wama kana aruba akunkatamagini yabankama nkaboboriba araꞌena potama irebu kinapa itauguni kabima mintantawe.