Read Fore Matiyu 28 Bible Online

Matiyu 28 - Fore bible

Matiyu 28

¹Pigoya, sabatiba aꞌya puwaogini waintuguna marusa yaga aborantiye. Piya pogana marikena poginisi, Mariya Matara kumatasawa, to auka Mariyawa suma, isigeba aru agakena wantase.

²Wausuguna tabe imima pabigo pogana, Waꞌegawamatisa enisore kaꞌwaina mantarisa tumima yabapa aebasanakasogana aꞌwaiwaogana abobora mintantiye.

³Piya, apayaena kanta eꞌwasa pemisa aowarisaba puwaogana kaiwatisaba waeꞌwae puma ibina kanta puwantiye.

⁴Pigoya, arura kabima mintume kina igeba agate iyekuru pumagini tabaraba puma purikena kanta puma mintantawe.

⁵Pigoya, tara wae tara uma irosausuguna enisorewama maya uwaisimintiye: Tisigeba a-tisiyekuruba piso. Naeba abintuwa, tisigeba Isu maripora aegunta agakena kanase.

⁶Pigoya aeba mataꞌiba kampaye. Aeba maru urimintisa pumagina ago asiwaye. Tisigeba kanama marunkapa mampaye. Pipa agate,

⁷karuꞌena wama abagi kinaꞌwa maya uwaimiso: Isu aeba purintapisa ago asiwaye. Pigoya, Karariya mari wama paitaritakiya, tigeba pitaꞌi wama agakibewema uwaimiso. Pigoya, ago urisimuwe, untiye.

⁸Piya uwaisimoginisi, isigeba karuꞌena aruba irikabitate isiyekuru puma tabera isiꞌmu purite abagi kina uwaimikena karuꞌena wantase.

⁹Piya pusuguna keꞌi Isuba pabuma: Aya pese, untiye. Piya yoginisi, isigeba agora uma parokaema agisara arakuꞌma ae age maema asagaꞌyuntase.

¹⁰Piya pusuguna Isu maya uwaisimintiye: Tisigeba a-tisiyekuruba piso. Wama naokina uma uwaimisigini Karariya mari ima pitaꞌi nagaiyo, piya uwaisimintiye. Irebu kinaꞌmi kamanane

¹¹Pigoya waya tara isigeba wausuguni, wasana aru kiye kina igetisa kaꞌisa kinapa karuꞌena kumati ima, pi aborantintanama nkawaga kamana tabe mono kiye kina uwaimiwaentawe.

¹²Pigoya, kiya kina igeba monota kabiyume kina igegaꞌe uma igege kamana uma abiritegini, igeba irebu kina mone uwoma imimagini maya uwaimintawe:

¹³Tigeba maya yiyo: Aseka tauwaitamintokini, abagi kinaꞌwampi kanama Isu nkaupa kuntana isoꞌurewe, yiyo.

¹⁴Piya kamana kiya yagaramaba abite kaꞌena puritasanagaba a-tiyekuruba piyo. Taeba kanara uma kayone potakune, untawe.

¹⁵Piya uma uwaimuguni, irebu kina igeba pi mpone maeritegini kamana uwaiminta, pi wasintawe. Pigoya pi kumpari kamanaꞌamaba Yuta kinaꞌmitiba anosama tabe wairite kanantiye. Isu amuta aborama mono yugaraka uwaimintiye

¹⁶Pigoya, abagi kina nagisarisa ka tumpaema, igepa Karariya mari ka amuti Isu igegaꞌe yogini intawe.

¹⁷Imagini, aeꞌwa agate aeti uma parokaema agisuntawe. Piya puguni, kaꞌisa kinaꞌmiba iguꞌama tara tara puntawe.

¹⁸Piya puguna, Isuba igora wamagina maya uwaimintiye: Kotiba mantarisa mabisa esegiyenaba aꞌyaꞌma nae namiwaentine.

¹⁹Pika tigeba maga maga wama toma toma nae nage awaga kamana uwaimigini naegaraigiri, Nabanempawa, Yagarawa nawa, Aota Awamusana suma, tae tageraka mono wani paiꞌitaiyo.

²⁰Aibumagiri kamana uriminto kamana uwaimigini wasiwaeyiyo. We, tigeba abiyo: Naeba aꞌyaꞌma yagaba asi nasima tigege miyekana pi kanapa aꞌya pikiye, Isu piya untiye.