Read Fore Matiyu 3 Bible Online

Matiyu 3 - Fore bible

Matiyu 3

¹Pigoya pi kanabipa, Yoni wani paiꞌitanti ntagara, Yutiya mari aborama kaꞌme mpari umima, mono maya untiye:

²Koti kabiratakenaena agarosaya, aguntaenaripa kaite tigu aꞌwae piyo, untiye.

³Pigoya, pi ntagaraga poropete Aisaya maya unti, pipa aborantiye:Awaga kamana ikena yagara kaꞌme mpari mima, kegaꞌe uma mayama aboraye:Waꞌegawamanta ke iꞌma arupu puma amuyena piyo, piya untiye.

⁴Pigoya, Yoniba kaiwapa kamoro yaga ayatasa pumaranta, pi ami uꞌmagina, arirasa kante puma abamu kimagina, nanintawapa iroke tuke nama mintantiye.

⁵Pigoya, Yerusaremi kumatisabe Yutiya marisabe Yontani waninkama maroteri materi miyume kinape, aꞌyaꞌma aeti wawaentawe.

⁶Piya pumagini, aguntaena pume kamanaꞌwaipa uma aborauguna, Yontani anompapi paiꞌitantiye.

⁷Pigoya, uwoma Parasi kinaꞌmibe Sarusi kinaꞌmibe mono wanika irosauguna, Yoni igate maya uwaimintiye: Tigeba kuya awarorawe. Kotitisa amoꞌena aborarimekiri kakagaisanaga kebaya urimegiri mataꞌi kanawe.

⁸Tigeba aguntaenaripa kaitegiri tigu aꞌwae pigina, mono aꞌwapa aboraigiriba, wani kanara maekibewe.

⁹Pigoya, ti maete ikenaba a-puma: Taeba Abaraꞌamu nkagaꞌnuraga aogima mikunemagiripa, a-siyo. Pabigo urimekiri abiyo: Kotiba ma ntabatasa Abaraꞌamu nkaoso agaꞌnugi iba pikenaba agantiye.

¹⁰Piya, ya agaiyukena tupa ya agobi atantiye. Pi ntawama a kampa aogima aeyakanapa agaiyuma yakupi kaekiye, Yoniba meto kamana piya untiye.

¹¹Piya untana to maya untiye: Naeba tigu aꞌwae piyoma wanitasa paititauwa, nakaꞌi kanakibi ntagara, agewapa asunagasima waintika, naeba mayamanaba agisa anapa kampa arakae potakuwe. Pi ae Aota Awamusatasabe yakutasabe paititakiye.

¹²Aeba aka maete kanama, witi naninta ampa aigaga pumagina, anonkapa namapi atantana, ariwapa tayaba yakupi kaegaikiye, piya untiye. Yoniba Isu wani paiꞌatantiye

¹³Aibogana, Isu aeba Karariya marisa Yontani waniti kanama, Yoniti aborama: Mono wani paiꞌnatanema, omintiye.

¹⁴Pigoya, Yoniba abitegina kunta puma maya untiye: Ayamabaya kaeba naeti ampa piyama yene. Kaeba nae paiꞌnatagana kanara pikiye, untiye.

¹⁵Piya yogana, Isuba kamana mayama aꞌwae puma omintiye: Aꞌa-o, ibaba paiꞌnatao. Piya pekara, tasigeba Koti kamana aogima wasikuse, untiye. Piya yogana Yoniba abitegina paiꞌatantiye.

¹⁶Pigoya, Isupa paiꞌataogana aeba Yontani wanipintisa iyogana, manta kabi aꞌwaiyogana, agaomepa Koti Nkawamusaꞌama pupunta kanta purite aeti tumpintiye.

¹⁷Tumpintogana, mantabintisa kamana ka maya untiye: Mepa nabugai ntagaranene. Tabera naꞌmu potauwe, untiye.