Read Fore Matiyu 4 Bible Online

Matiyu 4 - Fore bible

Matiyu 4

¹Pigoya, Awamusaꞌama Isu kaꞌme mpari ababute wama, kewama amiyo potakenaga ababute wantiye.

²Pigoya, Isuba pitaꞌi nanintaga aꞌa-o uma, 40 yaga uwa miyogana agaꞌena abuntiye.

³Piya pogana, amiyo pikena agowama aeti aborama maya omintiye: Kaeba Koti Ntagara mintanapa, yegana ma ntabankama paretiyena pekana nao, untiye.

⁴Piya yogana, Isuba antota maya untiye: Mono isaꞌama maya iye: Wasanama nanintarasa kampa aꞌyaꞌma esegiyenawapa maekiye. Koti nkawamupisa mono pi abima esegiyenaba maekiye iye, untiye.

⁵Piya yogana, kewamaba Isu Yerusaremi kumati ababute ima, tabe mono nama nkagari mesutama,

⁶maya omintiye: Kaeba Koti Ntagara mintanapa, paꞌyo puma tumo. Piya, mono isaꞌama maya iye: Koti aeba enisore kinaꞌwa uwaitakini kabigatakibewe, iye. Piya, kaegukena pikibipa, iyatasa kababute tumigina, yabankamaba kagisaba kampa airisakiye iye, untiye.

⁷Piya yogana Isu maya omintiye: Pigoya, mono isaꞌama to ka maya iye: Waꞌega Kotigapa amiyo puma agakenaenaba a-po iye, untiye.

⁸Piya yogana, kewama to ababuma eꞌero nkamuti ima mesutamagina, aꞌyaꞌma mampabisa kumape igaenabe ayakimagina,

⁹maya omintiye: Nae nagisabi ampa parokaema nageba asagayuyegapa, aꞌyaꞌwaema waintintanaba kamiwaekuwe, untiye.

¹⁰Piya yogana Isu mayama omintiye: Satani, kaeba natate wagaso. Mono isaꞌama maya iye: Waꞌega Kotigapa, ae age asagayuma, ae abiwa kayokayaꞌena potao iyema, omintiye.

¹¹Piya omogana kewama atate waogini, enisore kina igeba irosaꞌma aogima kabitantawe. Isu Karariya mari wama mono yuga agobintiye

¹²Pigoya, Yoni arakuꞌma igaꞌna namapi atauguna mintogana, Isuba pi awaga kamana abitegina, pimpa atate Karariya mari wantiye.

¹³Wamagina Nasareti kumapa agaite Kapaniyamu kumati umintantiye. Pi kana kumapa kotu awamori, Seburonige Napitaraige isigaꞌnu mpara umintantiye.

¹⁴Piya pogana, pintanaga poropete Aisaya maya unti, pipa auꞌwa aborantiye:

¹⁵Seburonige Napitaraige isige mari, kotu awamori, Yontani waninkama maroteri waintipa,To marisa kinaꞌmi ampinta mpa, Karariyawa,

¹⁶Pita minta kinaꞌmiba tununtanabi miyeꞌnagiba tabe eꞌwasaena agawe, iye.Piya, purikena puma miye kinaꞌmiti eꞌwasa aboraye, piya untiye.

¹⁷Pigoya, pi ntagaba Isuba agobima mono untana, maya uwaimintiye. Koti kabiratakenaenaba agarosaya, aguntaenaripa kaite tigu aꞌwae piyo, piya uwaimintiye. Tarawa tarawaki kina igegaꞌe yogini aegarantawe

¹⁸Pigoya, Isu aeba Karariya kotu awamori wama nasi nasi puntana, tara yagarara isigaomepa, kapa Saimoni to agiwapa Pitabe, aꞌnantowampa Enturube, isigeba inoyanta aebusume ntagararaginisi, kotupinti kuko aibarekima wanipinti motausuguna, uma isigantiye.

¹⁹Piya uma isigate maya uwaisimintiye: Naegaraiso. Inoyanta aeyamesa puma wasana iba pikenaena tisiyakikuwe, uwaisimintiye.

²⁰Piya uwaisimoginisi, pabigo kukoꞌwaisipa atate aegarantase.

²¹Aubusuguna, Isu to nasi nasi puma to tara yagarara isigaomepa, Sepeti ntagara Yemisige aꞌnantowampa Yonige, isibawaisimpa Sepetige wanipisa karebi mima, kuko aogi puma mintuguna, ampa isigantiye. Pigoya, Isuba isigegaꞌe yoginisi,

²²isibawaisimpa pabi wanipisa karebi atate, Isu aegarantase. Isu uwoma kinaꞌmiti yoga puntiye

²³Pigoya, Isuba Karariya mari ainkima nasi nasi puma, ini namankaipinti ima mono kamana umagina, Koti kabiratakena kamanapa uwaimagina, yoni kinape iꞌama kampa aogi punta kinape kaba itantana puwaentiye.

²⁴Piya pogana, awaga kamanaꞌama Siriya mari abae purite wagana pogini abite, yoni kinape, iki nakiyena ibome kinape, ke kina intabaipinti minta kinape, aonanta puma wareꞌnaowa pume kinape, kebo kinape, aeti aꞌyaꞌma ibabute wauguna aogima kaba itawaentiye.

²⁵Piya pogini, Karariya marisabe, Tekaporisi kumatisabe, Yerusaremi kumatisabe, Yutiya marisabe, Yontani maroteri materisa tabe uwoma kina aki puma akaꞌi wantawe.