Read Fore Matiyu 5 Bible Online

Matiyu 5 - Fore bible

Matiyu 5

¹Pigoya, Isuba uwoma kina igate, amuti ima asu mintogini, abagi kinaꞌwa agora wauguna,

³Iguꞌamaka abegana kusi miye kina, igepa Koti kabiwaitakini iꞌmuntanabi mikibewe.

⁴Intaraꞌenabi miye kina, igeba aintiba mantarasaena intawama asoyaena pekini, iꞌmuntanabi mikibewe.

⁵Agoya puwaita kina, igeba aintiba aogi kumapa maema mimagini, iꞌmuntanabi mikibewe.

⁶Igaꞌena ibemi kina, igeba naninta wanika ibemisa puma Koti nkarupuyena ibemi kina, igeba aintiba igaꞌe pakini iꞌmuntanabi mikibewe.

⁷To kinaꞌmika intara pe kina, igepa aintiba Koti antara puwaitama iyoꞌmaeyakini, iꞌmuntanabi mikibewe.

⁸Aguntaena kampa napiye kina, igeba aintiba Kotipa agamagini iꞌmuntanabi mikibewe.

⁹Iꞌima paru puwaita kina, igeka Kotiba: Yagara araganene uwaimekini, iꞌmuntanabi mikibewe.

¹⁰Arupuyenaraka karana puwaitagini miye kina, igepa Koti kabiwaitakini iꞌmuntanabi mikibewe.

¹¹Pigoya, naeka wasanami kamparaga kamana uritama, karana puritama, agunta kamana uma kumpari uritagiripa, aintiba tiꞌmuntanabi mikibewe.

¹²Piya, tigeba aintiba aogi ikantanaripa mantariba taberakaꞌyane. Pika tiꞌmu puma tinta asoya puma miyiyo. Paipa wasanami poropete mintanta kinapa pabiyama karana puwaitantawe, piya untiye. Wasanaba kayoge kaneke waiyemisa puma miyeno

¹³Tigeba wasana ikapi mimagiri, kayo kanta puma mintawe. Pigoya, kayo iꞌnisama kasigabekapa, aya pekana to kake asabama iga pikiye. Pipa kampaye. Piyaena pikenaba kampa waintiye. Uwa asunu kaegasagini, wasanami pitaꞌi nasi nasi puma aeyese pewe.

¹⁴Pigoya, tigeba wasana ikapi kane kanta puma mintawe. Piya, kuma ka amuta abora waintakanaba, asekapa eꞌwasaenawapa aꞌyaꞌma wasanamiba agakibewe.

¹⁵Pigoya, kaꞌwaina kane igiꞌmagina kampa kankabe maema airari kaetantana, marunkata igiꞌma atakana, nama nkantabaipinti eꞌwasaba aꞌyaꞌma kina puwaitakiye.

¹⁶Tigeba etimpaba pabiyama wasana eꞌwasa puwaitano. Igeba aogima mikenaenari agaigina aogi pekini, mantari tibarimpa nkage asagaꞌyuyewo, piya untiye. Paisa mono kaikenaba kampa aborauwe, Isu untiye

¹⁷We, paisa ago kamanape poropete kinaꞌmi kamanape kaikena aborantiyeba, naekaba a-siyo. Naeba kaikenaba kampa aboramagi, naeba to wasima abae pikenaba aborauwe.

¹⁸Naeba taga urimekiri abiyo: Mage mantage waiyemisa puma, Koti nkago kamanapa uwa waikiye. Ka awaꞌenaba kampa kakawakibikana, uwa waikiye.

¹⁹Pigoya, wasana kaꞌwaina Koti unti kamana ago uwaenanto ka kasimagina to kinakaba: Piyama kasiyema uwaimikibiꞌnaba, ae ageba uwaenanto Koti kabiratakibi ntagaba waikiye. Piya, kaꞌwaina aeba aꞌyaꞌma wasimagina to kinakaba: Piyama poma uwaimikibiꞌnaba, aeba pabiyama Koti kabiratakibi ntagaba tabe yagara ima mikiye.

²⁰Pika urimekiri abiyo: Arupuyenarimpa kampagina mono tisa kinaꞌmige Parasi kinaꞌmige arupuyenawaimpapa igaikibipa, aintiba tigeba Koti kabiratakenaenabipa kampa uma pasikibewe, piya untiye. Igobi pikena kamanane

²¹Pigoya, tayabamagi kamana maya uwaimintiye: Kaeba wasanaba a-nkaeguma kaiyo. Kaꞌwaina wasana aeguyekiripa, kamana abikena kinaꞌmiti ababute wama metaiyo, paisa kamanapa piyamagiri abewe.

²²Piya, naeba to urimekiri abiyo: Ka yagaramaba aoꞌyagaraga agobi potakanaba, pika kamana abikena kinaꞌmiti ababute wama kamana otakiye. Pipa kanarane. To waina aeba aoꞌyagaraga kamparaga kamana uma: Kani po omekiniba, ababute kanisore kinaꞌmi akiyenabi metakibewe. Piya, to kaꞌwaina aeba aoꞌyagaraga: Aibo yagaragawe omikibiꞌnaba, aꞌabibintisa yakupi wao, omikiye. Pipa kanarane, piye untiye.

²³Pigoya, kaeba kaꞌmuntana tabe mono namapinti maete ikena puntanapa: Naoꞌyagaramage kamanatesi waintiye, piyama napintanapa,

²⁴pabigo kaꞌmuntanaba arata agora atate tumima, wama kaoꞌyagaramage kamanatisipa uma aogi pugaite, aꞌwae puma ima kaꞌmuntanaba Kotiti aratarapa mesutagana aogi peno.

²⁵Pigoya, tigetisa kaꞌwaina kamana ugatakanapa, kamana abikena kinaꞌmiti kampa uma irosanta keꞌi wantirisi, pi ntagaramage kamanatisipa uma aogi piso. Piya kampa pikibempepa, ugatakibi ntagaramaba karuꞌena abikena kinaꞌmiti wama agoga yekana, abikena yagarama irebu kinaꞌwa uwaitakini, igaꞌna namapi katakibewe.

²⁶Naeba taga ugamukuwa, abo. Kaeba pi nkigaꞌna namapi mintanapa, uwaba kampa irosa wakibene. Aintiba iretaba amima aꞌya kaite, wakibene, piya untiye. To wae kuntana paibikena kamanane

²⁷Pigoya, kamana paipa maya uwaimintine: Kumiyenaba a-po. Pi kamanapa abintawe.

²⁸Pigoya naeba urimukuwa, abiyo. Ka yagarama to wae kaꞌwaina agama agabakibipa, ae aumawama Koti nkaobi ago ata puma kumiyenaba potaye.

²⁹Pigoya, ka kaowama aguntaena pikena pekanapa, piꞌma maebugaso. Tarayaga kao waintakanapa kaeba aꞌabibinti tumisanaga, aogima kabiyo.

³⁰Kayatakantisa aguntaena pikena pekanapa, arisaꞌma maebugaso. Aogi kiyenayaga waima kaeba aꞌabibinti tumisanaga, aogima kabiyo, piya untiye. Waya kaikena kamanane

³¹Pigoya, paipa to kamanapa mayama uwaimintiye: Kaꞌwaina wayaꞌwa kaikena puntanaba, kaikena awaꞌena amimagina otano, untiye.

³²Pigoya, naeba urimukuwa, abiyo. Kaꞌwaina wayaꞌwampaba kupiyonaba kampa puntakana uwa kaikibipa, aeba ata potakana, karuꞌena kumiyenaba pikiye. Piya, to ka yagarama kainta wae maekibipa, aebe kumiyenaba pikiye, piya untiye. Koti nkaobi uma esegi pukena kamanane

³³Pigoya, tayabamagi to ka maya uwaimintine: Kaeba Koti nkaobi atamaba kumpari kamanapa uma esegiba a-po. Piya, ae aobi uma esegi pumaba wasiyegana, auꞌwa aborano, untine. Pi paisa kamanapa piyamagiri abewe.

³⁴Naeba pika urimukuwa, abiyo. Koti nkaobi uma esegi pentanaba ataiyo. Piya, mantara uma esegiba pipa a-piyo. Mantaba pipa Koti nkaemu yabaewe.

³⁵Piya, mara uma esegiba pentanaba pipa a-piyo. Maba Koti nkagisa aema miyemi mpawe. Piya, Yerusaremi kumata uma esegiba a-piyo. Yerusaremiba tabe Waꞌega Yagarama kumane.

³⁶Piya, tiꞌno nkabiyata uma esegiba a-piyo. Tigeba antugu tiꞌnu nkabiyema ka omigina, tunu pikibera, to ka omigina waeꞌwae pikiyo. Pipa kampaye.

³⁷Pigoya, pika kamanatipa tagaka owe uma, pabiyama aegaraiyo. Aꞌa uma, pabiyama aegaraiyo. To nara uma esegi pukibepa, pi kamanapa ke kinapisa aboraye, piya untiye. Antotaꞌenaba kampa pikena kamanane

³⁸Pigoya, paipa kamana maya untine: Kaꞌwaina kaoga airikakanapa, antota airikao, iye. Piya, kawa aibarara pekanapa, antota aepa pabiyama aibarara po, untine. Piya kamana abintawa,

³⁹pika to kapa naeba urimukuwa, abiyo. Tiyeguma karana titakena pigiripa, antotapa a-nkataenaba puwaitaiyo. Pika kaꞌwaina katamara kaeguyekanapa, to ka aukaꞌi aꞌwae puma amo.

⁴⁰Piyamaba, to kaꞌwaina kae kamana ugatamagina siyotiga maeyakanapa, muꞌmu siyotigapa kaga amo.

⁴¹Piyamaba, ka kiye yagara agaro kiꞌi nababute waoma ugamekanapa, kaeba eꞌero kiꞌi ababute wama aoꞌmaeyo.

⁴²Piyamaba, to kaꞌwaina kaꞌenaga esugatakanapa, amo. Piya, aꞌyo ukatakena yekanapa, owe otao, piya untiye. Kama kina agu kaoꞌena pikena kamanane

⁴³Paisa kamana ka mayama waintiye: Kaeba kaokina agu kaoꞌena potantana, kama kinakaba kagobi potao, untiye. Pi kamanapa abintawe.

⁴⁴Pika naeba urimukuwa, abiyo: Kama kinatipa agu kaoꞌena puwaitantiri, karana purita kina igeka napima nunamu yiyo.

⁴⁵Piya puntiripa, mantarisa tibarimpa ntagaraena puma mikibewe. Piya, Koti aeba yegina, pankamaba agunta kinape aogi kinape kaga eꞌwasa puwaitaye. Pabiyama yegina, kaba arupu kinape antage kinape kaga kanara tiyeye.

⁴⁶Tigeba agu kaoꞌena purita kina, igeꞌamana agu kaoꞌena puwaitaiginaba, aintiba aya iretaripa Kotiba timikiye. Pipa kampaye. We, takisi maenta ku kinaꞌmiba piyaba puwaitawe.

⁴⁷Piya, to marisa kinaꞌmiba iyokina aogi puwaitawe. Tigeba pabiyama tiyokinapa aogi puwaitantiripa, ayama igaikibewe. Pipa kampaye.

⁴⁸Abiyo. Tigeba mantarisa tibarimpa aota miyemisa puma, pabi nkawameta miyiyo, Isu piya untiye.