Read Fore Matiyu 6 Bible Online

Matiyu 6 - Fore bible

Matiyu 6

¹Tigeba aogima kabiyiyo. Aogiyena puntiripa, tipa wasanami nkiyobipa a-mpaete iyiyo. Piya pukibepa, mantarisa tibarimpatisa ka ikantanaba kampa maekibewe.

²Tigeba wasana kaoꞌena puma awagaena puwaitantiripa: Kaꞌisa kinaꞌmi tagama iꞌmu purataiyemaba, taberasaba a-kegaꞌe yiyo. Piya, kumpari mono kina igeba ini namapipe uwa keꞌibe: Tage maete ima iꞌmu puratayema, wasana kaoꞌena puwaitawe. Naeba tagaka urimuwe. Piya kinaꞌmiba wasana iꞌmu puwaita nkikantanawaipa ago maerekana, aintiba toba kampaye. Ige pesa puma a-piyo.

³Pigoya, kusi kina kaoꞌena puwaitaganaba, ka kaentisa kinaꞌma pukibintanaba to kaentisa kinaꞌmiba a-nkabiyo.

⁴Piya peganaba, kaoꞌenagampaba kakama waigatagina, kabagampa aꞌyaꞌmaena kakama waintintana agamagina, antotapa kamikiye, piya untiye. Nunamu ukena kamanane

⁵Pigoya, tigeba nunamu ukena puntiripa, kumpari kinaꞌmi yesa pumaba a-siyo. Pi kina igeba ini namapipe keꞌibe nunamu yepa, pipa: Wasanami tagama iꞌmu purataiyema, piyaba pewe. We, naeba tagaka urimuwe: Piya kinaꞌmiba auꞌwapa ago maentaka, toba kampa maekibewe.

⁶Piya, kaeba nunamu ukena puntanapa, namakapinti ima kabe kitama kabagampa kakama miyemiꞌna aeti nunamu yo. Piya pegana, kabagampa kakama agamagina, antotapa kamikiye.

⁷Pigoya, tigeba nunamuba uwa tiwamutasa urite wagana pumaba a-siyo. Pipa to marisa kinaꞌmintanawe. Pi kina igeba uwoma kamana aisurite wagana pekana: Koti abiramikiyema, yewe. We, pipa kampaye.

⁸Tibarimpapa kampa esotantagana, aeba agoripa ago abiwaeyagiri, tigeba ige yesa puma a-siyo.

⁹Pigoya, tigeba maya uma nunamuba yiyo:Taba, mantabinti mintane. Kae kage aota waiyeno.

¹⁰Kae kabiratakenaenagapa aborawaeyano.Mantari kae kawamu aegaꞌma wasikenaena waintemisa puma, pabiyama mabi taeti aborano.

¹¹Ibaba kaeba nanintarepa tae awameta tamo.

¹²Taoꞌmi kaintanawai nkatupa mae igasompe nkawameta kaintanare nkatupa maeragaso.

¹³Tamiyo pusanagaba aogima kabiratao.Kewama nkayapisa taba puratao, piya nunamu yiyo, untiye.

¹⁴Piya, tigeba wasanami nkaiboꞌenawaipa kasiginaba, mantarisa tibarimpaba pabiyama tigeꞌenaba maerigaikiye.

¹⁵Piya, tigeba wasanami nkaiboꞌenawaipa kampa igasiginaba, tibarimpaba aiboꞌenaripa pabiyama kaga kampa maerigaikiye, piya untiye. Naninta aꞌa-o uma mikena kamanane

¹⁶Pigoya, tigeba monoka naninta aꞌa-o uma mintiripa, tiyowa muruse puma a-mpiyiyo. Piya, kumpari mono kinaꞌmi ige piya pegana, wasanamiba ige naninta aꞌa-o uma miyentanawai igabebe piyema, iyowawamaba ataena pegini miyewe. Pigoya, ige pesa a-piyo. Naeba tagaka urimuwe: Igeba ikantanawaipa ago maentane.

¹⁷Piya, kaeba naninta aꞌa-o uma mintanapa, kaꞌnoti masawae paiꞌma kaowaena po.

¹⁸Piya pegini, wasanamiba naninta aꞌa-o uma miyempentanama nkagogapa kampa agabebe pegana, kabagampa kakama miyemi, ae abintowa abeno. Piya pegana, kabagampa kakama agamagina antotapa kamikiye, piya untiye. Aogiyena maema aki pikena kamanane

¹⁹Pigoya, tigeba mampabi aꞌyaꞌmaena aogiyenaba a-mpaema aki piyo. Kampaye. Mampabipa umuwama narigagina kasipama ataena pegina, ku kinaꞌmi agasabaꞌma kuntana pewe.

²⁰Piya, tigeꞌena aogiyenaripa mantari aki piyo. Pitaꞌiba umuwamaba kampa narigakanaba kasipama ataenaba kampa pekini, ku kinaꞌmiba agasabaꞌma kuntanaba kampa pikibewe.

²¹Piya, aogiyenaripa waintemi, pi kumakaba asi nasi napiyewe, piya untiye. Auꞌama nkeꞌwasaenama kamanane

²²Pigoya, kauꞌama kaneꞌwapa kaowe. Kaogapa aogima waintanaba, kauꞌamapa kanara eꞌwasa potakiye.

²³Kaoga tikaeyakanaba, kauꞌamaba pabiyama tunusu wakiye. We, kaguꞌama kaneꞌwa tuꞌma wakanapa, tabera tununtanaba aboragamekana kaorikaꞌena puma mikibene, piya untiye. Kaꞌwainaba tarara kayokayaꞌena kanara kampa pikiye

²⁴Pigoya, ka yagarama tabe yagararamisi kayokayaꞌenaba kampa kanara pikiye. Aeba kaꞌwainapa kayone potantana to kaꞌwainapa agama aekita potakiye. Piya pumagina, aeba kaꞌwainati uma atokaentana to kaꞌwainapa akabitakiye. We, tigeba pabiyama Koti ntugabe mone kutankama ntugabe ka awameta kanara kampa maekibewe, piya untiye. Arirasaenaga taberapa a-ntapi napi piyo

²⁵Pigoya, naeba urimekiri abiyo: Tigeba mikenaenarikaba: Nana nanintabe wanipe maema nakune. Tauꞌamakaba: Nana tautasaena maema purukunema, uwoma tigiba a-ntapiyiyo. Piya, naninta wanane. Mikenaenarimpa auꞌwantagaꞌenawe. Titasaena wanane. Tiꞌama auꞌwantagaꞌenawe.

²⁶Piya, tigeba inatisa kabara agaiyo. Igeba aintanaba kampa puma nanintaba kampa kubuꞌma namankaipi kampa aki pewe. Kampaye. Mantarisa tibarimpa nanintaba uwa aborama imiye. We, tigeba kabarapa kampaye. Ae aobipa tigeba wasanarawe.

²⁷Pigoya, tigeba napiyenari waintakiripa mampara to kake amato puma to kaꞌisa yaga mirite wakibewa, a. Pipa kampaye.

²⁸Piya pikenaena kampa waintegiripa, nana piyema kaigaba uma uwoma tigiba napiyewe, a. We, yaobisa ya aosa pamika agoba abiyo. Aeba aotasaenawampa ntugaba kampa piye.

²⁹Pika urimukuwa, abiyo: Paipa tabe yagara Soromoni aeba konariyenawantaga yagaramaba aogiyenaba purintomepa ya aosawamapa kampa againtiye. Kampaye.

³⁰Piya, yaobintisa aꞌno ibanto pabiyama aogima mparamagina, aiba pabigo paribekini yakupi maema kaekibepa, pipa Koti yegina aꞌnopa aogiyena maraye. We, tigeba kampa agama napiyegana timatitiꞌenaba uwaenantowe. Piya, Kotiba titasaenarikaba kabiritaye.

³¹Pigoya, tigeba uwoma tigi a-ntapimagiri: Nana nanintabe wanipe maema nakune. Nana maema amirikuneba, taberapa a-siyo.

³²We, to marisa kinaꞌmiba aꞌyaꞌmaena yontanaga napi napi pewe. Piya, mantarisa tibarimpa pi aꞌyaꞌwaemaenarikaba abintegiri, uwoma tigi a-ntapi piyo.

³³Pigoya, tigeba Koti kabiratakena monoꞌama nkauꞌwape arupuyenawape aborasanaga tigupa paitama ataigina waiyeno. Piya pigina, aeba mampara aꞌyaꞌmaenaripa kaga aborarimikiye.

³⁴Tigeba aisaenagaba uwoma tigiba a-ntapiyiyo. Aisa yagaba nana kuntuyenabaya aborakibi, pipa kampa abintawe. Aꞌyaꞌma yagaba kuntaenaba toma toma aboraurite wayema, pabinkanto uwa napiyegana waiyeno, Isu piya untiye.