Read Fore Matiyu 8 Bible Online

Matiyu 8 - Fore bible

Matiyu 8

¹Pigoya, Isuba amutisa tumogini uwoma kinaꞌmiba aegarantawe.

²Piya puguna, ka karu yagara aeti kanama ampa parokaema maya uma omintiye: Kae kabemika kaba nayakena puntanapa aogi punatao, untiye.

³Piya yogana, Isu aya parosuma auta uꞌma maya untiye: Piyaenaga nabiye. Pabigo kata wakana aogima miyo, untiye. Piya yogana, pabi ntaga kana karuyenawapa ata wantiye.

⁴Ata waogana Isu maya omintiye: Uwa kinapa a-nkuwaimima, kaeba marupa wama kaupa mono kiya yagara uma ayakegana agano. Piya, kaeba wama Mosese uramintintanaba Kotiti amegini, wasanamiba kagate: Aoso yagara miyema, napikibewe, piya omintiye. Isu irebu yagarama kayokaya yagara kaba atantiye

⁵Pigoya, Isuba piya potategina Kapeniyamu kumati aꞌwae puma wantiye. Aꞌwae puma waogana, Aroma kinaꞌmi irebu kiye yagara kaꞌwaina aeti irosaꞌma maya omintiye:

⁶Waꞌega yagara, kayokaya yagarane yonintana abegina agisa ayapa ago puꞌwaewamagina tabera aukegina mintiye, omintiye.

⁷Omogana, Isu abite: Naene ima kaba atakuwe, omintiye.

⁸Piyama omogana, irebu kiye yagara aeba maya untiye: Waꞌega, naeba tumima minta kina mintogana, nana pegina namantepintiba ubasikibene. Kaeba pitaꞌi uma mima kamana yegana kayokaya yagaranepa kabareno.

⁹Piya, naeba ima minta kinaꞌmi nkiwamu wasimagi, to kaꞌisa tumima minta irebu kinaꞌnepa kabiyuwe. Piya, igetisa kaꞌwainapa: Wao, omekanaba wakiye. To kapa: Kanao, omekanaba kanakiye. Kayokaya yagarane: Pi ntuga po, yekanaba pikiye. Piya, kiya kinaꞌmi yosa kamana yeganaba ata wano, untiye.

¹⁰Piya yogana, Isu pi kamana abima napi napi puntana, aegaꞌma kanaume kina maya uwaimintiye: Taga urimekiri abiyo: Isureyo kina, tigetiba ma ntagarama nkamatitiꞌena piya awametapa kampa agauwe.

¹¹Pika amato puma yekiri abiyo: Pankao irosamitisabe tupasemitisabe wasanaba uwoma namuꞌisa kina irosaꞌma, Abaraꞌamu, Aisaki, Yekobu, igege mantarisa kumati aki puma naninta kaga nama iꞌmu pikibewe.

¹²Piya pigiri: Taeba Yuta kina, mono ago kina mintune, ye kinaꞌmitaba, tigeba tununtanabi tumima tiwara upaba puma kubeꞌena puma mikibewe, untiye.

¹³Isu piya ute, irebu kinaꞌmi kiye yagara maya omintiye: Kaeba wao. Kamatitiꞌenagampa auꞌwapa aboragamikiyema, omintiye. Pigoya, kana kayokaya yagarawapa pabi ntaga kabaꞌma aogi puntiye. Isu Pita aentawa yoninka kaba atantiye

¹⁴Pigoya, Isu Pita ntamapi iyomepa aentawampa nkau yaku taogana awaita mintogana agantiye.

¹⁵Agate ayata urogana yoninkapa pabigo ata wantiye. Ata waogana, kana waeꞌmaba asima naninta maema Isu amogana nantiye. Isu uwoma kina kaba itantiye

¹⁶Aibogini, asenamaita ke kina intabaipinti minta kinapa uwoma ibabute kanagana puntawe. Piya puguna, Isuba ke kinaꞌwaipa kamanaꞌwatasa igarubantana, aꞌyaꞌma kinaꞌmi nkinuntanawaipa kaba itantiye.

¹⁷Piya pogana, poropete Aisaya kamana mayama kaemaranti, piꞌna esegi puntiye: Aeba anuntanarepa taparintana yonintanarepa aesagabintiye, piyama kaentiye. Isu aegarakena kamana untiye

¹⁸Pigoya, uwoma kinaꞌmiba aeti kanama ampa ainkiyuguna igate abagi kinaꞌwa: Kotu maroteri wakunema, uwaimintiye.

¹⁹Uwaimogini wakena puguna, mono tisa yagara kaꞌwaina agora wama maya omintiye: Tisa, kaeba pitaꞌi mataꞌi wakena yegapa naeba kaegarakuwe, untiye.

²⁰Piya yogana Isu maya aꞌwae pomintiye: Kabu kara igeba ageꞌwaintaga waintiye. Piya, inatisa kabara igeba inaꞌwaintaga waintiye. We, Wasanama Ntagara naeba nawaikena maruntepa kampa waintiye, omintiye.

²¹Piya omogini, abagi kina igetisa to kaꞌwaina mayama omintiye: Waꞌega abintaga, marupa wama nabanempapa puꞌwaka uma kaitate kaegarano, untiye.

²²Piya yogana Isuba maya omintiye: Monota puꞌwasu puma miye kinaꞌmiba igeba purikibe kinapa kanara kaiwaitakibewe. Kaeꞌenagaka ampa naegaraoma, omintiye. Pontawama Isu nkawamu wasintiye

²³Isu piya ute wanipisa karebi iyogini, abagi kinaꞌwa iyuguni wantawe.

²⁴Wauguna, pabigo pontaba tabera puma kotupa aigaꞌyoꞌya puma ataena puritegina wanipisa kare antabaipinti tumintiye. Aibogana, Isu aeba awaitamintantiye.

²⁵Piya pogini, igeba wama abage pumagini: Waꞌega, naisikena pune, untawe.

²⁶Piya yuguna maya uwaimintiye: Nanaga tiyekuruba pewe. Timatitiꞌenaripa uwaenantowa, a, untiye. Piya uwaimimagina, aeba asima pontabe wanipe tabe kamana uwaisimoginisi uwasuwa puntase.

²⁷Aibogini, pi kinaꞌmiba agate uwoma nkigi napima maya untawe: Aeba nana yagaragana, pontawamake waninkamakeba awamupa wasiyese, untawe. Isu tara kinaꞌmisi ke kina igarubantiye

²⁸Pigoya, Isuba kotupa taꞌema maroti Katara kinaꞌmi mpari wama uma irosantiye. Uma irosaoginisi tara yagarara ke kinaꞌwaisintaga kanama ampa abatantase. Isigeba wasana irubintisa kanamaginisi agasiya pusuguni iyekuru puma pitaꞌiba wasanaba kampa nasi nasi puntawe.

²⁹Isigeba Isu agateginisi kegaꞌe uma maya untase: Kaeba Koti Ntagaragawa, nana purasitakena kanane. Kanapa kampa agarosantegina kaeba ata purasitakenaga iyenoma, untase.

³⁰Pigoya, pagasari uwoma ntaga naninta namagini mintantawe.

³¹Mintuguni, kana ke kina igeba Isuka maya uma esotantawe: Tagarubakena puntanapa, urataga pi ntagami nkintabaipinti tumpa paseno, untawe.

³²Piya yuguna Isu aeba: Karuꞌena aeꞌwaiyo, uwaimintiye. Piyama uwaimogini, kana yagara taramisi isintabaipintisa irosaꞌmagini, yaga intabaipinti uma pasintawe. Pasuguni, kana yagami karuꞌena kotu waintometa ausari tumima wanipinti naisuwaewantawe.

³³Piya puguni, igate kana yaga kiye kina igeba iyegaka kumati ima, pi aꞌyaꞌma kamanape keꞌwaisintaga yagara taramisi kamanape kaga wasana aꞌyaꞌma uwaimiwaentawe.

³⁴Uwaimuguni, wabe wayape aꞌyaꞌmagini kumatisa tumimagini Isuti tumpa irosantawe. Aeti tumpa irosaꞌmagini: Marepa atate to mari waomagini, esegima omintawe.