Read Fore Matiyu 9 Bible Online

Matiyu 9 - Fore bible

Matiyu 9

¹Pigoya, Isuba wanipisa karebi ima kotupa to kake taꞌema kanama kumaꞌwati to kakema irosantiye.

²Irosaogini, agisa aya puꞌwanta yagara ka wasara wasirite kanatawe. Piya puguna, Isuba imatitiꞌenawaimpa nkagoba igate agisa aya puꞌwanta yagara maya omintiye: Yagarane, kaekuruba a-po. Naeba aguntaenagapa maegagasuwema, omintiye.

³Piyama omogana, mono tisa kina kaꞌisamiba intabaipinti mayama napintawe: Aeꞌwa nkau maete ima Kotika akayasotayema, napintawe.

⁴Piyama napiyuguna, Isuba napiyenawai igate maya uwaimintiye: Tigebipa nanaga agunta kamanapa napiyewe.

⁵Piya, aguntaenawa mpaegasuwe, yopa, auꞌwapa kampa agawe. Asima wao ukubopa, kaba atama kasa au aborakenaenagaba tiyobi kunta piye.

⁶Pigoya, Wasanama Ntagara naepa mabi aguntaena asuꞌa pikena esegiyenaba naminti, piꞌna nkagoba aogima agabebema agaiyo, piya ute, agisa aya puꞌwanta yagaragaba maya omintiye: Asima wasagapa aesagabite waꞌegati waoma, omintiye.

⁷Piyama omogana, asima waꞌewati wantiye.

⁸Piya pogini, aꞌyaꞌma kinaꞌmiba agate iyekuru pumagini, Koti pi nkesegiyena wasana imomeka iꞌmu puntawe. Isu Matiyuka kegaꞌe untiye

⁹Pigoya, Isu aeba pitasa wama takisi maeyome ntagara ka agewapa Matiyu, aeba yogaeba pome ntamankapi mintogana uma abatama omima maya untiye: Kaeba kanama ampa naegaraoma, omogana, pabigo asima aegarantiye.

¹⁰Pigoya, Isu namankapinti naninta nanema agegaꞌe yogana iyogini, takisi maeyume kinape to kaꞌisa aguntaena pume kinape uwoma irosauguni, Isube abagi kinape kaga nanintaba nantawe.

¹¹Piya puguni igate, Parasi kina igeba abagi kinaꞌwa maya uwaimintawe: Tisaripa takisi maeya kina aguntaena pe kinaꞌmikeba nana pikena kaga mima nanintaba nayema, ibigantawe.

¹²Pi kamana Isuba abite maya uwaimintiye: Tusa yagara aeba aogi kinaꞌmitiba kampa yogaba piye. Yoni kinaꞌmiti mana piye.

¹³Pigoya, tigeba wama paisa kamana mayama waintemi, pi nkagoba abibebe piyo: Naeba kaema agunta abasakenaenagaba kampa nabiye. Agu kaoꞌenaga nabiye, iye. Piya, naeba: Aogi kinatawe, ye kinapa aogi puwaitakenaba kampa tumintone. Naeba agunta kina igu aꞌwae pikibeka tumone, piya uwaimintiye. Isu aogantaꞌenawampa paisaenaba agarubaye

¹⁴Pigoya, pi ntaga Yoni nkabagi kina igeba Isuti ampa irosaꞌma maya uma abigantawe: Taebe Parasi kinape kaꞌisa yagaba monotaka nanintaba aꞌa-o uma uwa miyuna, pi kae kabagi kinaꞌmiba nana piyema nanintaba aꞌyuguba nawe, untawe.

¹⁵Piya yuguna aeba maya uwaimintiye: Wasanami ibaꞌena pigina iba waeꞌma nkawaeba uwa mintakiniba, ayama aokinaꞌmiba intaraꞌena puma nanintaba aꞌa-o uma mikibewe, a. Pipa kampaye. Ainti ibaꞌwaeꞌma nkawae ampa arakurite ababute to mari wagasiginiba, aokinaꞌmiba intara puma kampa naninta nanta uwa mima aeka napikibewe.

¹⁶Piya, ae ntagarama paisa kai atugekanaba aoso kairasaba pugunikiye, a. Pipa kampaye. Aoso kaiwama paisa kai tabera paibekana atuꞌma atisasanaga piyaba a-po.

¹⁷Piya, ke kasa wainiba paisa meme aribipa ariꞌatakiye, a. Kampaye. Kasa wainiwama paisa meme ariba atuꞌma wainibe meme aribe ataena pusanaga piyaba a-po. Piya, kasa waini to kasa meme aribi ariꞌataiginaba, isigeba kaga aogima waikibese, piya untiye. Isu Yairasi nkaraga purintapisa kaba atantiye

¹⁸Isu aeba pi kamana uwaimima mintogini, monota paitama miyome ntagara kaꞌwaina aeti kanama agora ampa parokaema maya untiye: Aragane ibanto puriya, kaeba kanama auta ampa aukaya pegana aoganoma, omintiye.

¹⁹Piyama omite waogini, Isu aeba asima abagi kinaꞌwake aegaꞌma wantawe.

²⁰Wauguna, waya ka iyegari tumiyaba mima miyogana kaboba nagisarisa tara tumpaema aꞌya punti, aeba Isu kai atunkata aukaya puntiye.

²¹Piya puntana, antabaipintiba mayama napintiye: Kai manankata aukaya pumagi kabarikuwe, untiye.

²²Piya ute, aukaya pogana Isuba aꞌwae puma kana waeꞌmati ao agama maya untiye: Araganepa, kantawamaba paru peno. Kaeba kamatiti punatampeka aogi kabiyema, omintiye. Omogana, pabigo kana waepa kabaꞌma atawantiye.

²³Pigoya, Isuba wama kiya yagarama ntamapi ima ini kubegabe kamanaꞌwaipa abite maya uwaimintiye:

²⁴Tigeba irosaꞌma tumiwaegasiyo. Ma nkaraga aeba kampa purintiya, aeba uwa awaita mintiye, piya uwaimogini, kamanaꞌwa abugunaba uwa anagi kamana kanta piyema napintawe.

²⁵Aibuguna uwaitaogini, abeꞌi irosaꞌma tumiwaegasuguna, kana wasana wasa waintometi uma paiꞌma kana aragama nkayata urogana, aogama asintiye.

²⁶Piya pogana, pi kamanaꞌama pi mpariba pabigo abae purite wagana puwaentiye. Isu isiyorika yagararage aibo yagarage aogi puwaitantiye

²⁷Pigoya, Isuba pi mpaba atate waogini, isiyorika yagara taramisi aegaꞌma wantinisi kegaꞌe uma maya untase: Kaeba Tebiti ntagaragawa, tasigeka kantara po, untase.

²⁸Piya yusuguna abite wama kumata uma irosaoginisi agora wausuguna isibigama maya untiye: Tisiyo aogi puritakena esegiyenaba wainatantiya, pipa abibebe pesoma, isibigantiye. Piyama isibigaoginisi isigeba maya untase: Pipa taga abibebe puse, untase.

²⁹Piya yusuguna isiyora aukaya puntana maya untiye: Tisimatitiꞌenarisimpa auꞌwapa aborarisimikiye, untiye.

³⁰Piya yogana, pabigo isiyo apinaꞌma agantase. Aibusuguna, Isuba esegi kamana uma maya uwaisimintiye: Abiso. Tisigeba ma kamanapa wasana a-nkuwaimisigini abiyo, uwaimintiye.

³¹Piyama uwaisimoginisi, pigo isigeba wamaginisi mare-u me-u pusuguna pi mpariba kana kamanaꞌama abae purite wagana puntiye.

³²Pigoya, isigeba wausuguni, igeba karuꞌena ka yagara Isuti ababute kanantawe. Aeba ke kina kaꞌwaina aigaraogana aiboꞌena puma mintantiye.

³³Piya pome ntagara ke kina agaruba agasogana aeba kamana untiye. Piya pogini, uwoma kina mintume kinaꞌmiba iꞌmu pumagini maya untawe: Maretapa paipa piyaenaba kapa kampa aboragi agama miyompene, untawe.

³⁴Piya yuguni, Parasi kina igeba Isuka maya untawe: Ke kinaꞌmi asu igasima minti ntagarama aoꞌmaeyagina, ke kinapa agaruba igasaye, untawe. Isu aeba aꞌyaꞌma kinaka antara kamana untiye

³⁵Pigoya, Isu aeba pabiyamagina aꞌyaꞌma mari nasi nasi pumagina, tabe kumatibe uwaena kumantontoribe Koti kabiratakena kamana mono namapinti uwaimintana, yonintana iki nakiyena ibome kinapa kabaꞌma paru puwaita waentiye.

³⁶Pigoya, uwoma kina igantana igeka antara puntiye. Igeba sipisipi kiye kampa kabiyegana ataenabi mpiyesa puma miyuguna,

³⁷pika antara puma abagi kina maya uwaimintiye: Yogaba tabe waintegina, piya naninta aꞌna pukena kinapa tarantowe.

³⁸Pika tigeba yoga agowamaka esotaigina naninta aꞌna pukena kinapa aboraigiri yogawatapa waiyo, piya uwaimintiye.