Read Fore Maka 1 Bible Online

Maka 1 - Fore bible

Maka 1

¹Koti ntagara Isu Karasatikaba aogi kamana mayamawe:

²Pigoya, Koti kamana unti ntagara Aisaya esapi mayama kaentiye:Abo. Kamanaꞌne maenta yagara agarubakana paitama kaori wama, kekapa aogi pikiyema, Koti yeginaba,

³awaga kamana ukena yagara kaꞌme mpari mima kegaꞌe uma mayama aboraye: Tabe Yagarama ki iꞌma aogi piyoma, Aisaya piyama kaentiye.

⁴Piyama kaeyogana, Yoni wani paiꞌitanti ntagara wama kaꞌme mpari umima maya uwaimintiye: Aguntaenaripa kaitegiripa aꞌwae puma wani pasigina, Kotiba aguntaenaripa maerigaikiye, uwaimintiye.

⁵Piya uwaimogini aꞌyaꞌma Yutiya marisa kinape aꞌyaꞌma Yerusaremi kumatasa kinape aeti wawabumagini, aguntaena pume kamanaꞌwaipa uma aborauguna, Yontani wanipi paiꞌitantiye.

⁶Pigoya, Yoninta kaiwapa kamoro yaga ayatasa pomima, auꞌarirasa abamu kantiba kitama mima, iroke tuke nantiye.

⁷Pigoya, Yoniba maya kamana untiye: Nakaꞌi kanakibi ntagara agewapa asu nagasima waintika, naeba mayamanaba narakabima agisa anapa kampa akubo agaikuwe.

⁸Piya, naeba wanitasa paititaogana, togana aeba Aota Awamusatasa paititakiye, uwaimintiye. Yoni Isu wani paiꞌatantiye

⁹Pigoya, pi kanabipa Karariya mari Nasareti kumatasa Isu kanaogana, Yoni Yontani wanipa paiꞌatantiye.

¹⁰Paiꞌataogana wanipisa ima mayo agaopa, manta kabi aꞌwaiyogana, Awamusaꞌama pupunta kanta purite Isuti tumpitogana,

¹¹mantabisa maya kamana tumintiye: Kaeba nabugami ntagaranekawe. Tabera naꞌmu pugatauwe, untiye. Kewama Isu amiyo puntiye

¹²Aiyogana, pabi ntaga Awamusaꞌama Isupa kaꞌme mpari agarubaogana wantiye.

¹³Wamagina 40-wa ntaga kaꞌme mpari mintogana, Satani amiyo potaogana, Isu kampa abintiye. Pigoya Isuba umugabage miyogana, enisore kinaꞌmi aogima kabitantawe. Isu yogaenawapa Karariya-i agobintiye

¹⁴Pigoya, Yonipa arakuꞌma igaꞌna namapinti atauguna, Isuba Karariya-i wama Koti nkaogi kamana uma,

¹⁵maya untiye: Pigo agoya, Koti kabiratakenaenaba agarosaye, Isu piya ute: Aguntaenaripa kaite tigu aꞌwae puma aogi kamana abibebe puma aegaraiyo, uwaimintiye. Isu tarawa tarawaki kinapa ibabuntiye

¹⁶Pigoya, Isu aeba Karariya kotu awamori waomepa Saimonige aꞌnantowampa Enturuge, isigeba yogawaisipa inoyanta aebusume ntagararaginisi, kuko aibarekima wanipinti motausuguna uma isigate,

¹⁷Isu maya uwaisimintiye: Tisigeba ampa naegaraiso. Inoyanta aeyamesa puma wasana iba pikenaena tisiyakikuwe, uwaisimintiye.

¹⁸Piya uwaisimoginisi, pabigo isigeba kukoꞌwaisipa atate aegarantase.

¹⁹Aibusuguna, Isuba to nasi nasi puma waomepa, Sepeti ntagara Yemisige aꞌnantowampa Yonige wanipisa karebi mima, kuko aogi puma mintusuguna uma isigantiye.

²⁰Isigategina pabigo isigegaꞌe yoginisi, isigeba isibawaisimpa Sepetige yogawa pome kinaꞌwake wanipisa karebi itate Isu aegarantase. Isu ke kina agarubantiye

²¹Pigoya igeba Kapaniyamu kumati wama, sabati yaga Yuta kinaꞌmi mpono namapinti wama, Isu kamana uwa uwaimogini,

²²kana kamana yomeka abite pami puntawe. Piya, Isuba mono tisa kinaꞌmi kamana nane. Kiya kinaꞌmi yumesa kamana uwaimogini, abite pami puntawe.

²³Pigoya, pi mono namankaipinti ka yagara ke kina antabaipinti minta yagara ampimagina, mayama tabera kegaꞌe uma maya untiye:

²⁴We, Isugaba Nasaretirisa yagaragawe. Taegukena kanapaya, nana puratakena kanane. Piya, naeba ago abopa, kaeba Kotitisa aota yagaragawe, piya untiye.

²⁵Piya yogana, Isu: Paka pumagina atate irosaꞌma wagaso, omintiye.

²⁶Omogana, kana yagarama antabaipisa ke kinaꞌmi apasara potama tabera kegaꞌe otate irosaꞌma wagaintiye.

²⁷Aibogana, aꞌyaꞌma kinaꞌmiba agate pami pumagini, maya kamana mare-u me-u puntawe: Nana kamanapaya iye. Taeba kampa abintompe kamana umagina, Kiya kinaꞌmi usu kamana uma uwaitagini keginaꞌmiba kamanaꞌwapa wasiyewe, untawe.

²⁸Aibogini, aꞌyaꞌma Karariya kinaꞌmiba Isu pomentanaga abite napintawe. Isu Pita aentawampa aoꞌmaentiye

²⁹Pigoya, Isuba mono namapisa iroꞌma Isu Yemisike Yonike isibabute wamagini, Saimonike Enturuke isige namapinti wantawe.

³⁰Waumepa, Saimoni aentawampa nkau yaku taogana awaitamintogini, Isu omuguna,

³¹aeba wama uma ayata uꞌma asitaogana, yonintanawapa ata waogana, kana waeꞌmaba naninta maema imogini nantawe. Isu uwoma kina aogi puwaitantiye

³²Pigoya, pi ntagaba asenamaita aꞌyaꞌma yoni kinake ke kina intabaipinti minta kinake ibabute Isuti kanagana pumagini,

³³aꞌyaꞌma pi kumatasa kinaꞌmiba nama kabera ampintugana

³⁴uwoma kinaꞌmi tonarona inuntanawaipa kaba itamagina, uwoma keginapa igarubantiye. Pigoya, ke kinaꞌmiba aeꞌwa nkagoba agauguna, pipa mare-u me-u pusanaga akunkitantiye. Isu Karariya-i nasintiye

³⁵Pigoya, abaya aseka Isu asima iroꞌma wama, kaꞌme mpari wamagina uma nunamu yogini,

³⁶ainti Saimonige aokinaka aguyosagata wama

³⁷uma agate: Aꞌyaꞌma kinaꞌmi kae kagakena pewe, omintawe.

³⁸Piya omuguna, Isuba maya untiye: Pigoya, taeba to kaꞌisa kumati wano. Igepa mono uwaimikenaga kanauwe, uwaimintiye.

³⁹Piya uwaimitegina, aeba wama aꞌyaꞌma Karariya mari wama, mono namankaipinti kamana uma uwaimimagina, uwoma ke kinapa agarubantiye. Isuba karu yagara aoꞌmaentiye

⁴⁰Pigoya ka karu yagara aeti kanama ampa parokaema mima, esegima mayama abigantiye: Kaeba kabemika kaba natakena puntanapa aogi punatao, omintiye.

⁴¹Piya omogana Isu antara potama, ayapa parosuma auta uꞌma maya untiye. Piyaenaga nabiye. Pabigo kata wakana aogima miyo, untiye.

⁴²Piya yogana, pabi ntaga kana karuyenawapa ata wantiye.

⁴³Ata waogana Isu esegima uma maya omintiye. Uwa kinapa a-nkuwaimima, kaeba marupa mono kiye yarara uma kaupa ayakegana agano. Piya, kata wamikaba pai Mosese uramintintanaba amegini wasanamiba kagate: Aoso yagara miyema napikibewe, piya omintiye.

⁴⁵Aibogana, kana yagara abeꞌi irosaꞌma wama, mare-u me-u puma pi kamana uwaimogana, Isu to kumati uwa wakenaga kampa abogana, abeꞌi kaꞌme mpari mintogini, aꞌyaꞌma aukaꞌisa wasanamiba aeti wantawe.