Read Fore Maka 10 Bible Online

Maka 10 - Fore bible

Maka 10

¹Pigoya, Isu pi mpa atate Yutiya mari wama Yontani wani mparoteri uraꞌema waogini, to pumesa puma uwoma kinaꞌmi aeti kana puguna, to yomesa puma kamana uwaimintiye.

²Kamana uwaimogini, kaꞌisa Parasi kinaꞌmi aeti irosaꞌma amiyo potakena puma maya uma abigantawe: Ago kamanatepinti wasanama waya kaikenaenaba tagapayawema, uramoma abigantawe.

³Piyama abigauguna Isu aꞌwae puma: Aya kamana Mosese urimintiyema, to ige ibigantiye.

⁴Ibigaogini igeba maya untawe: Waya kaikena puntiripa, esa amima otaiyoma, Mosese untiyema, omintawe.

⁵Piyama omuguna Isu maya uwaimintiye: Tigeba monoka kampa karuꞌena abima tige akuneka, Mosese pi uraminti kamana kaentine.

⁶Piya, pai Koti maru aꞌyaꞌwaemaena aborantanaba, wabe wayape kaga aborawaisitantine.

⁷Pika napima, wamaba ano abapa isitate wayaꞌwampati atokaema isigeba ka kina kanta puma miyese, untiye.

⁸Piya, isigeba taraba kampa punta, kaꞌena puma miyese.

⁹Pigoya, Koti atokae isitantika, wasanaba a-nkatara isitano, Isu piya uwaimintiye.

¹⁰Piya uwaimite namapinti waogini, abagi kinaꞌmi pi kamanaꞌama nkagowaka abigauguna,

¹¹maya uwaimintiye: Kaꞌwaina wayaꞌwampaba kaite to wae maekibipa, marusa waeꞌwa ataena potama kumiyenaba pikiye.

¹²Piya puma, wayaꞌma marusa wawa agora atate, to wa maekibipa, awae ataena potakiye, piya uwaimintiye. Isu yakarantontoga aꞌmu puwaitantiye

¹³Pigoya, kaꞌisa kinaꞌmi yakarantonto Isuti ibaburite: Ita ukaya penema napima, ibabute kanauguni, abagi kinaꞌmiba pi kinaka imo kasa untawe.

¹⁴Piya yuguna, Isu pi kamana abite kampa aꞌmu puntana, abagi kinaꞌwaka maya uwaimintiye: Tigeba itaigini, yakarantonto igeba naeti kanaiyo. Tigeba a-nkakunkitaiyo. Piya miye kinaꞌmikaba Koti kabiratakenaenaba utawaitantine.

¹⁵Pigoya tigeba urimikenaba abiyo. Wasanama kampa yagaranto miyisa puma Koti aegarakibipa, Kotiba kana kinatapa kampa kabima mikiye, untiye.

¹⁶Piya untana, yakarantonto ibabuma aki puwaitama, ita ukaya puma: Aogima miyiyo, uwaimintiye. Tabe kutantaga yagaramage Isuge kamana untase

¹⁷Pigoya, Isu asima wakena pogana, ka yagara karuꞌena kanama agisabi ampa arakabima mima: Kaeba aogi tisa yagaragawa, naeba ayabaya pukubotisa eꞌwasaena maekuwema abigantiye.

¹⁸Abigaogana Isu maya omintiye: We, nanagabaya: Aogi yagaragawema unamene. Ka Koti abiwa aogi yagaraba mintiya, toba kampaye.

¹⁹Pigoya, nayataraꞌmu ago kamana mayama ago abintana: Wasanaba a-nkaeguyoma, kumiyenaba a-poma, kuntanaba a-poma, kampari kamanapa to wainapa a-sotaoma, to kinaꞌma ntanagaba a-kaukaba poma, kano kaba kamana wasiyo. Pipa ago abintane, omintiye.

²⁰Omogana: Tisa yagarama-o, naeba yagaranto mitatopa pi kamana abimagi, aꞌyaꞌma yagaba pabiya putone, kana yagaramaba omintiye.

²¹Piyama omogana Isuba: Nabugampe ntagaragawema napintana, mayama omintiye: Kaꞌenaba kampa aogima napiyene. Kaeba wama kotakapa umaema to kinati imima yaba maema, kusi kinapa imo. Piya pikibempepa mantabinti uwomantanaga waikiye. Pabi ugamosa pugaite ampa naegarao, omintiye.

²²Piya omogana abigate, uwoma kutankaka napima, antara puma amo pute wantiye.

²³Pigoya, Isu abagi kinaꞌwa igate maya uwaimintiye: Ayamabaya tabe kutantaga kinapa Koti kumati ikiye, a, untiye.

²⁴Piya uwaimogini, pi kamanaka abagi kinaꞌmiba abite pami puguna, Isu to maya uwaimintiye: We, ma ntakarakiꞌnuntepa abiyo. Wasanama Koti kabiratakena kumati ikenaba esegiyenawe.

²⁵Pigoya, kamoro yagamaba naꞌama nkagepinti uma pasikenaba pipa esegiyenawe. Piya, tabe kutantaga kinapa Koti kabiratakena kumati ikenaba pipa to awameta, tabe kuntaenawe, untiye.

²⁶Piya uwaimogini, pi kamanaka abagi kinaꞌmiba tabera pami pumagini, mare-u me-u puma: Pigoya kebaya aoꞌmaeyakana ikiyema napintawe.

²⁷Piyama napiyuguna, Isu igate maya uwaimintiye: Pika wasanama kunta abekana kampa pikenaenawe. Pigoya Kotipa kampa kuntaba abegina aꞌyaꞌwaemaena pikenaenaba agantiye, uwaimintiye.

²⁸Piya uwaimogana, Pita Isuka: Abo. Taeba aꞌyaꞌwaemaenaba atate ago kaegaraune, omikena pogana,

²⁹Isu aꞌyaꞌma abagi kinaka maya uwaimintiye: Owe tagane. Tigeba abiyo. Wasanama nae aogi kamana napima naeka, mawa, yogawa, anonanto aganto aꞌnanto ano aba yagarawa, atate naegarakibipa,

³⁰ibasa yagaba aogima mima, uwoma to namape yogabe maeyakini, uwoma to anonantoge agantoge aꞌnantoge anoge yagarawake aege ampiyigini, to kinaꞌmiba aepa ata potaigina, agogo yagaba aeba eꞌwasa yagara asu mikiye.

³¹Pigoya, pi ntaga kaꞌisa kiya kinapa kayokaya kina miyigini, kayokaya kinapa kiya kina mikibewe, untiye. Isu aeꞌwa purikena kamana to ka uwaimintiye

³²Pigoya, Isuge aokinake Yerusaremi kumati ikena kiꞌi imagina, Isuba paitama waogini, abagi kinaꞌmiba akaꞌi wama pami puguni, igege waume kinaꞌmiba iyekuru puntawe. Aibuguna, Isu nagisarisa tara tumpaema abagi kinaꞌwaka: Ka aukaꞌi kanaiyo, yogini, kanauguna aeti kaꞌisaena aborakibi puma kamanapa

³³maya uwaimintiye: Tigeba abiyo. Yerusaremi kumati iyekini, Wasanama Ntagara naepa narakuꞌma, mono kiya kinake mono tisa kinake imigini, kamana unatama: Aeguyiyo ukibewe. Piya umagini, naepa namuꞌisa kina imigini,

³⁴karana natamagini, kaisa punatama, igaꞌna kasu maema naebaruꞌmagini naeguyigi puꞌwakuwe. Aibumagi togana kakaga yagaba asima mikuwe, uwaimintiye. Yemisige Yonige tabe kina mikenaga isibugantiye

³⁵Aiyogini, Yemisige Yonige isigeba Sepeti ntagara taraginisi, Isuti kanamaginisi ampa mayama abigantase: Tisa yagarama-o, tae kabiratakenaenaga kabigakena puse, yusuguna:

³⁶Ayama kabirisitakenaenaga tisibiyema, isibigaoginisi,

³⁷maya omintase: Kaeba togana aogi kumakati maraꞌmima kabima mikenaenara mikibempepa, tasigeba kaege mima, kaꞌwaina kayatakantisa aukaꞌi miyekana, kaꞌwaina kayakeꞌmasisa aukaꞌi mima, kiya kina misanaga tasibiye, untase.

³⁸Aiyusuguna, Isu auki naki pukenaenaga meto kamana maya uwaisimintiye: Tisigeba nabigakenaenagaba kampa aogimaba napiyese. Nae nantaraꞌenabi tisigeba kanara pasikibeso. Nae paiꞌnatakibintanaba tisigepa paitisitasiyoma, isibigantiye.

³⁹Piyama isibigaoginisi: Owe, piya purasitakibepa kanarane, omintase. Piya omusuguna, Isu maya uwaisimintiye: Pigoya, nae nantaraꞌenabi pasikibese. Nae paiꞌnatakibintanaba tisigepa paitisitakiye.

⁴⁰Pigoya, nae naya tararari mikena kinakaba kampa nae napiyokana, Koti ae abintana wasanaba ibabuma kana naya tararariba itakiye, uwaisimintiye.

⁴¹Uwaisimogini, to pi nayataraꞌmu abagi kinaꞌmiba pi kamana abite, Yemisike Yonikegaba ka isibirauguna,

⁴²Isu kegaꞌe uma, aꞌyaꞌma aki puwaitama maya uwaimintiye: Tigeba ago abintawe. Wasanama uwa kinaka kiya mima pitasa kinata: Kabiyo yeginaba, aeba esegima kabiye. Kiya yagarama: Piya piyo yintanaba pewe.

⁴³Pigoya, tigeba kana kiyaenaba kampa piyaba pumagiri, ka yagarama kiya mikena pipa, aokinaꞌmi kayokayaꞌenaba pikiye.

⁴⁴Pigoya tigeri ntapima: Nae kiya yagara mikuwema napikibepa, aꞌyaꞌma to kinaꞌmi kayokayaꞌenaba po.

⁴⁵Piya, Wasanama Ntagara naeba tige nae kayokayaꞌena punataiyomaba kampa tumintone. Naeba tige kayokaya pukenaga tumpa puꞌma, uwoma kina ika puma aꞌwatitakena tumintone, uwaimintiye. Isu to ka aorika yagara aogi potantiye

⁴⁶Pigoya, igeba Yeriko kumati asu migategini, Isuge abagi kinaꞌwake to uwoma kinape pitasa ikena puguna, ka aorika yagara, agewapa Patimesi, Timeyosi ntagara keta maraꞌmintometisa: Ma na namiyo, untiye.

⁴⁷Piya uma mintogini igeba: Isu Nasareti kumatisa yagara iye, yuguna abite, aeba Isuka kegaꞌe uma maya untiye: Isugaba, Tebiti ntagaragawa, naeka napima kantara punatao, untiye.

⁴⁸Piya yogini uwoma kinaꞌmi: Paka puma miyo, omuguna to taberasa kegaꞌe uma: Tebiti ntagaragawa, naeka napima kantara punatao, untiye.

⁴⁹Piya yogana, Isu pabita mima: Mati kanao omiyo, untiye. Yogini, igeba kana aorika yagaraga: Kaꞌmu puma asiyo. Ago kaeka kegaꞌe iyema, omintawe.

⁵⁰Omuguna, kabiwa kaꞌurintometisa akubugaite, asima Isu asu aepantiye.

⁵¹Aibogana: Kaepa nana pugatasanaga kabiyema, Isu abigaogana, kana aorika yagaramaba maya omintiye: Tisa yagaragawa, nao agasanaga nabugaye, untiye.

⁵²Piya yogana Isuba: Naeka aogima napiyekana, ago kata wagina uwa wao, Isu omintiye. Omogana, ago aogamagina pabi kiꞌi Isu aegarantiye.