Read Fore Maka 11 Bible Online

Maka 11 - Fore bible

Maka 11

¹Pigoya, Yerusaremi agora ikena puntini, Oribesi amu amentanti Petipaesi kumape Petani kumape waintogana, Isu abagi kina tara paitama isigarubaꞌma,

²maya uwaisimintiye: Mo kumati tumima, tonki aikeri kampa wasanamiba nasinta ubuꞌatama mintigirisi, tumikibemepa pabigo aora tumpa agamagirisi, akariyobaꞌurite iyiso.

³Piya pisigini, wasanami: Nanaga pese yigirisiba, maya uwaimiso: Tabe yagarama yegira maeyomekana, pabigo arontaganto me timikiye uwaimiso, untiye.

⁴Piya yoginisi tumima tumpa agausumepa, kabe agora keta yara tonki aikeriba ubuꞌatama mintugunisi, wama uma akariyobantase.

⁵Piya pusugana, kana pita mintume kinamiba: Nanaga yaga awaroba akariyobase, untawe.

⁶Piya yugunisi, pabi uwaisimomesa puma uwaimusuguni: Kanarana, ababute waiso untawe.

⁷Piya yugunisi, isigeba kana tonki aikeriba ababute Isuti imaginisi, isitasaenarasa kana yaga akabata amapa agutausuguna, pi abobora Isu maraꞌmintantiye.

⁸Piya pogini, uwoma kinaꞌmiba itasaena akubuma keꞌi aguyuguni, to kaꞌisa kinaꞌmiba yogarisa ya aꞌye aegayuma keꞌi aguyuguna, piꞌna nkabobori wantiye.

⁹Waogini, aori akaꞌi ogasi ankagasi puta wantini, taberasa maya untawe:We, Waꞌegawama nkawamuta taeti kanaika taꞌmu potano.

¹⁰Tayabama Tebiti kabima mintantisa puma kabikena piya, Kotika taꞌmu potano. We, Inatisa Yagaraga taꞌmu potano, untawe.

¹¹Piya yuguna, Isu Yerusaremi kumati ima, tabe mono namapinti asu paiꞌma, pipintisaena aꞌyaꞌwaemaena asu agaogana, ase ikena pogana, irosaꞌma Petani kumati nagisarisa tara tumpaema kinake tumintiye. Yamanka kampa aeyome ntaga kamanane

¹²Tunkwaimarategina, Petani kumatasa keꞌi iyogana, agaꞌena abuntiye.

¹³Aibogana mogaomepa aꞌye uwaena wainta ya, agewapa piki ya agate tumima tumpa aka aguyosagaomepa, kampa yoga yagawa aboraogana, apa kampa aentiye. Kampa aentogana aꞌyenkamana abi agate,

¹⁴pi ntaga maya omintiye: Toba apa a-nkaeyagini, wasanamiba to kampa asigiꞌma nakibewe, omogini, abagi kinaꞌmiba pi kamanapa abintawe. Ikantana maeyume kina mono nampisa igarubantiye

¹⁵Pigoya igeba Yerusaremi kumati asu mima, Isuba tabe mono namapinti iyumepa, pitaꞌi ikantana puma mintuguna igarubantana, mone antota ankami ankami pume kinaꞌmi ntabaebe kabara ataume kinaꞌmi ntabaebe apasanaꞌma asunukaentana,

¹⁶itasaena pi mpono kuma akapipa maete wakenaga akumpaꞌma mintantiye.

¹⁷Piya pumagina aeba maya esegima uwaimintiye: Mono isaꞌamaba maya iye: Mono namantepa aꞌyaꞌma kinaꞌmi nunamu ukena namantana peno, untiye. We, tigeba piya pegana kuntana pe kinaꞌmi ntamantana piye, uma igarubantiye.

¹⁸Uwaimogini, tabe mono kiye kinaꞌmibe mono tisa kinaꞌmibe kana pomentanaga abite, Isu aeguyigina purikibi kamana untawe. Piya, aꞌyaꞌma kinaꞌmiba Isu kamana abite pami puma iꞌmu puguni, kana mono kiye kinaꞌmiba pika napima, Isuka iyekuru puntawe.

¹⁹Aibuguna ase ikena pogini, Isuge abagi kinaꞌwake pi kumatasaba atate wantawe. Taga nunamu ikibiꞌnaba pabiyaena maekiye

²⁰Wama waimarate, marogini abayara keꞌi kanantini, kana piki ya agaumepa aubu yaga asawantiye.

²¹Asa waogana, Pita wama uma agate ai kagi yome kamanaka napima, Isuka maya omintiye: Tisa yagarama-o, agao. Kaeba kamana kana piki ya omitampe ntaba ago asa waye, untiye.

²²Piya yogana Isu maya uwaimintiye: Pika napiyiyo. Tigeba Kotiti tigu atantiri,

²³kampa tonaronaga napinta, ikibe kamanaka piya pikiyema napikibepa, piya pikiye. Piya, maro nkamuꞌamaka: Tigabaꞌma wanipinti tumo yesinta, pabi yesa pesine.

²⁴Pigoya pika urimuwe. Tigeba nunamu uma abigantiripa, pikaba ago abima pikiyema napiyiyo. Piyama napima ikibepa, pintanaba ago tigeka pikiye.

²⁵Pigoya, tigeba asima nunamu untiripa, to kinaka timoꞌena pikenaenaba kasiyo. Piyama kaikibepa, mantarisa tibarimpaba aiboꞌenaripa maerigaikiye.

²⁶Piya, tigeba wasanami nkaiboꞌenawaipa kampa mae igasiginaba, mantarisa tibarimpaba aiboꞌenaripa pabiyama kaga kampa maerigaikiye, piya untiye. Kebaya esegiyenaba kamiye, mono kinaꞌmi abigantawe

²⁷Pigoya, igeba to ima Yerusaremi kumati asu mima, Isu tabe mono namapinti nasogini, mono kiya kinamige tisa kinaꞌmige kabiyume kinaꞌmige aeti ima,

²⁸mayama abigantawe: Nanaga kaeba mantanaba pene. Ke po yemintana pene, untawe.

²⁹Piya yuguna Isu maya uwaimintiye: Pigoya naeba kaꞌenaga tibigakiri, ukubontanaga aogima unamikibepa, ke po yemintana pene ye kamanapa urimukuwe.

³⁰Piya, tigeba unamiyo. Yonikaba wani paititanemaba ke omintiye. Mantarisaenabera wasanamintanawema, ibigantiye.

³¹Piyama ibigaogini, igeba mayama napintawe: Nanawe ukenema, mare ibiga me ibiga pumagini, Koti po omintiye yekanaba, aeba: Nanagabaya ae kamanapa kampa abewe ikiye.

³²Piya wasanami po omintawe yekanaba... Pigoya aꞌyaꞌma kinaꞌmiba Yonikaba: Koti kamana unta yagarabayawe yepa, aꞌyaꞌma kinaka mono kinaꞌmi iyekuru puntawe.

³³Iyekuru puma: Taeba kampa abintune, omintawe. Isupa piyama omuguna, aeba maya untiye: Pigoya naeba: Ke po yemintana pene ye kamanapa kampa urimukuwe, Isu uwaimintiye.