Read Fore Maka 12 Bible Online

Maka 12 - Fore bible

Maka 12

¹Pigoya, Isu meto kamana maya uwaimintiye: Pigoya ka yagara waini yamanka maekena yuga pumaꞌma, kagisa aenkima kimaꞌma, yamanka aerakena koma maꞌma, kabima mikena namapa kimaꞌma, kabinataiyema to kina kana yugaba imogini kabima mintuguna, aeba to mari wagaintiye.

²Wagasometisa yamankapa agutayagana, ka yuga kinaꞌwaka: Wama yogara kabima miye kinaꞌmitisa yamankatasa maekibe nkapeꞌena umaema mentamoma, agarubaogana wantiye.

³Wa-mepa, pi ntugara kabima mintume kinaꞌmiba kana yuga yagarawapa arakuꞌma aeguma aegumugasima, kampa apeꞌenaba aminta, auka agarubauguna waꞌeri wantiye.

⁴Waogana to ka yuga kinaꞌwa agarubaogana waomepa, to pi ntagara arakuꞌma aꞌno aiyeye pumutama, ataena potantawe.

⁵Piya puguna kana yogama nkabawampaba to yuga yagarawa agarubaogana waogini, arakuꞌma aegutauguna purintiye. Aibuguna, to igarubaogini waumepa, iyeguyuguni kaꞌisa purintawe.

⁶Aibuguna agagate ka yagara mintomepa, aeꞌwa ntagara abugaome ntagara mintogana: Yagarane agarubakana wakiniba, ae awamu wasikibewema, napintiye. Piyama napima, agarubaogana waomepa,

⁷kana yogara kabima miyume kinaꞌmiba mare-u me-u puma maya untawe: Ma ntagaraba kana yogama abawampa ntagarawa kanaigi aeguyeno. Aegukubompepa kana yogaba taeꞌenaena puwakiye, untawe.

⁸Piya utegini, kana yagarawapa arakuꞌma aegutama, wasirite yoga awamo kabubinti me maebugaintawe, Isu piya untiye.

⁹Piya uwaimintana, to maya untiye: Pigoya kana yugama nkabawampa kanama ampikibipa aya pikiye, a. Tige ago abintawe. Kana yagara kanakibipa pi kinapa ampa iyegugasima, to kinaka: Kana yogarapa kabiyiyo, uwaimikiye, untiye.

¹⁰Piya, naeka mono isapisa kamana maya waintipa kampa aisewo. Pipa ago abintawe:Nama kikena kinaꞌmiba ka ya ago kainta ntawama iba waꞌega ya asima waintiye, iye.

¹¹Pintanaba Waꞌegawamaba ago pega, taeba agantompeka, taꞌmu pune, untiye, Isu piya uwaimintiye.

¹²Uwaimogini, kana Yuta kiye kinaꞌmiba: Taeka ma amiyo kasaba iyema, napima arakurikena pumepa, pi aꞌyaꞌma kinaka iyemaꞌma, Isu uwa atate wantawe. Takisi imikena kamana Isupa abigantawe

¹³Pigoya, kaꞌisa Parasi kinake kaꞌisa Eroti nkaokinake: Isuti wamagiri uma tonarona kamana abigaiyo, untawe. Ata kasa urimikibayawema uwaimite igarubauguni,

¹⁴aeti kanamagini mayama abigantawe: Tisa yagaragawa, taeba ago kagaune. Kaeba taga ntagara mintane. Piya, ima tumima minta kinakaba kampa karu punta, esegiyenawaika kampa kaekuruba puma, Koti mponoꞌama kipa kanara uramima kayakene. Pigoya, mono kinaꞌmite taeba Aroma waꞌega yagara Sisa takisi mone aya pusune. Tae ago kamanapa ayabaya iya uramoma, omintawe.

¹⁵Piyama omuguna, Isu meto kamanaꞌwai abite maya uwaimintiye: Nanagabaya ataena punatakena pewe, untana: Pigoya, yabapa maete kanama nayakiyo, untiye.

¹⁶Piya yogini, igeba maete kanama amuguna: Amankape awaꞌenabe mapa kewema, ibigaogini igeba: Sisantawe, untawe.

¹⁷Piya yuguna, Isu maya uwaimintiye: Pigo yewa, Sisantanaba Sisa amiyo. Piya, Kotintanaba Koti amiyo, yogini aekaba pami puntawe. Puꞌwakibetisa asikena kamana Isupa abigantawe

¹⁸Pigoya, kaꞌisa Sarusi kinaꞌmi Isuti kanantawe. Pi kinapa wasana puꞌwatisaba kampa asikibewema napiyume kinaꞌmiba,

¹⁹igeba Isuti kanama maya uma abigantawe: Tisa yagarama-o, Mosese kana kamana ago taeka mayama kaema uramintiye: Wasanama anarimpa yagaraena kampa pekana kana yagara puꞌwakibipa, to aꞌnantowampa kana abeya waepa maema aege mimaginisi, agantowampaka yagaraenaba pikibese uramintiye, untawe. Piya untini amiyo kamana mayama abigantawe:

²⁰Pigoya, tonaentisa tara umaema agaꞌnantonto mintumepa igantowaimpa wayapa maentiye. Maemaꞌma kampa yagaraena punta puꞌwantiye.

²¹Aibogana, to ae akaꞌisama kana waepa maeyomepa, aege kampa yagaraena punta puꞌwantiye. Piya pogana to piꞌna nkakaꞌisama maeyomepa, aege uwa puꞌwaogini,

²²to piꞌna akaꞌisami pabiya puma maema puꞌwantawe. Pigoya tonaentisa tara umaema agaꞌnantonto kana wae maemaꞌma, aꞌyaꞌma kampa yagaraena punta puꞌwaewauguna, kana waepa ikaꞌi purintiye.

²³Pigoya, tonaentisa tara umaema kinaꞌmi nkwaena, asikibi ntagaba ke kana waepa maekiyema abigantawe.

²⁴Piyama abigauguna Isu maya uwaimintiye: Tigeba kampa abintawe. Ayamabaya kampa napiyewe, a. Tigeba mono kamanape Koti nkesegiyenagabe kampa napima agantawe.

²⁵Piya, puꞌwantatisa asiwaitakini, wa wayapa to kake kampa maekibewe. Igeba enisore miyesa puma asu mikibewe, untiye.

²⁶Piya, puꞌwantapisa asikena kamanapa urimukuwe. Tigeba Mosese kaemaranti nkisapipa yabi yaku takena kamanapa ago abintawe. Piya, yabi yaku taogana uma agakena waogana, pita Koti Mosese maya omintiye: Naeba Abaraꞌamu, Aisaki, Yekobu, ige Koti mintuwe, untiye.

²⁷Pipa untika, aeba puꞌwanta kinaꞌnane. Aeba iyoganta kinaꞌmi Koti mintiye. Piya, tigeba kampariꞌma napiyewe, Isu piya uwaimintiye. Ago kamanaꞌama nkagowa uwaimintiye

²⁸Piya uwaimogana, ka mono tisa yagara ampima, Sarusi kina pi yume kamana abite: Aogi kamana iyema napite, Isuti kanama mayama abigantiye: Nana taga ago kamanaꞌama asugasimaba waiyema, abigantiye.

²⁹Piyama abigaogana Isu maya omintiye: Pi kana asugainta kamanapa mayama waintiye: Isureyo kinapa abiyo. Tae Tabe Yagara Koti abiwa tabe miyegina,

³⁰pigoya aꞌyaꞌma kagu kaumakape, napiyenagape, esegiyenagape, Waꞌega Kotigapa aꞌyaꞌma amegana waiyeno.

³¹Pigoya ma kamanaꞌama nkakaꞌisaba ka maya kamana waintiye: Kaegaka napima kabiyempesa puma, kaokinakaba kabiyeno. Pigoya, ma tara kamana yo kamanaꞌamaba to kaꞌisa ago kamanaꞌamapa asu igaintiye, omintiye.

³²Piya omogana, kana mono tisa yagaramaba maya omintiye: Tisa yagara-o, kanara sene. Yempe kamanapa taga kamanane. Pi yempepa Tabe Yagara abiwa Kotiba miyegina, to kotiba kampa mintawe.

³³Pigoya, pintanaba wasanama aꞌyaꞌma agutasabe napiyenawatasabe esegiyenawatasabe Kotika abugagina, aewaka napiyisa puma agorasa kinakaba napiyipa, pipa tagane. Pigoya wasanama monoka yaga ababute wama, uma aeguma ina yakuta Kotiti kaema, tona aꞌmuntana amipa pipa tagane. Pigoya pi tara yempe kamana abima wasanama aegaraipa, Kotiba aekaba abugaye, kana yagarama untiye.

³⁴Piya yogana, Isu yome kamana abite, nauka kamana yenema napima, maya omintiye: Pigoya, kaeba agaro Koti aogima aegarakibene, omogini, wasanami abite, iyekuru puma to kamanapa kampa abigantawe. Karaisiti aya yagarabayawema, ibigantiye

³⁵Pigoya, Isu tabe mono namapi kamana uwaimima mayama ibigantiye: Mono tisa kinaꞌmi Koti utaratanta yagaramaba Tebiti ntakarakiꞌnu mikiye, yepa ayabayawe, untiye.

³⁶Piya, Tebitika Aogi Awamusaꞌama nkawamuta maya untiye:Kotiba Tabe Yagaraneka: Kaeba nayatakanti ampintaga kama kinakapa kagisabi ibabuma aki penoma, untiye, Isu piya untiye.

³⁷Piya untana: Tebiti utaratanta yagaraga: Tabe Yagaranene yemipa, pigoya yakaragiꞌnunkapa mikena piya ayamabayawema, Isu ibigantiye. Piya, mintume uwoma kinaꞌmiba abite Isuka iꞌmu puntawe. Kaꞌisa tisa kinaꞌmi pesapa a-piyo, uwaimintiye

³⁸Pigoya, Isu uwaimintana maya untiye: Kaꞌisa mono tisa kinaꞌmi eꞌero kai igisari paibotate, wama maketi kumata nasegini, wasanamiba: Aogi yagarawe, uwaitasanaga ibugagini, mono namapi paitama marusa aogi yabaera misanagega ibugagini, taena pepa tabe yagara mima, piya po piya po usanaga ibugaye. Piya pesapa a-piyo, untiye.

³⁹

⁴⁰Piya, pi kinaꞌmiba abeyawaeꞌmantana paibumagini, uwomantanawa uwa maerintini, eꞌero nunamu uwa agoꞌena kasa yewe. Piya pekana igepa toganaba Kotiba tabera kamparaga puwaitakiye, untiye. Abeya waeꞌma yabankapa Kotiti atantiye

⁴¹Pigoya, Isu tabe mono namapinti Kotiti yaba atakena kankabema nkagora maraꞌmiyogini, wasanami yaba pipi atauguna agantiye. Piya pogini, uwoma yaba wainta kinaꞌmiba tabe yaba maema kankabebi menta puguna,

⁴²ka wae awaewampa puꞌwanta waeꞌma ampa tara uwaena yabankanto tara, piya wanisenikana, mempaebotantiye.

⁴³Piya pogana Isu abagi kinaꞌwaka kegaꞌe yogini, ampa aki puguna maya uwaimintiye: Tagaka urimuwe. Ma kotanka kampa wainta abeya waeꞌma atami ntabankama aꞌyaꞌma kinaꞌmi mono namapisa kankabebi ata ntabankamapa, ae asu igasima ataye.

⁴⁴Pigoya, igeba tabe yabankai waintipisa kaꞌisa maema atawe. Aeba kampa kotankapa waintegina, pabi waintinkawa aꞌyaꞌwaemaenawapa maema kasagina, naninta ika puma nakenaba kampa uwa ataye, untiye.