Read Fore Maka 13 Bible Online

Maka 13 - Fore bible

Maka 13

¹Pigoya, Isu tabe mono namapisa iroꞌma waogana, ka abagi yagarama maya omintiye: Tisa yagarama-o, agao. Nauka tabe yabatasa ma aogi mono nama kintawe, agao, yogana,

²Isu maya omintiye: Pigoya ma agampe tabe namapa kama kina irosaꞌma akasagasuba kasaigina, ka yabankamaba to ka yabankama nkabobora wareꞌnaigina nama tubo aborama waikiye, untiye. Ataena uwomantana aborakiye, Isu untiye

³Piya utegina, Isuba wama Oribesi amuta asu maraꞌmima, pi amutisa kana tabe mono nama mo agaogana, Pitage Yemisige Yonige Enturuge pabi ibinto aeti imagini,

⁴maya untawe: Kae uramempentanaba ayantaga aborakiye. Nanabaya kanaka agakana, aꞌyaꞌma uramempentanaba agarontaga aborakiyema uramo, untawe.

⁵Piya yuguna, Isu maya kamana agobima uwaimintiye: Tigeba napiyiyo. Aꞌyugu wasanami kampari kamanaꞌwai abisiwe.

⁶Piya, uwoma kina irosaꞌma nae nage umagini: Naeba Karaisiti nawe, uma, uwoma kinaꞌmi nkiguꞌama paibumagini kamparaga puwaitakibewe.

⁷Pigoya, maꞌena pewe kamana abintiripe, esiba kamana abitegiri, tiyekuruba a-puma: Kana aꞌya piyeba, a-siyo. Pi mpaꞌena maru pikibepa asa agogo yaga aborakiye.

⁸Piya, maga maga kinaꞌmiba kamaena pigini, to kaꞌisa kinaꞌmiba to ka marisa kina uma iyeguyigini kamaena purite wagana pikibewe. Piya, to mari to mari imima tabera pekini, kaꞌisa kinapa naninta iꞌmikibewe. Pigoya, wayaꞌma yagaraena pikena pegina maru agobima aukemisa puma, kana ataenaba maru pikiye.

⁹Pigoya, tigeba aogima napiyiyo. Wasanami kanama ampa tirakuꞌma kotiyena puritama, mono namapi kasotasa tiyegukibewe. Pigo tigeba naegaraka, kanisore kinatige tabe kinatige tibabute waigiripa, tigeba pi kinapa aogi kamanaꞌnepa uwaimiyo.

¹⁰Pigoya, aꞌyaꞌma kinapa aogi kamanaꞌne maru uwaimigasigina, toganaba agogo yagaba aborano.

¹¹Piya, tirakuꞌurite kotira wakena pigiripa, kana uwaimikubo kamanakaba: Ayabaya uwaimukunema, a-ntapiyiyo. Pi ntaga kamanatipa ikena kampa napikibewe. Aogi Awamusaꞌama urimikibi kamana uwaimiyo.

¹²Pigoya, pi ntaga wasanami iꞌnanto irakuꞌma to kina imigini iyeguyigini, piya pemisa puma, ibawaimpiba yagarawaipa ata puwaitauguni, to yagarawaimpa anoke abakepa ataena puma: Iyeguyiyo yigini, iyegukibewe.

¹³Pi ntagaba nae nageraka wasanamiba kama puritakibewe. Piya pigiri, aꞌyaꞌma yaga naeka napima kampa natakibepa, toganaba aogima mikibewe, untiye. Agasiya ataena aborakiye, uwaimintiye

¹⁴Pigoya, ma esapi aisuma agakibe kinaꞌmiba aogima abiyo. Piya, pi agogo yagaba monota tabera kamparagaenaba aꞌyugu mikibi nkaukaꞌi ataigiri tiniꞌena pikibewe. Piya, pi ntagaba Yutiya mari mikibe kinapa, tiyegaka wama amu mari iyiyo.

¹⁵Wasanami abeꞌi mikibe kinaꞌmiba aꞌyugu namapinti ima kaꞌisaenaba asu maete wasanagawe.

¹⁶Pigo wasanami yogari mintakibetisaba aꞌyugu to wama namapintisaena ampaete wasanagawe.

¹⁷Pi kanabipa igaꞌentaga waepe, inamuganto nono amikibe nkwaepe kamparagama mikibewe.

¹⁸Pi ntagaba esiba yaga waisanaga Kotiti nunamu yiyo.

¹⁹Pigoya, maru Koti pogana, aboranti ntaga toma toma ataena waita waita ima, ibantoba waintikana, togana pi ntagaba tabera asu igasima tabe kuntuyenaba waiyekana, to asaba ataenaba kampa waikiye.

²⁰Pigoya, Waꞌegawamaba: Naegarao uwaimi kinaka napintikana, pi ataenaba eꞌero ntaga kampa waikiye. Pi ataena eꞌero ntaga waiyisinta, aꞌyaꞌma kina kampa uwa minta puꞌwaewasine.

²¹Pigoya wasanami: Agaiyo, Koti utaratanta yagara, Karaisiti yagara mataꞌi mintiye urimikibepa, a-nkabiyo. Agaiyo, marompa mintiye urimikibepa, a-nkabiyo.

²²Piya, kaꞌisa kinaꞌmi aborama tonarona esegiyenawai puriyakintini, kaꞌisa kinaꞌmi: Karaisiti yagara nawe, yigini, kaꞌisa kinaꞌmi: Poropete yagara nawe, yigiripa, ige kamanapa a-nkabiyo. Igeba metoꞌena puma, Koti: Naegarao uwaimi kinaꞌmi ntapiyenawaipa maema ataena pikena pigiripa,

²³pi kamanapa a-nkabiyo. Aꞌyaꞌma togana aborakibintanaga urimuwe, uwaimintiye. Wasanama Ntagaranaga to aborakuwe, untiye

²⁴Uwaimintana to maya untiye: Pigoya, pi ata yaga aborakana, toganaba papa tunusekana, opa kampa eꞌwasa pekana,

²⁵noriba tutubu pekana, mantaba kuru pekana esegiyenawapa iyobaꞌma kareko pikiye.

²⁶Piyaena marupa aborawaka, togana Wasanama Ntagara naeba tumukubopa, tabe esegiyenanentaga mimigara tumekini nagakibewe.

²⁷Pi ntagaba enisore kina igarubakini, aꞌyaꞌma mari wama, aꞌyaꞌma matuka matukarisa kina Koti: Naegaraiyo, uwaimemi kinapa ibabuma, naeti me akibikibewe, untiye. Piki ya kamana uwaimintiye

²⁸Piya untana, to maya untiye: Pigoya, pika ya agama aogima napiyiyo. Kana yawama nkaꞌno mparagina: Pipa yoga yaga aborayema, napiyesa puma,

²⁹urimontana aborakibipa, agogo yaga agaro aborakiyema, napiyiyo.

³⁰Pigoya tagaka urimuwe. Kaꞌisa kinaꞌmi kampa purikibepa, aꞌyaꞌma urimontanaba aborakiye.

³¹Mantabe mabe aꞌya wakana, kamanaꞌnepa uwa waiyaba waima kampa kakakiye, untiye. Isu to aborakibi ntagagaba kampa abune

³²Piya untana to maya untiye: Pigoya, ayantagabaya urimontanaba aborakiye. Wasanamiba kampa abintawe Mantarisa enisore kinaꞌmiba kampa abintawe. Koti Ntagara naeba kampa abintokana, nabanempa abiwa abintikana, yekana aborakiye.

³³Ayantagabaya aborakiyema kampa abepa, nae tumukubopa napima aogima miyiyo.

³⁴Pika meto kamana ukuwa, abiyo. Piya, wasanama namanka atate to waꞌeri wantana, yoga kinaꞌwaka: Piya po, piya po, omima: Na kiye kabiyo, omite wagasaginiba: Ayantagabaya kanakiyema, napi napi pesa puma,

³⁵tige napiyiyo. Ayantagabaya namankama nkaba kanakiye: Atamaino, asenabintiwo, kokore aga yekanawo, abayawo, kanakibayawema, tigeba kampa abintawe.

³⁶Agaro kanama aꞌyugu waitamintigina, ampa tigakiye.

³⁷Pigoya urimontanaba aꞌyaꞌma kina uwaimuwa, pika napi napi piyo, uwaimintiye.