Read Fore Maka 14 Bible Online

Maka 14 - Fore bible

Maka 14

¹Piyama magaba Yuta kinaꞌmi Pasoba naninta nakena yagabe yisiti kampa wainta pareti nakena yagabe aborakena pogini: Isupa aya pumabaya kakama arakuꞌma aegukunema, tabe mono kiya kinaꞌmige mono tisa kinaꞌmige napintawe.

²Napintini: Aꞌyugu naninta nakibe ntaga arakurekini wasanami ata maꞌena pusanagawe, untawe. Wayaꞌma Isu nkaꞌnoti masawae tiꞌma paiꞌatantiye

³Pigoya, Isu Petani kumata wama, Saimoni autantaꞌena ago ata wanti ntagarama ntamapinti umima, naninta naogana, ka waeꞌma marasa punta kabo kankabe aogi agunta masawae maete kanantiye. Kana masawaenkama nkagewapa natiwe, tabe yabatasa ika pumaranta, maete kanamagina, kana kankabe ampa aꞌwa puma, Isu nkaꞌnoti tiꞌma paiꞌatantiye.

⁴Piya pogini, kaꞌisa kinaꞌmiba agate ka abiꞌma: Nanagabaya kana masawae kasayema, mare-u me-u puntawe.

⁵Piya, kana masawae to kina imemisinta, 300 torapa maema, kusi kina imemisinema, ka abirantawe.

⁶Piyama abirauguna Isu maya untiye: Uwa ataiyo. Nanagabaya kaba abirawe. Naukaena punataye.

⁷Pigoya, kusi kinaꞌmi asi nasi tigege miyekini, aꞌyaꞌma yaga napima iyoꞌmaekena pewe. Pigoya tigege naeba asi nasiba kampa mikuwe.

⁸Kana waeꞌma aewa napima, masawae nauti yora punatama kainatakibika napima, ibantoba maema aogi piye.

⁹Pigoya naeba tagaka urimuwe. Aꞌyaꞌma mari nae aogi kamana uwaimikibepa, ma punatamintanaga aeka mare-u me-u pukibewe, untiye. Yutasi Isupa kiya kina imikena puntiye

¹⁰Pigoya, nagisarisa tara tumpaema abagi kina mintumepa, ka abagi yagara, Yutasi Isikeriyoti, aeba tabe mono kiye kinati wama: Isupa arakuꞌma timukuwoma, uma ibigantiye.

¹¹Piyama ibigaogini, ae kamanaka iꞌmu pumagini: Piya yempeka yabapa kamukune yuguna, Yutasiba: Aenkaukaꞌibaya Isuba waka arakurukuwema, napintiye. Isuge abagi kinake Pasoba naninta nantawe

¹²Pigoya, yisiti kampa wainta pareti naume ntaga aboraogini, pi marusa yaga Pasoba nanintaraka sipisipi awaro aegukena puguni, abagi kinaꞌmi Isuka mayama abigantawe: Pigoya taeba aenkaukaꞌi wama, Pasoba nanintagapa maema kaeti aogi pukunema, abigantawe.

¹³Abigauguna, Isu abagi kina tara isigarubaꞌma maya uwaisimintiye: Tisigeba kumaꞌi waisigina, wani kankabe aesaga urinta yagarama tisigakirisiba, ae aegaꞌurite waisigina,

¹⁴namapi wakirisi, kana namankama nkaba nkuma omiso: Tisa yagaramaba maya iye: Naege nabagi kinake mima Pasoba naninta kae namapi nakuna, aemparuta ampima nasune iyema, omiso.

¹⁵Omisigina, aeba tisibabute inati aogi pumaranta tabe maru asu tisiyakekirisi, pitaꞌi Pasoba naninta taeka napima aogi piso, uwaisimintiye.

¹⁶Uwaisimoginisi pi abagi kinaꞌmisi itate kumaꞌi wamaginisi pi abagi kinaꞌmisi itate kumaꞌi wamaginisi, pabi uwaisimomesa puma wama agateginisi, Pasoba naninta aogi puntase.

¹⁷Aibusuguna, ase ikena pogini, Isuge nagisarisa tara tumpaema kinake wama,

¹⁸uma teborira mima nantini, Isu maya untiye: Pigoya tagaka urimuwe. Tigepisa kaꞌwaina minaga punatakiye. Ibanto naege naninta nami ntagarama piya pikiye, untiye.

¹⁹Piya yogini igeba intara pumagini: Naeka yeno yenoma, abigauguna,

²⁰aeba maya uwaimintiye: Nagisarisa tara tumpaema kina tigepisa, naege ka tuꞌnapisa paretirasa antipi mo aema nami ntagaramaka yuwe, untiye.

²¹Piya, Wasanama Ntagara naeba mono kamanata unatanti kiꞌi wakuwe. We, Wasanama Ntagara naepa minaga punatakibiꞌnaba ataenabi mikiye. Piya, pi ntagarapa wasanama kampa yakari potantesinta, kanara pesine, Isu untiye. Auke korake imogini nantawe

²²Pigoya, igeba naninta nantini, Isu paretiba maema, Koti aꞌmu potama, ako puma imintana: Mapa nae nauna maema naiyo, untana,

²³waini kankabe maema aꞌmu potama, imogini pi aꞌyaꞌma kinaꞌmi nantawe.

²⁴Piyama imitana, Isu maya uwaimintiye: Uwoma kina Kotiti atokaekenaga ma korantepa ago pagikiye. Pipa araꞌena potauwe.

²⁵Tagaka urimuwe. Toma naompe wainiba kampa nakubopa, toganaba Koti kabiratakibita kasaꞌena nakuwe, uwaimintiye.

²⁶Piya uwaimintana ini ugaitegini, iroꞌma Oribesi amuti intawe. Pitaka: Aꞌyo uwa natakibene, Isu omintiye

²⁷Aibuntini, Isu maya uwaimintiye: Mono isaꞌamaba maya iye: Sipisipira kabima minti ntagara aeguyiginiba, kana sipisipiba iyegaka aibarara puwakibewe, iye. Piya yemisa puma, tigeba aꞌyaꞌma natate tiyegakaꞌya puwakibewe.

²⁸Pigoya togana asinatakibipa, Karariya-i tigepa paitama wama aborakiri nagakibewe, untiye.

²⁹Piya yogana: Aꞌyaꞌma kinaꞌmi iyegakaꞌya puwakibepa, naeba kampa katate wakuwema, Pita omintiye.

³⁰Piyama omogana Isu maya omintiye: Tagaka ugamuwe. Iba aseka kakagara naeka: Kampa aganto ntagarawe, yeganaba: Tarara kokorewama aga ukiyema, omintiye.

³¹Piyama omogana Pita esegima maya untiye: Wasanami naeke tasiyegukibepa: Naeba ae aoꞌyagara kampa mintuweba kampa ukuwe, omogini, aꞌyaꞌma kinaꞌmiba pabi Pita yomesa suntawe. Isu Kesemeni yugabi nunamu untiye

³²Pigoya igeba ka auꞌi wama, kana mawama nkagewapa Kesemeni, wamagini Isu abagi kinaka: Mata maraꞌmiyigi nunamu yeno, uwaimintiye.

³³Piya, Pitana Yemisina Yonina suma, ibiri ibabute wamagina, agasiyama aekuru puma akawagawa pumagina,

³⁴maya uwaimintiye: Naepa tabera naukima nanta waru waru nabiya, tigeba mata mima kabinataiyo, untiye.

³⁵Piya umagina, aeba ka auꞌi wama auki nakiyena uwa atakenaga umagina, mara antagawarisa uma aigare paꞌma mima, nunamu maya untiye:

³⁶We nabanempa-o, kaeba aꞌyaꞌwaemaena pikena yagara mintana, nauki nakiyenaba naparo. Pigoya, nae napiyenagaba a-ntapima, kaeka napikibempentana wasima po, untiye.

³⁷Piya ute, kana pi kakaga kinaꞌmi waitamintuguna, igate Pitaka maya omintiye: Saimoni waitamintano.

³⁸Kampa agarosama kaoganta wairabankano. We, tiyogama mima, kabinatama nunamu yiyo. Piya puntiripa kampa aguntaena pikibewe. Pigoya tiguꞌamaba tiyampu pegina tiꞌamaba kampaye, uwaimintiye.

³⁹Piya uwaimitegina, to mare aukaꞌi wama, pabi to yomesa nunamu untiye.

⁴⁰Ugaitegina to ampa igaomepa, waite asite pugagategini waitamintuguna, kanama ampa igaogini, ae omikena kamanakaba kampa napintawe.

⁴¹Aibuguna to wagate kanaomepa maya uwaimintiye: Tigeba to migarakena waiyewo. Pabigoya, nae yaga aboraya, ibanto Wasanama Ntagaranagana, ataena punatakini, agunta kinaꞌmi narakurikena pewe.

⁴²Pigoya, asiyigi wano. Minaga punatakena yagaraba mompa iya, agaiyo, untiye. Isu arakurintawe

⁴³Pigoya Yutasi, nagisarisa ka tumpaema abagi kina nasumepisa me nkigaite waogana, Isu kamana ugaka pogana, Yutasi uwoma kina uma ibabute kanantiye. Piyama tabe mono kiye kinaꞌmige tisa kinaꞌmige kabiyume kinaꞌmige pi uwoma kina igarubauguni, igeba irebube maꞌena kasupe maeyuguna,

⁴⁴minaga potakena pome ntagarama ibabute kanantiye. Aeba kanantana maya untiye: Uma agate, amo nakubo ntagaraba aewa, arakuꞌma kabirite waiyo, piya ute ibabute kanantiye.

⁴⁵Yutasi ibabute kanama, karuꞌena Isuti wama: Tisa yagarama-o, ute, uma aepaꞌma amo naogini,

⁴⁶uma aebasaꞌma arakuꞌurintawe.

⁴⁷Arakuꞌuruguna, ka pi mintume ntagarama kasonka me aꞌyuburintana, mono paitanta yagarama ntuga yagarawapa uma aeguma, age aira kaentiye.

⁴⁸Aibogana Isu maya uwaimintiye: Tigeba nanaga naekaba ku kinanema napima, narakurikena irebube kasope maete kanawe.

⁴⁹Naeba asi nasi tabe mono namapinti wama kamana yogiripa, kampa pitaꞌiba narakurewe. Pigoya, mono isaꞌama yemisantana narakuꞌma, karana natakibewe, untiye.

⁵⁰Piya yogini, abagi kinaꞌwa aꞌyaꞌma atate iyegakaꞌya puwantawe. Ka yagara auka aegaka wagaintiye

⁵¹Piya puguna, ka kai amirinta masimabima Isu aegaꞌurite kanaogini, aeke arakuruguna,

⁵²kana yagaramaba aibarigo puma, kaiwapa atagaite auka aegaka wagaintiye. Isu kamana otantawe

⁵³Pigoya, igeba Isupa ababute monota paitanta yagarari wauguni, pitaꞌi aꞌyaꞌma tabe mono kiye kinaꞌmige kabiyume kinaꞌmige tisa kinaꞌmige me nkaki puntawe.

⁵⁴Piya puguna, Pita akaꞌi aegaꞌma pasema wama, monota paitanta yagarama kumati ima, irebu kina mintume ntakuta asu tapintiye.

⁵⁵Asu tapiyogini, tabe mono kiye kinaꞌmige aꞌyaꞌma mono kanisore kinaꞌmige mimagini, Isu kamana otamagini, Isu ataena pusanaga ige atakae puma, Isu aegukena pumagini, piya kamanapa kampa abintawe.

⁵⁶Pigoya, uwoma kinaꞌmi ampimagini, kampari kamana: Aeba piya pine, piya pine yuguna, ige yume kamana agoba kampa aogima abintawe.

⁵⁷Piya puguna kaꞌisa kinaꞌmiba asima kampari kamana Isuka maya untawe:

⁵⁸Ma wasanami kimaranta mono nama akasabaꞌmaba, wasanami kampa kiyesa ntama kakaga yaga kima aꞌya kaikuwe, ubegi abibompene, untawe.

⁵⁹Piya umagini, igeba to kaꞌisami yumesa puma, kampa ka kamanapa unta, to kamana to kamana uwaimintawe.

⁶⁰Uwaimuguna, monota paitanta kiye yagarama ikapi asima mima, Isuka mayama abigantiye: Ma kinaꞌmi kaeka yepa, kaeba ayawe uramikibenema, abigantiye.

⁶¹Abigaogana, Isu kampa kamana unta asabaꞌwaogana, paitanta yagaramaba to mayama abigantiye: Tabe taꞌmu potaompe Ntagarama ntagara Karaisitigawoma, abigantiye.

⁶²Abigaogana Isu maya untiye: Pipa nae mintuwe. Tigeba Wasanama Ntagaranaga Esegirakaꞌya Ntagarama nkayatakanti maraꞌmiyekiri nagaigi, mimiga mantara tumekiri nagakibewe, untiye.

⁶³Piya yogana, tabe kiye yagaramaba kabiꞌma autasaenaba aegaregaru paꞌma, maya untiye: Nanagabaya to kinaꞌmi kamana yigi abukune.

⁶⁴Aeꞌwa piyama Koti Ntagaranawe yipa, kampari kamanaꞌwapa yegiri abewa, aya pisiwema, ibigantiye. Ibigaogini: Aeba ata yagarawa, aeguyiyoma uwaimo, untawe.

⁶⁵Piya untini, kaꞌisa kinaꞌmiba kaisa potamagini, aoba airarikae uꞌma aegutategini: Kebaya kaeguya, uramoma, abigauguni, irebu kinaꞌmiba arakuꞌma iya kasutasa aeguntawe. Pita Isuka: Kampa aganto ntagarawe, untiye

⁶⁶Pigoya Pita kumaꞌi mintogana, monota paitanta yagarama ntuga potaome nkwaepa kanama,

⁶⁷agaomepa Pita yakuta tapima mintogana ampa agate: Kaege Isu Nasaretirisa yagarageba naseka kagabone, untiye.

⁶⁸Piya yogana aeba: Aꞌa-o. Naeba kampa abuwa, kamanakapa nanawe yewe, untiye. Utegina, ae kagisa kabera tumpintogana, kokore aga untiye.

⁶⁹Tumpintogana to kana waeꞌmaba agate, agora mintume kinaka: Mo ntagaraba ae aokinane, uwaimogana,

⁷⁰Pita to: Aꞌa-o, untiye. Piya yogana uwaenanto togana to agora ampintume kinaꞌmi Pitaka: Kaeba Karariya yagaragawa, nanaga: Aꞌa-o yene. Kaeba ka aokinakawe, untawe.

⁷¹Aiyuguna aeba: We, taga kauwe. Naeba pi yempe ntagaraba kampa aganto ntagarawe, ute amota atantiye.

⁷²Piya pogana kokorewama to ka aga yogana, Pitaba pai Isu omome kamanaka mayama napintiye: Kaeba naeka kakagara: Kampa aganto ntagarawe yeganaba, tarara kokorewamaba aga ukiye omomeka napima, tabera antara puma, kubeꞌena puntiye.