Read Fore Maka 15 Bible Online

Maka 15 - Fore bible

Maka 15

¹Pigoya, abaya aseka tabe mono kiye kinaꞌmige kabiyume kinaꞌmige tisa kinaꞌmige, aꞌyaꞌma kanisore kinaꞌmige aki puma: Piya pukunema, uritegini, Isupa igaꞌnarasa kirokaetamagini ababute wama, Pairati memintawe.

²Memuguna Pairati: Kaeba Yuta kinaꞌmi Waꞌega yagaragawoma, abigantiye. Abigaogana Isuba: Kae piyaba yene, omintiye.

³Piya yogini, tabe mono kiye kinaꞌmiba: Uwoma tonarona ataenaba pemi ntagarawe, Pairati omintawe.

⁴Piyama omuguna, Pairati to ka mayama abigantiye: Igeba kaeka tonarona ataena pemi ntagarawe yepa, kaeba kampa kamanapa ikena penoma, abigantiye.

⁵Aiyogana, Isuba to kampa unta asabaꞌwaogana, Pairati piya pomeka pami puntiye. Pairati: Isu ababute yara aeguyiyo, untiye

⁶Pigoya, ka yagaraba agewapa Parabasi, pi ntaga aege aoꞌmige maꞌena puma, kiya kinaꞌmi nkaokina iyegute, karabusibi mintantiye. Mintuguna, aꞌyaꞌma Pasoba naninta naume ntagaba Pairatiba uwa kinaka: Karabusibisaba ke uwaba atasuwema, ibiga puntiye.

⁷

⁸Piya, pome ntaga uwoma kina ampa aki puma mima, Pairatika: To puntampesa puma kaꞌmu puratama, karabusibisa ka yagara uwa ataoma, abigantawe.

⁹Piya yuguna Pairati mayama napintiye: Mono kiye kinaꞌmi Isuka imo potamagini, arakuꞌma kotiyena potawema, napimagina: Tige yeka, Yuta kinaꞌmi Nkwaꞌega yagara uwa atasuwoma, ibigantiye.

¹⁰

¹¹Ibigaogini tabe mono kiye kinaꞌmiba ampa aki puntume kinapa maya uwaimintiye: Parabasi uwa ataoma omiyo, untawe.

¹²Piya yuguna, Pairati aki puntume kina to mayama ibigantiye: Yuta kinaꞌmi Nkwaꞌega yagarawe ye ntagara mintiya, aepa aya pusuwema untiye.

¹³Piya yogini: Yara aeguma itagiyo, untawe.

¹⁴Piya yuguna Pairati: Nana ataenaba pegiri yewema, ibigaogini, to taberasa: Yara aeguma itagiyo itagiyo, untawe.

¹⁵Piya yuguna, Pairati aki puntume kinaꞌmi iꞌmu punatakibewema, napima: Parabasi uwa wao, untiye. Piya yogana waogana, Isupa irebu kina imogini, igeba paga kasutasa agasiya kasu aeguyuguna: Ababute wama yara itagiyo, uwaimintiye. Irebu kinaꞌmi Isu karana atantawe

¹⁶Piya uwaimogini, irebu kinaꞌmi Isupa ababute tabe irebu kinaꞌmi kumati wamagini, kana kumaꞌama nkagewapa Paratoriyamu wamagini, to kaꞌisa irebu kinakaba uma kegaꞌe yuguni, ampa aki puntawe.

¹⁷Piya pumagini, kiya kinaꞌma tete kai maema Isupa amitamagini, ake wainta igaꞌnarasa taminokuꞌena potama, aꞌnotapa taminonkitama,

¹⁸saroti amimagini: Kaeba Yuta kinaꞌmi Nkwaꞌega yagaragawa, eꞌero ntaga aogima miyo, untawe.

¹⁹Aibuntini, igeba kasotasa aꞌno airapora puma aeguntini, kaisapa potantini, aeta parokaema karana kasa uma: Kaeba tabe yagaragawe, untawe.

²⁰Piya puma karana atagaitegini igeba tete kaiba atama maebugasimagini, to aeꞌwa kai amitamagini, abeꞌi iroꞌma ababute, yara itagikena wantawe. Isu yara itagintawe

²¹Pigoya, ka Sairini marisa yagara agewapa Saimoni, Aresantake Arupasike isibawaisimpa, to aukaꞌisa kanaometa keta pabumagini: Maripoba aesagaꞌurite wao, omuguna aesagaꞌurite wantiye.

²²Piya pogini, igeba Isupa ababute, Korikota wasana aꞌno nkayampu kanta mari wama umintuguni, pitaꞌi aeguntawe.

²³Piya, kaꞌisamiba kampa aukikena tusa wani wainibi atama: Naoma amuguna: Kampa nakuwe, untiye.

²⁴Piya, irebu kinaꞌmi uma yara itagitamagini, kaiwapa maemagini, teteꞌena pumagini, kebaya tonarona kaiwapa maekiyema puntawe.

²⁵Piya pumagini, abayara yara itagitamagini,

²⁶kotiyena potaume kamana maya uma kaentawe: Yuta kinaꞌmi Nkwaꞌega yagarawema, kaemagini, aꞌno nkabobori aꞌmakaetantini,

²⁷ku kina tarage, kapa ayatakantiwa, kapa ayakeꞌmasiwa suma, isigeke yara ita isitantawe.

²⁸

²⁹Piya puguni kaꞌisa kinaꞌmi agora wama, pumireri potama maya untawe: Kaeba ka yaga tabe mono nama akasabakaiteba, karuꞌena kakaga yaga kikuwe ubempe ntagaragawe,

³⁰kaega ntapima, yarasa kaupa aogi purite tumo, omintawe.

³¹Piya omuguni, tabe mono kiye kinaꞌmige mono tisa kinaꞌmige pabiyama pumireri potamagini, igewai marebiga mebiga puntawe: Aeba to kinapa aogi puwaitantana, aewapa nanagabaya kampa auꞌwapa aogi piye, untawe.

³²Piya, Koti utaratanta, Isureyo kinaꞌmi kiya yagaranawe untanapa, yaba pabigo ibanto atate tumegapa, kagate kae kaegarano, untawe. Piya yugunisi, pi tara aeke ita isitaume ntagararamisiba, isigege pumireri potamaginisi, aeka ata kamana otantase. Isu purintiye

³³Piya puguna, kagita aꞌyaꞌma maba ase uwaogini mintuguna, to atamaita mesu marintiye.

³⁴Pigoya, Isu atamaita mayama kegaꞌe untiye: Iro-i, Iro-i, arama sabatani, untiye. Pi kamanapa tae kamanapisaba: Kotinempa-o, Kotinempa-o, nanagabaya kaeba uwa natane, untiye.

³⁵Piya yogini, kaꞌisa mintume kinaꞌmiba abitegini: Iraiyakabaya kegaꞌe iye yuguna,

³⁶ka yagarama karuꞌena wamagina kai atuta asa wanipi ae uꞌma, asara kitama: Nao, ute mayo amintiye. Aibumagina mintume kinaꞌmipa maya uwaimintiye: Pabita, abiyo. Iraiyaba tumpa akitama uwa atakibayaka agakune, untiye.

³⁷Aiyogana Isu tabera kegaꞌe uma, purintiye.

³⁸Purogana, tabe mono nama nkantabintisa kai, Koti nkaukaꞌi akunkataume kai akapisa aeruꞌma torirari puwantiye.

³⁹Piyama Isu purogana, irebu kinaꞌmi kiya yagarama agora mintumetisa agate, maya untiye: Tagane. Ma ntagaraba Koti Ntagarawe, untiye.

⁴⁰Pigoya, pi ntaga wayaꞌiyaba mare nkauꞌi mima apasa puntawe. Kaꞌisa kana waeꞌmi nkigewaipa: Mariya Matara kumatisa waena, to ka Mariya aeꞌwa nkamana Yemisike Yoseseke isinowaisimpawa, to ka waeꞌma agewapa Saromiwa suma,

⁴¹Karariya-i Isu mintoganaba, kana waeꞌmi aegaꞌma, aoꞌmae pome waeꞌiya mintuguni, to uwoma Yerusaremi ababute inta waeꞌiyamige ampima, agaba puma mintantawe. Isu nkaupa maema kaintawe

⁴²Pigoya, aiba sabati aborakiyema, aꞌyaꞌwaemaenaba aogi puma ntagagana ase ikena pogana,

⁴³Arimatiya kumatasa yagara Yosepe, aekuruyenagaba kampa napinta Pairatiti wama: Isu nkaupa maesuwoma, abigantiye. Pigoya kana yagara aogi mono kanisore yagara mimagina, Koti kabima mikenaenaga napi napi pome ntagaragana mintantiye.

⁴⁴Piya yogana, Pairati: Agobaya puꞌwayema, napima, irebu kiya yagara kegaꞌe uma abigaogana:

⁴⁵Owe ago puꞌwaye, kana irebu yagara omintiye. Omogana abite Yosepeka: Kanarana auꞌwapa umaeyo, omintiye.

⁴⁶Omogana Yosepeba aogi wae kai maerite wamagina, uma akitama, pi kaibi yoburite, yabapi kuꞌmaranta kabi uma kaitamagina, kawarapa tabe yaba aꞌwaremagina akunkatantiye.

⁴⁷Piya poginisi, Mariya Matara kumatisa waeke, to ka Mariya Yosese nkanowampage, kanama kaiyome aru ampa agantase.